Read Lelemi Yeremia 28 Bible Online

Yeremia 28 - Lelemi bible

Yeremia 28

¹Lɛkwa linedi kuna kɔbuli kɔlɔndi kemmo ka Sedekaia ɔɔdi lɛga ni, Asur ubidi Hanania ɔni ndi kenye udiene na ɔ́si Gibeon úbo-mi kudɔ na Katɔti kakpakɔ na úbasu kenye kadi lɛbo lɛni na bakpane ku bekyuli bamba ƒui benye beenú.

²Na ɔ́su-mi ka Unwoti násu ɔnini, “Ami ndi Unwoti Ɔyikune Ƒui, Israel Katɔti, na ndubo lɛbibo etila ani na Nebukadnesar ɔ́ya na ada kadi bekyuli ammɔ mmɔ aani kɔgba kalɛ na uti-ma unwini nwuna kabla bablane bɔƒɛ budie-ma lɛlɔ.

³Na lɛya na basɔku ala ani na béti básiku Yerusalem bátɔlɔku bésienku Babilon kalɔ lɛlɔ beboku na akwa anyɔ kemmo.

⁴Na Ɔga Yekonia ku bekyuli bani ƒui na béƒie bátɔlɔku lɛnɔ badubo-ma bɔnyonu na benwini bebo. Na ala amɛni ƒui adubɔlɛ lɛni, ɔsika ndububile Babilonƒuɔ ɔga ɔyikun ɔni na ubo na bayii udu!”

⁵Na bakpane ku bekyuli bammɔ ƒui bamu benye mmɔ uwi ɔmmɔ asa na lɛ́su nnini,

⁶“Hanania, nka ɔdi-mi lɛnunsia ka Unwoti ɔbla lɛla lɛni na ásu mɛni lɛni kani. Na ɔya na basɔku lɛla biala na béti kakpakɔ mɛni bátɔlɔku beboku na bekyuli bani na béƒie lɛnɔ benwini bebo ɔma.

⁷Nsu ya na linyimene awɔ ku bekyuli bani nnye mɛni ƒui nnii,

⁸kuuku uwi ɔni návi asa na badubɔwɔ ami ku-ɔ ni, kenye bediene ƒui baasu taatina ka lɛga kɔdikɔ kunengudi kɔni mbo ɔyiku bonwu ƒui badubo-ku bɔbwɛ na kekpo ku ɔgbankpi bamba lidu ku lɛlɛ ɔsu.

⁹Na ɔƒaani awɔ aasu ka bɔdubɔkɛ keyii buɛɛ. Anwuɔsu bunye na bɔdubunye butaanu ulu si sɔsɔ na Unwoti násu kenye kamɛni.”

¹⁰Amu na Hanania ɔ́ni ligyii kɔgba kɔni nda-mi limɔ mmɔ údie na úbo-ku ɔ́ƒɛ.

¹¹Na ɔ́su ɔnini, “Unwoti ɔnii ulu ɔmɛni lɛlɔ na ndubo Nebukadnesar ɔyikun ɔni na ɔda ɔɔdi kadi bekyuli lɛlɔ udu bɔyila. Na ɔɔɔdubo akwa anyɔ budu bɔwɔlɔ asa na webo-nwu kemmo lɛni.” Amu na Yeremia ɔ́vi ɔ́lɛ kakpakɔ mmɔ.

¹²Na uwi klukui ɔdi kama ni, Unwoti ɔ́su-nwu ɔnini,

¹³“Sɔ nwini sie na atásu Hanania kenye kadi nnii ami ndi Unwoti Ɔyikune Ƒui, Israel Katɔti. Áƒɛ ligyii kɔgba, nsu ndubɔsɔku abuala kɔdi lɛkya kadi bekyuli ƒui ɔkuɛ. Na ɔlɛka babla lɛla lɛni na Ɔga Nebukadnesar ɔ́su-ma. Na ndubɔya na ɔdi lɛku kemmo bebuo ƒui lɛnɔ lɛlɔ.

¹⁵Na ńtatala awɔ Hanania uwi ɔdi nnii tédie-mi litemi lɛdi kenye. Nsu éesie átábla kenyemini na átɔlɔ mina bekyuli na báƒɔ-ɔ ɔkɔ kenye budie bádi na baata teenye-mi lɛlɔ. Anwuɔsu ndubɔda-a lidie kalɔ kammɔ lɛlɔ ƒui kula kula na ekpi asa na lɛkwa lɛmɛni lɛsa.”

¹⁷Abuli anyɔ kama ni, Hanania úkpi.