Read Lelemi Yeremia 15 Bible Online

Yeremia 15 - Lelemi bible

Yeremia 15

¹Unwoti ɔ́su-mi ɔnini, “Ina Mose ku Samuel nnye mɛni bebunku-ɔ na bɛɛkpali-mi teevele ni, lɛɛɛdubo bunu, anwuɔsu ya na Yudaƒuɔ bammɔ benwini batɔlɔ.

²Na si béye-ɔ banii wɛ na bésela ni, na asu-ma anii ami Unwoti násu nnini, ‘Ɔlɛ ukpidi ɔdubo bina badi bubo na bikpi. Na babambadi ni, kekpokɔ iye kɔka ndubo-mii bɔdu. Na bakladi ni, badubo-mii bɔkpanku bɔtɔlɔku busienku kaƒɔ.’

³“Ndubo-mi kɔtu bɔni na lilu ine bun bun lɛlɔ. Badubo-mii bɔdu na kekpokɔ na bakpewe bani bina ɔlɔna ukpine batɔlɔku. Na baasɛ baduli-mii lɛna bebweli. Na bakumbweyi bababwɛ-mii ekubi.

⁴Na ndubo-mii kɔtu kɔmmɔ bɔni na ala ekpidi bonwu ani udu na bina Ɔga Hesekia ubidi Manase ɔ́bla ɔsu. Na kɔtu bɔni bɔmmɔ bɔdubɔya na liƒu bonwu lɛda kalɔ lɛlɔ bekyuli ƒui.

⁵“Ɔma na amii Yerusalemƒuɔ lɛlɔ lɛdubo kɔnyana bɔbla? Ukyuli ɔdubuti ɔsia lɛlɔ na uye unu si dɛ na use-mii?

⁶Amii mina bekyuli bíni-mi na bɛ́gyu bɛ́tɔlɔ-mi kudɔ. Lɛ́ɛnɔ-mii kɔnyana bɔnu, anwuɔsu na ndubo-mii udu bɔyila

⁷na uwi ɔni na ndubo-mii bugyingya aani keti kani na ɔƒɛƒɛɛ uubó taavinku. Ndubo-mii kɔtu bɔni na kɔnyana kuƒie-mii na bikpi lɛnɔ ɔsika bíni bɛnii bɛɛɛdubo bunwini na ulu ɔni lɛlɔ na bɛsia.

⁸Bekpinele badubo bumomo na Yuda butulo kalɛ na ɛpu kɔnwinimi kuse na ɛpu kɔtu. Bekisine badubo-mii buyu bɔtu na bekpo-mii na ɔƒiiwi na bebi beni beteewulo bana bebi.

⁹Enu áƒɛ ubi uni ɔni na nwuna bebi maatɛ békpi na ɔƒɛ ɔɔdá-nwu momoomo, ɔsika kadi nwaa kani na ɔɔnu kénwini-nwu lɛdisa. Na ndubɔdu ukyuli biala ɔni nébu uli ngba. Ami Unwoti násu.”

¹⁰Si bɔwɔ na bátawɔ-mii muedi nka mɔɔyɔ́ ɔmmɔ teetulo ƒui! Lɛsɛ lɛkya ami ku ukyuli biala ntɛ na Yuda na nkya lɛbibo kemmo uwi ndi uwi. Neeevo sika ukyuli ɔdi kudɔ iye ami livo sika lite ukyuli ɔdi. Nsu ewida enwi pɛ kani, na ukyuli biala uuwida-mi.

¹¹Amu na Unwoti údie kenye ɔnini, “Líse kenye ka ndubo-ɔ bɔgyumana. Na si ɔgbankpi ɔdi ɔ́lɛ muedi ni, ƒula bekisine muedi badubo-ɔ buvele banii bunku-ma.

¹²“Kalɛ na bilakana lɛbuala lɛtondi ku ligyiedi lɛni na básala bɔƒɛ ni, lɛni kani na amii Yudaƒuɔ bɛɛɛdubo bɔkana bina bekisine bani ndubo bɔsi kalɔ kammɔ katɔ kakɛ bebekpo-mii lɛlɔ bɔdi.

¹³Ala ani ƒui na bibo ni, ndubɔƒɔ-nya lite-ma, ɔsika bɛ́bla alaekpidi na kalɔ kammɔ kesi kesii.

¹⁴Kɔnyi kɔni na líti lɛ́kya-mii kuse aani ogya ɔni na balakana bunine. Anwuɔsu ndubuti-mii lite bina bekisine na beti-mii benwini bana kabla bablane na kaƒɔ kalɔ lɛlɔ kesii kani na bɛɛɛgyi.”

¹⁵Unwoti, eenú kalɛ na bekyuli benye beedumi-mi taasia kama na awɔ ɔsu. Anwuɔsu takɛ kayi ku mina bekisine lɛni. Die bana ƒui kasi asa na bakɛ-mi badu.

¹⁶Uwi ɔni na átɛmiku-mi ni, ebiti áda-mi geen ka lɛbla lɛsiaku lɛni kani, ɔsika awɔ Unwoti Ɔyikune Ƒui ɔdi na ndi.

¹⁷Neeesie emeyi kadikɔ taatádi taaní ku lɛlɔyɔ. Mmomu ami lɛti kani muulie, ɔsika kɔnyi kɔni na ákɛ kɔdi-mi etila.

¹⁸Úbile ala mina lɛlɔ na ɔ́ya na kayi kaakpulu-mi uwi biala. Adubo bɔya na mina lɛnunsia lɛyii aani ketu kani mɔɔkwii si kaƒɛndi kédu na liwulu sɔɔn nkya?

¹⁹Mmɔ na Unwoti ɔ́su-mi ɔnini, “Da bɔtɛmi aani ɔdɔlɔdi lɛni ya! Si ƒula kasusu kénwini kébo-mi kudɔ na ákɔ mina litemi lɛsa ni, ndubɔya na asɔ ataabla mina kenye udiene kabla. Na mɔɔnu ulu ka Yudaƒuɔ baƒɔ kenye kani na aasu-ma. Nsu tabu anii baaadubo-ɔ butaayila na bataakya-a liƒu.

²⁰Ndubo bɔya na ayu ɔkplu aani kowodu kɔni na béti lɛbuala ligyiedi bátu bényene. Bebo likyulikpi na bebo kalala, nsu si bébo bebekpoku-ɔ ni,

²¹ndubunye-ɔ kudɔ na lɛgyumana-a, ɔsika mɔɔkya-a ɔyikun.”