Read Lelemi Yeremia 27 Bible Online

Yeremia 27 - Lelemi bible

Yeremia 27

¹Ka Sedekaia úbenwini Yudaƒuɔ ɔga uwi gyɔlɔɔ ɔdi na nwuna kama ƒui ni, Unwoti ɔ́kpali-mi ɔ́su-mi ɔnini, “Yeremia, bla bebuo kɔbuli kɔdi da ɔmantɛ bakɔ amɔ abalala ani beegúlu kalɔ mmɔ na eti abala awɔ ɔlati ƒula limɔ.

³Ɔmmɔ kama na akya Edom ku Moab ku Amon ku Tiro ku Sidom baga ɔtu. Kɔlɔ kɔmɛni benengu bakya Yerusalem baabla kelisa kadi ku Ɔga Sedekaia.

⁴Anwuɔsu sia-ma lɛlɔ na ama bete bana kɔlɔ baga bɔti anii ami ndi Israel Katɔti Unwoti Ɔyikune Ƒui.

⁵Na ami nédie kalɔ ku kana bekyuli ku bebuo bammɔ ƒui ɔkɛnku mina ɔyikun lɛlɔ. Na ami mɔɔtina ukyuli ɔni madi kalɔ kammɔ lɛlɔ.

⁶Na ami náƒuna mina kabla ɔblane Ɔga Nebukadnesar ka ɔdi kadi bekyuli kɔlɔ kɔmmɔ ƒui lɛlɔ ku amii kadi lɛnɔ. Na ndubo bɔya na ɔdi lɛku kemmo bebuo bammɔ ƒui lɛnɔ lɛlɔ. Na kadi bekyuli ƒui badubunwini kabla bablane bete Ɔga Nebukadnesar ku ubibidi ku nwuna uwɔ lɛnɔ útédu uwi ɔni na bana uwi wedu na kadi bamba baga basala lɛlɔ na bakɛ ɔyikun na badi Babilon kalɔ lɛlɔ na ama lɛnɔ benwini bana kabla bablane.

⁸“Limɔ abalala amɛni enye ete Ɔga Nebukadnesar ɔyikun ɔni na ɔdubo bɔkɛ. Na ndubɔyila kalɔ kani bekyuli naaadubo-nwu litemi bunu. Ɔga Nebukadnesar ɔdubo-ma bukpo na ɔdu bekyuli pii iye kɔka ku ɔlɛ ɔdu-ma.

⁹Ɔƒɛni kalɛ bibo bekyuli badi na bina lɛga kɔdikɔ bani mɔɔsu ka ama baanu taati ala ani ndububo abalɛ na bana evo ɔsu iye ka baakpali bekpine iye beegyé ana adi iye baƒiɔ badi baatɛmiku-ma ɔsu. Nsu si bana ɔdi ɔɔsu-mii ɔnii bitenu Nebukadnesar litemi ni, bitakpete-ma.

¹⁰Ɔsika si bínu bana ɔkɔ etemila ammɔ udu ni, ndubɔya na bakpɛ-mii kalɔ batɔlɔku bina kalɔ lɛlɔ besienku ɔgyu kaaka na batádu-mii na mmɔ.

¹¹Nsu si amii ku bina kadi bekyuli bɛdubunu kalɔ na binu Ɔga Nebukadnesar litemi ni, ndubɔya na bɛsɔ bɛkya bina kalɔ na bina kadi bekyuli bataatuma ama alati bana mmo.”

¹²Kama ɔni na lɛ́tɛmiku benengu bani nási amadɔ mmɔ lɛ́wɔlɔ ni, lɛ́tɔlɔ lísie Ɔga Sedekaia kudɔ na ńtásɔku lɛla lɛmmɔ kani lɛ́su-nwu anwu lɛnɔ nnini, “Sedekaia, si awɔ ku Yudaƒuɔ ƒui bɛɛwia ka bilie ngba ni, binu Ɔga Nebukadnesar ku Babilonƒuɔ litemi.

¹³Nsu si bíni bɔdi ni, na awɔ ku ƒula kadi bekyuli ƒui bɛdubo bukpi na kekpokɔ na kɔka lɛnɔ kɔdu-mii ku lɛlɛ lidu lidu ƒui kalɛ kani na Unwoti úte-mii bɔti úse.

¹⁴Bina kenye bediene básu-mii banii utalɛka binu Nebukadnesar litemi, nsu bitenu bana ɔkɔ ala kenye budie bɔmmɔ.

¹⁵Kenye bediene bammɔ baatina ka Unwoti nátala-ma na anwu nwuna etemila kenye na beedie, nsu Unwoti útatala-ma. Ɔkɔ na baanyi! Anwuɔsu si bínu-ma kenye kammɔ ni, ndubɔya na bani amii ku-ma ƒui batɔlɔku besienku kaƒɔ kalɔ ɔgyu kakaaka na badu-mii. Unwoti násu.”

¹⁶Uwi ɔni na lɛ́wɔlɔ ɔga ɔmmɔ bɔtɛmiku ni, lɛ́tɔlɔ mmɔ lísie bakpane bammɔ lɛnɔ kudɔ na ńtásu-ma ka Unwoti ɔnini, “Bitenu kenye bediene bammɔ ala ani kenye na beedie taasu-mii banii uwi ɔsɔ uletu asa na Babilonƒuɔ badubo ala ani na béti bátɔlɔku mina kakpakɔ mmɔ bɔnyonu bute-mii. Ɔkɔ na baanyi!

¹⁷Na si bɛ́tunaku lɛlɔ ka binu Babilonƒuɔ ɔga litemi ni, bɛdubɔkɛ bina ngba bilie. Nsu si kenye bediene bammɔ mmomu litemi na bíti bɔdi ni, ɔma unengudi ɔmmɔ ƒui ɔdubunwini kebu alakpi litili bonwu.

¹⁸Ɔsika si ami geen nátɛmiku-ma nka ɔlɛka bati lɛla lɛni na lɛ́lɛ ugyii ka ndubo bɔbla. Na bataakpali-mi teevele kalɛ na lɛya na Babilonƒuɔ basɔ beleti lɛla lɛdi balálɛku mina kakpakɔ iye ɔga kesii ku Yerusalem ɔma ƒui kemmo.

¹⁹“Na ala ani ƒui nálɛ na uwi ɔni na Nebukadnesar úƒie Yuda Ɔga Yehoiakim ubidi Yekonia ɔ́tɔlɔku úsienku Babilon kalɔ lɛlɔ ni, Nebukadnesar úteti lɛla lɛni na lɛ́ƒɔ kuye lɛdi útatɔlɔku Yerusalem. Ɔ́nyonu abuala egyiedi akpa ku abuala egyiedi akyami bonwu ani baalɔ banii ɛpu mmɔ béwi. Na báda abuala egyiedi ligyii ala kɔsiakɔ kɔni nse kakpakɔ mmɔ ƒui úse ku ala bamba pii ani na áƒɔ kuye mmɔ lɛnɔ úse ɔga kesii ku Yerusalem ɔma umodi ɔmmɔ kemmo. Nsu ɔƒaani ni, ami Unwoti Ɔyikune Ƒui, Israel Katɔti, mɔɔsu nnii ala amɛni ƒui ni,

²²badubo-nya buti bɔtɔlɔku busienku Babilon kalɔ lɛlɔ. Ami Unwoti násu.”