Read Lelemi Yeremia 20 Bible Online

Yeremia 20 - Lelemi bible

Yeremia 20

¹Amu na Immer ubidi Pasur ɔni ndi ɔkpane ku kakpakɔ bagyumanane unengu únu lɛla lɛni na lɛ́su mmɔ.

²Na ɔ́ya na bébo-mi kaduɛ na ɔ́ya na béƒie-mi na bebo-mi kɔgba bákya kakpakɔ ɔtɔ kemmo na kesii kani na baalɔ Benyamin ɔban kayakun.

³Kadi kegye uwi ɔni na Pasur ɔ́nyonu-mi na mɔɔtɔlɔ mmɔ ni, lɛ́su-nwu nnini, “Unwoti ɔnii, ‘Nsɔ lɛɛɛdubo-ɔ bɔlɔ nnii Pasur, mmomu ndubɔlɔ-ɔ nnii Uƒuluƒuluti.

⁴Liƒu kani ndubo-ɔ butaada na adubuti liƒu lɛmmɔ akya ƒula bekyuli lɛlɔ. Na adubɔnu kalɛ na bekisine badubo-ma bɔdu na kekpokɔ. Na ndubɔya na Babilon ɔga uƒie ukyuli biala na Yuda kalɔ lɛlɔ ɔtɔlɔku na binwini-nwu bekyuli beƒiedi na ɔdu badi.

⁵Na ɔdubugyingya lɛla biala na ubo-ni unwini na ɔga kesii egulabi kavumi kesekɔ mmɔ na uti lɛla biala na lɛ́ƒɔ kuye na mmɔ ɔtɔlɔku Yerusalem.

⁶Pasur, áƒiɔ-mi na uwi ɔni na enye aanyi ɔkɔ, nsu aasu taatina ka ami mina kenye na aasu bekyuli. Na ɔmmɔ ɔsu na ndubɔya na Babilonƒuɔ betiku-ɔ ku ƒula kaduli bekyuli ku bakpana ƒui batɔlɔku aani bekyuli beƒiedi besienku Babilon kalɔ lɛlɔ kesii kani na bɛdubo bukpi na bava-mii mmɔ.’ ”

⁷Unwoti átɔlɔ-mi na ábu-mi kɔdɔlɔ. Na ebo ɔyikun etulo-mi ɔsu ádi-mi lɛlɔ. Na bekyuli benye beedumi-mi uwi ndi uwi na baapii-mi.

⁸Ala bubile ku kukpi lɛsa kani na áya na mɔɔkɔ́ teete bekyuli bammɔ. Na ƒula kenye kani na mɔɔsu mmɔ káya na edumi ku lɛbibo kani na mɔɔsiáku uwi ƒui.

⁹Na ɔɔbla-mi uwi ɔdi aani nda ƒula lɛlɔ kasusu buti iye ƒula lɛnyi muedi bɔlɔ nnya. Nsu ƒula litemi lɛɛdu-mi lɛlɔ kemmo aani ogya na naaakana na libile kenye lɛsɔ lilie kpoo.

¹⁰Muunú ka bekyuli bammɔ baatɛmi kabɛnsɛ banini, “Ukyuli biala ɔɔyia na uwi ɔmɛni geen na ɔlɛka budie Yeremia bɔƒiɔ na bɔdu-nwu kɔtɔ!” Na bekyuli bani ƒui na mɔɔlɔ nnii mina bakpana ƒui benye kagyumana ka banu mina likpidi lɛdi na bakɛ kasiakɔ. Na baasu banini, “Ɔƒɛni kalɛ Yeremia ɔdubɔƒiɔ ɔbla lɛla lɛdi na ɔnu-bu kakpagyuɛ na bɔsia ɔmmɔ lɛlɔ bɔkɛ-nwu.”

¹¹Nsu ni, awɔ Unwoti, adi mina ukpone ɔyikune ɔni na enye-mi kama ɔsu ni, bekyuli bani mɔɔwia bakya-ma lɛsɛ mmɔ ƒui badubo bubuli na balakana-mi mmomu anumi adubuwi-ma kalɔ na beƒu na kɔƒa kukpo-ma uwi ƒui.

¹²Unwoti awɔ mɔɔkɔ́ku bekyuli bani mɔɔbla lɛbuni ƒui taanu na agyi ukyuli biala kayi ku kasusu kemmo ƒui. Lɛ́su-ɔ ala ani muukpóku-mi. Anwuɔsu ya na lɛnu kalɛ na adubudie mina bekisine kasi.

¹³Unwoti muudie lɛnu teemwi-ɔ, ɔsika awɔ muudie bekyuli bani na baanya taakya taalɛku balalane enu kemmo.

¹⁴Taya na kusɛ ɔsiaku limeyi lɛni néti-mi líboku kayawi. Na taya na kuse kusɛ ɔsiaku mina uni lɛnɔ!

¹⁵Na ɔnana ɔni nésie útásu mina ɔti ɔnini, “Mbo! Ákɛ ɔnanabi” ni, kusɛ kusɛ utasiaku-nwu.

¹⁶Ukyuli ɔmmɔ keyi kabla aani lɛma lɛni na ábwɛ na átanu-ni kɔnyana mmɔ. Na aya na uteenu kɔnu kenye ɔtanta biala ku kekpo kɔku na ɔƒiiwi.

¹⁷Ɔlɛka nka bukpi na anwu lɛnɔ ukpi na ɔni na úni na útadu-mi asa na lɛlɛ mbewi kalɔ banii ubi na báwɔ ɔsu. Nka mina uni kaƒɔ kemmo ndubunwini mina kaƒiɔtɔ.

¹⁸Bi geen ɔsu na ɔlɛka bawɔ-mi? Lɛbibo lɛmɛni kani ɔsu na likpi ku kɔƒa?