Read Lelemi Yeremia 22 Bible Online

Yeremia 22 - Lelemi bible

Yeremia 22

¹Unwoti ɔ́tala-mi na lísie Yuda ɔga kesii ńtátɛmiku ɔga ɔmmɔ ku nwuna benengu ku bekyuli bani ƒui nkya mmɔ.

³Na Unwoti ɔnii nsu-ma nnini, “Ami ndi Unwoti, anwuɔsu bise atu na binu! Amii ni, bitete kuƒi na bekyuli bataanya bekpinebi ku bekpinele taakya na beteeyu-ma. Na bitaya na bakɛ kasiakɔ na baƒɔ bani nkya-mii kudɔ lɛlɔ. Na bekyuli bani nátabla likpidi lɛdi iye baaakɛ ku lɛla lɛnɔ ni, bɛgyumana-ma na bitaya na bekyuli bata benye na bekpoku-ma iye badu-ma muedi. Muubó-mii ɔda nnii bɛbla ala ulu lɛlɔ, na bɛnu ka bɛɛtɛ etemila siin. Na bidie bani na bánu anumi bátɛ-ma etemila na ulu ukpidi lɛlɔ.

⁴“Na si bɛ́di mina etemila lɛlɔ ni, bekyuli badubɔsi Dawid ɔtɔ kemmo na belie ɔga kesii kamɛni bataadi lɛga uwi biala. Na baga bammɔ ku bana benengu badubo bapɔnkɔ lɛlɔ buteelie teesie teebo na bapɔnkɔ kɛɛkɛ kemmo uwi ndi uwi.

⁵Nsu si bíni na bɛnii bilénu-mi litemi bɔdi ni, na muusé-mii kenye ɔkɛnku mina lɛnyi lɛlɔ ka ndubɔya na babwɛ ɔma ɔmɛni kpɛtɛ kpɛtɛ bewi kalɔ.

⁶“Binu kasusu kani na lɛ́bla. Yuda ɔga kesii kammɔ keekeye aani Gilead iye Lebanon abi kangya eli katɔ katɔ ƒui. Nsu mmɔ kadubo buwi aani ɔma ɔni na ukyuli ɔdi uuubo si uwi ɔni na lɛ́wɔlɔ lɛla lɛni na nnii mɔɔblaku-nwu.

⁷Ndubɔya na bekpone bebo bababwɛ mmɔ ƒui na beti lɛtalagyii kpakplaa lɛni na básia awodu eli mmɔ ƒui benwini ekyweni bakya ogya bakyula.

⁸“Na kadi bamba bekyuli pii badubɔsia mmɔ na beye banini, ‘Bi ɔsu na Unwoti ɔ́bla lɛla bonwu lɛmɛni udu ku Yerusalem ɔma unengudi ɔmɛni?’

⁹Na babambadi badubudie kenye banini, ‘Baƒiɔ bamba bani na bekyuli bammɔ baakya lili kalɔ ɔsu.’ ”

¹⁰Unwoti ɔnini, “Bitewulo Ɔga Yosia ɔni nékpi kɔnyana iye keku. Mmomu biwulo ubidi Ɔga Yehoahas ɔni na béƒie bátɔlɔku bésienku kaƒɔ na ɔsɔ ɔɔɔdubo bunwini bubo.

¹¹“Ɔga Yehoahas ɔni lɛnɔ basɔ baalɔ Salum úbenwini ɔga na ɔti Ɔga Yehoiakim ɔni nékpi kenye. Nsu bébeƒie-nwu bátɔlɔku bésienku kaƒɔ. Na ɔƒaani ni, ami Unwoti líse kenye ka ɔdubukpi na mmɔ ɔni na ɔsɔ ulanu nwuna ɔma kudii.”

¹³Unwoti ɔnini, “Ɔga Yehoiakim, bɔbuɛ muute-ɔ awɔdi ɔ́sa! Átu ɔga kesii katu taasia lɛtɔ bonwu bonwu na lɛsia katɔ.

¹⁴Édie lɛƒansili bonwu bonwu na ákya kɔyakun kɔlɛmikɔ kɔmmɔ akya ku ligyii kpakplaa. Na ákwaa-ni ku ɔyikwaa kɔba kugyiedi. Nsu átabla ala siin étete batune ku kabla kammɔ bablane na aƒɔ-ma bana kayu.

¹⁵“Egyii kpakplaa buni pii ani na éti átu ƒula kaduli kammɔ kátaya na aƒɔ lɛnyi etulo ƒ'ɔti Yosia. Ɔsika anwu ɔ́bla lɛla biala ulu lɛlɔ siin úte bawabane na ɔɔsu litemi geen lɛmmɔ uwi ndi uwi.

