Read Lelemi Yeremia 10 Bible Online

Yeremia 10 - Lelemi bible

Yeremia 10

¹Amii Israel kadi bekyuli, bise atu na binu lɛla lɛni na Unwoti ɔɔsu.

²“Bitasiaku kadi bani bekyuli na liƒu lɛɛda si bánu ka lɛla lɛni na bátanu kudii lɛdi lɛɛlɛ́ na kayaa.

³Bana bɔƒɔtaadi ulu uuubo kɔsia kɔdi. Kugyii na baadá taava kalɔ na banwi-ku babla baƒiɔ.

⁴Na beti sika ɔƒualadi ku ugyiedi bakwa-nwu lɛlɔ na bakana-nwu bada kalɔ kalɛ na ulebuli ulatáyu kalɔ.

⁵Baƒiɔ bani na bánwi bátavumanaku ala ani na baabla taalɛ kemo taagya baasɛ ku bebweyi bamba bani muubile edula. Lɛla lɛnwidi lɛmɛni lilátɛmi na lilákana busie lɛnɔ, anwuɔsu bɔgyu na baagyú-ni teeti teetése mmɔ. Na bi ɔsu na ɔlɛka ukyuli ataayia baƒiɔ bani naaadubo-ɔ kebunku kadi bɔkana bute na balakana-a lɛla lɛdi lɛnɔ bɔbla?”

⁶Bula Unwoti ɔni nébomo na ebo ɔyikun geen, awɔ lɛti kani ndi Katɔti.

⁷Awɔ ndi kadi bekyuli ƒui ɔga. Na awɔ na ɔlɛka ukyuli biala ɔbu. Ɔsika ukyuli ɔyawine ɔdi uuubo kalɔ kamɛni lɛlɔ kesii kadi na ɔ́da anu utulo-ɔ.

⁸Ala ani na bánwi iye bávɔ bábla baƒiɔ baaadi lɛla lɛdi. Na ukyuli biala ɔni mɔɔkpá-ma ɔdi ɔdɔlɔdi!

⁹Bekyuli nánwi na bávɔ ala amɛni bábla baƒiɔ. Ligyii banwine baanwí ligyii na udu ɔdi kenye. Na abuala betune lɛnɔ baakywɛɛ ala ku sika ugyiedi ɔni na béku básiku Uƒas ku sika ɔƒualadi ɔni nási Tarsis na benyimi-nwu adala ani náƒɔ kuye geen.

¹⁰Awɔ Unwoti kani ndi Katɔti geen ɔni nli ngba. Na aadi lɛlɔ uwi ƒui. Na si éti kɔnyi ni, kalɔ kaakunku na kadi bekyuli baayii udu.

¹¹Awɔ násu-mi anii nsu-ma ka ɔɔɔdi baƒiɔ nédie kalɔ kammɔ na adubo baƒiɔ ƒui udu bɔyila.

¹²Ƒula lɛnunda ku ɔyikun na éti édie kalɔ ku kayaa ala ƒui.

¹³Eedie lɛdi teete ntu bɔni na áya na bɔƒa kayaa na buudu ku kɔku bonwu. Na liƒlukutu lɛɛdá taalɛ kayaa. Aayá na ɔƒɛƒɛɛ ɔɔsí ƒula kesii kani na áklibi ala ése teebekpo. Na kayaa kemodi kaabwɛ ogya si ɔnantu ɔɔna.

¹⁴Bekyuli bani mɔɔnwí na baavɔ́ ala teese lɛlɔ aani baƒiɔ bádɔlɔ! Badubo bana lɛnunsia bɔyila na enu aƒɛ-ma, ɔsika bana ɔkɔ bɔnyi baƒiɔ bammɔ balakana bɔnwuna.

¹⁵Baƒiɔ badi aƒiankula ku amala na si uwi ɔbuni úbo úbedu ni, badubo-ma udu bɔyila ƒui.

¹⁶Nsu awɔ Israel Katɔti ni, eeese lɛni, awɔ nédie ala ƒui na áƒuna Israel kadi bekyuli na badi awɔ badi geen. Ƒula lɛnyi ndi Unwoti Ɔyikune Ƒui.

¹⁷Lɛ́su Yudaƒuɔ nnini, “Bɛsala bina ala, ɔsika báaka bámana-mii.

¹⁸Unwoti ɔnii lɛbibo lɛmɛni ndubo bɔgyu bɔtɔ bina buƒie na bɛlɛ bina kalɔ lɛlɔ na bɛda-ka biwi. Ɔsika ndubo-mii bɔbɔku budie kalɔ kammɔ lɛlɔ aani kalɛ na beeƒwimi lɛtabi taalɛku kavwinvwi kemmo.”

¹⁹Mmɔ na bekyuli bammɔ básu banini, “Bɔ́ƒɔ ɔlɛ na bukpi kani na bɔdubo bukpi. Bi náya na bɔ́su bɔnii bɔdubɔkana lɛbibo lɛmmɔ kenye bunye?

²⁰Bábwɛ-bu kɔduli na bádu-bu bebi. Na ukyuli ɔdi ɔ́sɔ útebu na ubunku-bu na bɔkɛ kesii kani na bulie.”

²¹Nsu lɛ́su-ma nnini, “Bula batɔnkune badi badɔlɔdi bani nátakana lɛla lɛdi bɔbla, ɔsika béni na bétenu Unwoti litemi. Anwuɔsu na bégyingya-bu aani baƒonu kalɛ.

²²Buunú lɛsɛ lɛni ndanku ala bubile kɔku ɔ́siku kalɔ kammɔ katɔ kakɛ aani kayaa budu na ɔgyu kakaaka. Na blii nébu ɔƒɛni na bababwɛ-bu lɛma na bula kuliekɔ kunwini beƒukutu kuliekɔ.”

²³Unwoti, ngyi ka ɔɔɔdi abu bekyuli alati nda bula ngba.

²⁴Unwoti, ti-mi siaku ulu ɔbuni lɛlɔ kalɛ na ɔ́manku, nsu ɔɔɔdi ƒula kɔnyi kemmo. Si ɔɔɔdi lɛni ni, ndubo bukpi.

²⁵Bula bekisine béni na balátuna banii awɔ ndi Katɔti na babu-ɔ. Bábɔku bula bekyuli bálɛku bula ɔma na ɔma ɔmmɔ ɔƒɔ lɛlɔ uwi ukpludi aani alakpi. Anwuɔsu ti kɔnyi kya-ma na abɔku ama lɛnɔ atɔlɔku!