Read Lelemi Yeremia 24 Bible Online

Yeremia 24 - Lelemi bible

Yeremia 24

¹Unwoti ɔ́tɛmiku-mi na kɔyu kemmo uwi na Babilonƒuɔ ɔga ɔni baalɔ Nebukadnesar úbo Yuda kalɔ lɛlɔ kama. Ɔga ɔmɛni úbo úbekpo na úƒie Yuda Ɔga Yehoiakim ubidi ɔni baalɔ Yekonia ku nwuna lɛku batine ku kabla bablane bani mbo kasusu geen ɔ́tɔlɔku úsienku Babilon kalɔ lɛlɔ. Na kɔyu kemmo ala bɔnu bɔmɛni kemmo ni, lɛ́nu kɔgyigyɛ inyɔ ku egyiibi tɛtɛɛtɛ ka alɛ Katɔti kakpakɔ kammɔ anumi.

²Na kagyigyɛ kenwi kemmo ni, egyiibi ani négyie kaduɛ na adia bɔdi néyi-ka kemmo. Na kanyɔdi aka ni, egyiibi ebudi ani naaadi bɔdi sɔɔn néyi-ka kemmo.

³Unwoti ɔ́kpali-mi úye ɔnini, “Yeremia, bi na aanu?” Amu na lɛ́su nnini, “Mɔɔnu egyiibi adi na adi adia bɔdi geen, nsu akladi anya ébun na aaadia bɔdi.”

⁴Amu na Unwoti ɔ́su-mi ɔnii nsu-ma nnini,

⁵“Yuda kadi bekyuli, egyiibi abuni ammɔ enye ete bina akɔ bekyuli babuni bani na lɛ́ya na béƒie bátɔlɔku bésienku Babilon kalɔ lɛlɔ.

⁶Na mmɔ na mɔɔnu-ma lɛlɔ. Na limeyi lɛdi ni, ndubɔsɔku-ma liboku kalɔ kamɛni lɛlɔ mbalɛ aani kugyii kalɛ na lɛɛɛdubo-ma bɔgyu budie. Ndubɔya na balɛ lili na naaada-ma neeewi kalɔ nnii bayii udu.

⁷Ndubuti mina lɛlɔ ebiti bɔkya-ma kayi kemmo na bati-mi na benwini mina kadi bekyuli. Na badubɔwia ka lɛbla bana Katɔti na benwini bebo-mi kudɔ ku bana kayi ƒui.

⁸“Na egyiibi ebudi akladi ni, enye ete Yuda ɔga ɔni baalɔ Sedekaia ku nwuna lɛku batine ku bakladi bani ƒui na béteƒie bátatɔlɔku bétesienku Babilon kalɔ lɛlɔ na báƒɔ lɛlɔ bakya mɛni iye bátɔlɔ bésie Egyipte kalɔ lɛlɔ.

⁹Ndubo bɔya na ɔgbankpi bonwu ɔdi ubo-ma lɛlɔ na liti lɛni-ma kɔtu. Na lɛlɔ litaatɔ ukyuli biala menu lɛla lɛmmɔ ku lɛlɔ bɔtɔ ku bɔyia geen. Na ndubo Yudaƒuɔ lɛlɔ bunye na batɔlɔ beteesie kalɔ bamba lɛlɔ na kaƒɔ kesii kani na badubo-ma buteeyuda na beteedumi-ma lɛlɔ.

¹⁰Kekpo ku kɔka ku lɛlɛ lidu lidu lɛdubo-ma lɛlɔ buti butédu ka bayii udu ƒui na kalɔ kani na líti líte ama ku bana bati kuuku ƒui lɛlɔ.”