Read Lelemi Yeremia 29 Bible Online

Yeremia 29 - Lelemi bible

Yeremia 29

¹Bébu ami bákya Yerusalem uwi ɔni na Ɔga Nebukadnesar úƒie Ɔga Yekonia ku Yerusalemƒuɔ ku Yudaƒuɔ ɔ́tɔlɔku úsienku Babilon kalɔ lɛlɔ. Na úƒie Yekonia uni ku nwuna bakutine ku ala bakywɛne bani na ala lidu lidu bɔbla bɔ́ma-ma enu geen bátɔlɔku. Ɔmɛni ɔsu línweni ɔku ɔdi límene bula kenye bediene ku bakpane ku bula batɔnkune ku Yerusalemƒuɔ bakladi ƒui bani nkya Babilon mmɔ.

³Na líti ɔku ɔmmɔ líte Saƒan ubidi ɔnanabi ɔni baalɔ Elasa ku Hilkia ubidi ɔnanabi ɔni baalɔ banii Gemaria. Nkyuli inyɔ bamɛni na Yudaƒuɔ Ɔga Sedekia ɔ́tala ɔnii besie Babilon na batátɛmiku Nebukadnesar. Na ɔku ɔmmɔ ɔdanku kenye kadi ka,

⁴Unwoti Ɔyikune Ƒui, Israel Katɔti, ɔnini, “Lɛ́ya na béti-mii bátɔlɔku Yerusalem bésienku Babilon kalɔ lɛlɔ. Na ɔƒaani ni, mɔɔsu-mii nnii

⁵bilie mmɔ na bɛtu lɛtɔ na bisie mmo na bɛdi lɛla lɛni bɛ́tuma na mmo bɔmmɔ kemmo.

⁶Biti lɛlɔ na bɛwɔ na bɛwia beleku ku bagya bite bina bebi kalɛ na ama lɛnɔ bawɔ. Ɔsika naaawia ka bɛsa mmomu kalɛ na bimomo.

⁷“Bɛkpali katɔ ka keyi kayɔku Babilon mmɔ, na bɛda bina kabla kaduɛ kalɛ na káyu. Ɔsika si ala átɛku bekyuli na kalɔ kammɔ kemmo ni, lɛlɔ lɛdubɔyɔku-mii na mmɔ lɛnɔ.

⁸“Bina bekyuli badi bakya Babilon mmɔ na badi like bebone na bɛ́ɛsu-ma ka bebo like na basu-mii lɛla lɛni ndubo libalɛ uwi ɔni mebo kemmo. Nsu bɔkpanku kani na badubo-mii bɔkpanku butáyila. Na bina kenye bediene bammɔ lɛnɔ ni, bitaya na bese-mii lisusu. Ɔsika ina ka beedie ala kenye teete-mii na mina lɛnyi kemmo ni, ɔkɔ banyine na badi ɔsiku ńtasu-ma lɛla lɛdi.

¹⁰“Na si uwi ɔni na Babilonƒuɔ bábla bana ɔyikun ala ka badi betulone na kadi bekyuli ƒui ɔsu báwɔlɔ akwa liti ku aavlanyɔ kama ni, ndubɔbla-mii lɛƒɔndia na lɛya na bɛsɔ binwini bibo Yerusalem kalɛ kani na líse-mii kenye líse.

¹¹Lɛ́lɛ ugyii ka ndubute-mii kusɛ kusɛ bitaasia ala abuni anu na bina ngba bɔni na bɛdubulie uwi ɔni mebo kemmo ƒui na ala adianku-mii, na lɛbibo lɛdi lɛsɔ lilebo-mii lɛlɔ.

¹²Na bɛdubo bunwini kama bubo-mi kudɔ na bivele-mi bɛnii mbunku-mii na ndubunu-mii bɔkpali biala na lɛbla lɛla lɛni na bɛɛwia lite-mii.

¹³Bɛdubɔkya-mi lili kalɔ bɛkpa-mi ku bina kayi ƒui. Na ami lɛnɔ ndubɔsiaku-mii.

¹⁴Bina bɔkpa bɔdubɔyɔ-mi kaƒɔ, na ndubɔsala-mii ƒui lɛsiku lɛkɔkɔ lɛni kemmo na bɛkya na kadi bekyuli bani akɔ na lɛ́bɔku-mii ńtákya lɛsɔku liboku Yerusalem.

¹⁵“Bɛɛnu bɛnii bilie kpli na lɛla lɛdi lɛɛɛda-mii, ɔsika bɛɛkali bɛnii ami néti kenye bediene badi límene-mi kalɛ na bebedie-mi kenye na Babilon mmɔ.