¹⁶Na lɛla lɛni mɔɔtina geen ka ukyuli ɔgyi-mi na lɛdi mmɔ. Ɔmmɔ ɔsu na úlie ngba ku atu bɔyɔ na ubo ala na édu-nwu na ɔdi na ɔni lɛnɔ uwi biala.

¹⁷Nsu awɔ ƒula kasusu kani ndi kalɛ na abla na anya bekyuli akya iye akɛ-ma lɛlɔ kɔsia kɔdi iye adu bekyuli bani na bátabla-a lɛla lɛdi.

¹⁸“Yehoiakim, ukyuli biala ɔɔɔdubo buwulo na ƒula kukpi kalɔ. Na baaadubo bunwini na beye lɛlɔ muedi banini, ‘Bi ɔsu na ɔga ɔbune ɔmɛni úkpi?’

¹⁹Bɔva kani na badubo-ɔ aani kalɛ na ɔ́manku ebuo ala utine ɔni nékpi. Ɔsika bɔkpɛ na badubo ƒula ɔlɔna basiku ɔma kemmo balɛku ɔma ɔban kenye bebo batáva alakpi akɔ na kebu. Ami Unwoti násu.”

²⁰Unwoti ɔnini, “Amii Yerusalemƒuɔ, kadi bani bekyuli lɛlɔ na bíti anu bɛ́sia ni, bana lɛma na bábwɛ mɛni. Bisie Lebanon na bitéwulo kɔnyana na bisie Basan kalɔ lɛlɔ na Moabƒuɔ kalɛkɛ lɛlɔ bitéwulo keku.

²¹Uwi ɔni na ala adianku-mii ni, lɛ́lɛ-mii lɛ́nɔ na bítenu na bíni aani kalɛ kani na bɛ́bla ɔ́si uwi ɔni na bítalɛ tɔ lili.

²²Na ɔƒaani ni, kɔƒa kɔdubo-mii bukpo na bina ekpidi ɔsu. Na ɔƒɛƒɛɛ ɔdubo butiku bina batɔnkune batɔlɔku ƒui. Na kadi bani bekyuli lɛlɔ na bíti bina anu bɛ́sia ni, badubo-ma buƒie bɔtɔlɔku ƒui busienku kalɔ bamba na kaƒɔ.

²³Amii bani nli baga kesii kani na béti Lebanon egyii kpakplaa bábla lɛtalagyii na béti ligyii lɛmmɔ bákya kayakun kɔlɛmikɔ kɔmmɔ ƒui akya ni, bɛdubo buteedumo na biteewulo kɔnyana aani uleku ɔni ntɛ kɔwɔ.

²⁴“Ɔga Yekonia, Yudaƒuɔ Ɔga Yehoiakim ubidi, ina awɔ ndi kakwɛnimi kani nkya-mi kɔnu aani likposela úte mina lɛgadi ɔyikun muedi ni, ndubɔni-ka lidie mina kɔnu.

²⁵Na ndubuti-ɔ lɛkya Ɔga Nebukadnesar ku nwuna bekpone bani mɔɔwia-a badu na badi ƒula bekisine bani na aayia enu kemmo.

²⁶Awɔ ku ƒ'ini ƒui nka Yuda na báwɔ-mii, nsu ndubo-mii bɔbɔku butákya baƒɔ kalɔ lɛlɔ kesii kani na bɛdubusie bitékpi,

²⁷ina ka ɔma bubo bɔdubɔda-mii ɔkwɛ.

²⁸“Yekonia, ukyuli biala údie-ɔ atu na basɔ balayɔ-ɔ aani libui lɛni nábwɛ. Anwuɔsu awɔ ku ƒula bebi ƒui na badubo bɔbɔku butákya kalɔ kani na bɛɛɛgyi-ka lɛlɔ lɛla lɛdi lɛlɔ.

²⁹Na awɔ Yuda kalɔ kemodi kammɔ ƒui ni, se kɔtu na enu lɛla lɛni na ami Unwoti mɔɔsu!

³⁰Nine Yekonia ku nwuna bebi ƒui die bagadine ɔku ɔmmɔ kemmo, ɔsika anwu úse úbo kalɔ ƒui na útakana lɛla lɛla bɔbla. Anwuɔsu nwuna bebi ɔkɔ ɔdi biala uladi lɛga kudii. Ami Unwoti násu.”