Read Lelemi Yeremia 16 Bible Online

Yeremia 16 - Lelemi bible

Yeremia 16

¹Unwoti ɔ́su-mi ɔnini,

²“Yeremia, teti uleku na bɛwɔ bebi, ɔsika Yuda kalɔ lɛlɔ kaaadi kesii kani na bawɔ bebi bɔnyuɛ.

³Na lɛla lɛni ndubo bawɔne bammɔ ku bebi bammɔ bɔbla ni, ndubo-ɔ bɔsu.

⁴Ɔlɛ ukpidi ɔdubo-ma bubo na bekpi. Na kekpo kadubo-ma bukpo na kɔka kɔda-ma geen. Ukyuli biala ɔɔɔdubo bɔkya na ɔva-ma iye ɔbla-ma kekwa. Mmomu bana ɔlɔna ɔdubunwini adila ute baasɛ ku bebuo. Na lɛla lɛni mebu lɛdubunwini adila lɛkya kalɔ kammɔ lɛmwi.

⁵“Si ukyuli ɔdi úkpi ni, sɔ tesie anii atákya-ma kenye na ewuloku-ma kɔnyana. Nsɔ lɛɛɛdubo Yudaƒuɔ bɔyɔ iye lite-ma kusɛ kusɛ na nsɔ lɛɛɛdubo-ma kɔnyana lɛnɔ bɔnu.

⁶Balakɛne ku bawabane ƒui badubukpi bewi na ɔdi uláva-ma. Na ɔdi ulewulo-ma keku iye kɔnyana na ukulo lɛlɔ kesii kadi iye ukpeyi kuli.

⁷Ukyuli ɔdi uleti adila iye ntɛ bɔdi uleboku ulabasia kekwa bablane badi kɔnu na bana ɔti iye uni ɔdi kukpi kemmo.

⁸“Na kesii kani na bekyuli belie baadi iye baaní taakɛ ebiti adi ni, ƒula ɔgba utanya mmɔ.

⁹Bo Yudaƒuɔ ɔda kpakplaa se anii ami, Unwoti Ɔyikune Ƒui, ndubo bɔya na bana ebiti emeyi bɔdi ku uleku buti lɛlɔyɔ ƒui kenye kekulo.

¹⁰“Na badubuye banini, ‘Bi ɔsu na Unwoti ɔ́kya-bu ngba liƒu lɛni ku ɔgbankpi pii ɔmɛni udu? Likpidi iye lɛla lɛdi na bɔ́bla-nwu?’

¹¹“Mmɔ ni, na asu-ma anini, ‘Amii Yuda kadi bekyuli, bina bati kuuku bénwini kama bákya-mi na béni mina ɔda bubo ku mina ala ani na mɔɔtina-ma na bése kalɔ baakpá baƒiɔ.

¹²Na bɛ́bla ala ani na ásɔ ébie etulo amɛni! Bɛɛbla atuɔkplu kpakplakpa na ɔni na binu-mi litemi na bedi-ni lɛlɔ ni, ala ekpidi ani nébo-mii kasusu kani na bɛɛbla.

¹³Anwuɔsu ndubo-mii bɔbɔku butákya kalɔ kani kemmo na amii ku bina bati kuuku ƒui bɛɛɛgyi. Kesii kani na bɛdubutaakpa bina baƒiɔ lidu usien ku ɔƒɛ na naaakpete-mii na bina lɛla biala lɛsɔ lilékpoku-mi ina blii suɛ lɛnɔ.’

¹⁴“Uwi ɔdubo ɔni na bɛdubɔsɔ bibo bibakya-mi lili kalɔ, nsu bɛsɔ bilalɔ-mi bɛnii Ngba Ƒui Katɔti ɔni nédie Israel ɔ́lɛku Egyipte kalɔ lɛlɔ.

¹⁵Mmomu bɛdubɔlɔ-mi bɛnii Ngba Ƒui Katɔti ɔni nédie-bu ɔlɛku kalɔ kani na katɔ kakɛ kesii kani na lɛ́bɔku-mii ńtákya mmɔ bekyuli enu kemmo. Na ndubɔsɔku-mii liboku kalɔ kani na líte bina bati kuuku mɛni kemmo dii limeyi lɛdi.

¹⁶“Nsu ɔƒaani ni, ndubuti bekisine bani ndubo-mii buƒie limene-mii na beƒie-mii aani kɔbɛ na ketu na babwi-mii na badu-mii aani alakpi akɔ bebuo na abi eli ku atakpɛ libu kemmo.

¹⁷Mɔɔkana taanu lɛla biala lɛni na bɛɛbla ina dɛ na bɛnii bɛɛbɛla-mi bina ekpidi ani na bɛɛbla.

¹⁸Ndubo-mii kɔtu bɔni bɔsia kama kunyɔ kunyɔ na bina ekpidi ɔsu, ɔsika bɛ́ya na mina kalɔ kammɔ keesé lɛlɔ. Na bítágyu ala ani neeebo ngba bíbalɛ bɛnii baƒiɔ na si mɔɔnu-nya ni, buse na bese-mi aani bekpine.”

¹⁹Lɛ́kpali Katɔti lívele nnini, “Bula Ɔti, awɔ ndi ukyuli ɔni muute-mi ɔyikun na aagyumana-mi kpakplaa si líduo lɛbibo kemmo. Bekyuli badubɔsi ɔlɔgyu bebo-ɔ kudɔ na babasu-ɔ banini, ‘Bula bati kuuku bákpa baƒiɔ bani neeebo kɔsia kɔdi na balásu litemi geen lɛdi lɛnɔ,

²⁰baƒiɔ bekpludi bani na bekyuli béti enu bábla.’ ”

²¹Mmɔ na Unwoti údie kenye ɔnini, “Ɔmmɔ ɔsu geen na ndubo-ma lɛnunda bɔtina na banu kalɛ na mbo ɔyikun. Na badubɔnu bati ka sɔsɔ ni, ami ndi Katɔti geen ɔmmɔ.”