¹⁶“Nsu ni, ɔ́si kukuuku ni, mɔɔtala kenye bediene na Yudaƒuɔ akɔ ku Dawidi ɔtɔ kemmo ɔga ɔni na uli liboku ku Yerusalem ku Yuda bekyuli ƒui, nsu béni na belenu-mi litemi. Anwuɔsu ami Unwoti Ɔyikune Ƒui ndubo bɔya na kekpo ku kɔka ku lɛlɔ lidu lidu liteekpoku-ma wetédu uwi ɔni na báyii udu aani egyiibi ani nébu ewi kalɔ. Ndubo-ma lɛlɔ bunye na lɛbɔku-ma lɛlɛku kalɔ kammɔ kemmo na kadi bekyuli bani manu-ma ƒui bana lɛlɔ lɛdubɔbɔ-ma na liƒu bonwu lɛnɔ lɛda-ma lɛnɔ na lɛla lɛni ndubɔlɛku-ma ɔsu. Na badubo-ma budumi na bama-ma lɛnɔ. Na badubo bekyuli buwida basu banii ɔdubɔlɛku-ɔ aani Yerusalem ku Yuda. “Na sɔsɔ béni na belenu-mi litemi.

²⁰“Lɛ́ya na bákpanku-mii bátɔlɔku Yerusalem bésienku Babilon kalɔ lɛlɔ na si bɛ́vumana na biinú-mi mmomu ɔ́si ɔƒɛni ni, ɔdia-mii utulo.

²¹Bɛɛkali ka Kolia ubidi Ahab ku Manase ubidi Sedekia badi-mi kenye bediene ka baasu ka ami mina kenye na beedie ɔsu. Nsu ɔkɔ na baanyi! Ńtasu-ma lɛla lɛdi. Na benye baabla ekpidi bonwu bonwu abambadi adi aani bana bakpana beleku bɔtɛnku. Anwuɔsu ndubo-ma budie bute Ɔga Nebukadnesar ɔni ndubo-ma bɔdu na bakladi benye bataanu. Na si uwi ɔdi úbebo na ɔdi uuwida ɔdi ni, na basu banini, ‘Unwoti ɔkyula-a aani kalɛ na Babilonƒuɔ ɔga ɔ́kyula Ahab ku Sedekia!’ ”

²⁴Unwoti Ɔyikune Ƒui, Israel Katɔti, ɔ́su-mi lɛla lɛni ndubo Semaia ɔni nási ɔma ɔni baalɔ Nehelam bɔbla. Anwu lɛnɔ ɔdi bula kadi bekyuli akɔ unwi na ɔ́kya Babilon mmɔ. Na uwi ɔni na mina ɔku útuku-ma lɛkɔkɔ na Babilon mmɔ ni, Semaia ɔmɛni únweni ɔku úmene Yerusalemƒuɔ ku Ɔkpane Seƒania ɔni na ɔdi Manase ubidi úbunku bakpane bamba lɛnɔ. Na ɔku ɔmmɔ kenye kaatina ɔnini,

²⁶“Na ɔkpane Yehoiada kukpi kama ni, Unwoti ɔ́ƒuna-a aani ɔkpane ɔni ndubo nwuna kakpakɔ bagyumanane lɛlɔ butaanu. Na agyi lɛnɔ ka si ukyuli ɔdi úbo ɔɔbla libuokpi ala na ɔɔtina lɛlɔ ka Katɔti kenye udiene na ɔdi ni, ɔlɛka beƒie ukyuli ɔmmɔ na bebo-nwu kɔgba.

²⁷Na Yeremia ɔni nási Anatos ɔma kemmo ɔkya ɔɔbla udu ɔdi na ɔɔtina lɛlɔ na Yerusalem mmɔ aani kenye udiene ɔdi. Na lɛɛɛgyi lɛla lɛni ɔsu na átakana tɔ na ani-nwu kɔtu kɔdi.

²⁸Únweni ɔku ɔdi muedi úmene bula kadi bekyuli bani na bɔkya Babilon mɛni na ɔɔsu ka bɔdubo mɛni bɔkya na uwi utu. Na ɔɔsu-bu ku bɔsu ɔnii bɔtu lɛtɔ na busie mmo bɔni kemmo na bɔdubo bula lɛdila butaakɛ.”

²⁹Uwi ɔni na Seƒania ɔ́ƒɔ Semaia ɔkɔ ɔmɛni ni, ɔ́ka-nwu úte-mi.

³⁰Na Unwoti ɔ́su-mi lɛla lɛni na linweni na mina ɔku unyɔdi kemmo

³¹liti lite Yuda kadi bekyuli bani na béƒie bátɔlɔku bésienku Babilon. Na ɔku ɔmɛni kemmo ni, línweni ka Unwoti ɔnini, “Ami Unwoti ńtaƒuna Semaia ka unwini mina kenye bediene akɔ ɔdi. Na ɔ́kpanku-mii útáyila na nwuna ɔkɔ ala ani na ɔɔsu ɔsu ɔnii mina kenye na uudie.

³²Na ala ani na ɔ́ɔsu-mii bɔsu bɔsu ɔsu bínwini batuɔkplune na bɛsɔ bilenu-mi litemi. Anwuɔsu ndubo-nwu kɔtu bɔni geen na anwu ku nwuna bawɔ ɔdi biala ɔɔɔdubo ngba bulie bɔnu lɛbuni lɛni na ndubo bɔbla bute mina kadi bekyuli.”