Read Lelemi Yeremia 3 Bible Online

Yeremia 3 - Lelemi bible

Yeremia 3

¹“Si ɔnana ɔdi ɔ́nyonu ulekudi na uleku ɔmmɔ úsie útélie kɔgya bamba ni, buti na ɔgyani udeedi ɔmmɔ ɔdubɔsɔ ɔkana-nwu buti? Oowo, ɔsika ɔmmɔ ɔdububile kalɔ kammɔ. Nsu bise aani bayalɛ na bibo basɔnɔ bayɔne pii na bɔlɛ na ɔ́lɛ ka bɛsɔ binwini bibo-mi kudɔ ɔƒɛni amu? Lɛni na Unwoti ɔ́su.

²“Bɛkya ɔkplu na bɛtina kɔbi kɔnii lili na bítesie tɔ bítatákpa tɔ baƒiɔ badi na bɛtɛ lɛlɔ kudɔ ɔnana ku uleku kalɛ na mmɔ? Biinye ulu amadɔ taakywɛ bekyuli bani na biti lɛlɔ bite, na bɛbla bina lɛsɔnɔdi ala aani beyune bani mɔɔbɛ́ teenye kuludɔ taatu bekyuli. Ekpidi ani udu na bɛɛlɛ́-mi kama taabla úubile kalɔ kemodi kammɔ ƒui.

³Anwuɔsu na ami Unwoti lítile kayaa na ketudi ɔnantu úbulo bɔna bute-mii. Nsu ɔmɛni ƒui muedi kɔƒa kulekpo-mii na bina ɔbladu ɔsu aani kalɛ na kɔƒa kulekpo ɔyalɛ na nwuna lɛsɔnɔdi ablala lɛlɔ.

⁴Bɛɛlɔ-mi bina ɔti na bɛɛtina ka ɔ́si bina lɛnamu uwi ƒui na bɛɛyɔ́-mi.

⁵Na biivele-mi bɛnii nda kɔnyi buti taakya-mi lɛya, nsu bíni bɛnii bilada bina ekpidi anya bɔbla biláya.”

⁶Uwi ɔni na Yosaia ɔdi ɔga ni, Unwoti ɔ́su ɔnini, “Yeremia, Israel lɛga kadikɔ ƒui káta kénye-mi lɛlɔ aani uleku utidi ɔni nálɛ ɔgyani kama na únwini ɔyalɛ na ɔkɛ abi ƒui eli ku egyii enengudi ɔyuli kalɔ ɔɔtɛ taavi.

⁷Lɛ́nu ɔmɛni lɛ́ti ka Israel lɛga kadikɔ kammɔ ƒui bálɛ-mi kama na bábla ekpidi pii, nsu ina amu mina anu asia ka badubunwini na bana ɔbladu buɛ kama bebo-mi kudɔ na bébulo, anwuɔsu ami lɛnɔ lɛ́nyonu-nwu na lídie-nwu ulu na ɔ́lɛ-mi kesii. “Na ɔnwani ulekubi Yuda lɛnɔ ɔ́nu ɔmɛni, nsu útabla-nwu lɛla lɛdi iye ukpoku-nwu muedi. Mmomu mɔɔnu ka anwu lɛnɔ úse kalɔ uulie ngba bukpidi bɔmɛni na ɔɔlɛ́-mi kama.

⁹Útekpoku Yuda lɛga kadikɔ munu munu ka úti lɛlɔ únwini ɔyalɛ. Na úbile lɛlɔ ku kalɔ kammɔ ƒui, na beesé lɛlɔ na lɛƒiɔkpa kpakplaa lɛni kemmo na béti lɛlɔ bákya na baakpá atabi ku egyii ɔsu.

¹⁰Na ɔni násɔ úbie útulo ƒui ndi ɔni na Yuda ɔ́nyi ɔkɔ ɔ́bla lɛlɔ aani si bunwini na ɔ́sɔ únwini úbo-mi kudɔ.

¹¹“Ɛbɔ Israel kadi bekyuli ɔdi, ɔsika ama básɔ bátanyi ɔkɔ bamba ɔdi banii beesé-mi lisusu lɛdi.

¹²Yeremia, nwini kenye sienku kalɔ kammɔ katɔ kakɛ na ebo kudu momoomo anini, ‘Israel, ami ndi bina Unwoti binwini bibo-mi kudɔ! Bɛ́lɛ-mi kama na bɛkya-mi kɔnyi geen. Nsu mɔɔnu kɔnyana ɔsu ni, ndubuti lɛkyiɛ-mii.

¹³Bɛtuna ka bɛ́ta bínye-mi lɛlɔ, na bɛkpa baƒiɔ bamba na egyii enengudi ƒui kalɔ na kesi kesii.

¹⁴“ ‘Bɛdi bebi bani naaasiaku-mi kama siin, nsu ami mbo-mii. Binwini bibo ɔma! Ndubuti bina akɔ unwi iye inyɔ bɔsiku bina lɛma ɔdi biala kemmo ku adua ammɔ kemmo buboku Sion.

¹⁵Na ndubɔƒuna batɔnkune bani náda anu na baabu-mii lite-mii na banu-mii lɛlɔ aani baƒonu badane babuni kalɛ.

¹⁶Bɛdubo bɔwɔ na bimomo na ɔ́sɔ útalɛka bitaakali Bunyimi Adaka ɔmmɔ lɛnɔ iye bɛsu bɛnii bɛɛnwí ɔwɔdi ɔdi.

¹⁷Yerusalem ɔma ɔmmɔ ɔdubunwini mina lɛga kadikɔ liboku lɛni lɛlɔ na nlie. Na kadi bekyuli ƒui badubo-mi butaabu. Na basɔ balasiaku bana likyulikpi ɔbladu ɔni na bana kɔyi kɔɔtina-ma kama.

¹⁸Na Yudaƒuɔ ku Israelƒuɔ badubɔsɔ basala babla unwi na kalɔ kani lɛlɔ na bésie bakya na katɔ kakɛ mmɔ. Na basiaku lɛlɔ benwini bebo kalɔ kani líti líte bana bati kuuku mmɔ lɛlɔ.’

¹⁹“Ami ɔlati násu nnini, ‘Lɛ́yɔ ka lɛbla-mii mina bebi na lite-mii kalɔ kabunidikɔ ƒui kani mɔɔdia bɔnu teetulo na kalɔ kammɔ ƒui lɛlɔ.’ Na lɛ́yɔ ka bɛnu-mi bɛti na bɛlɔ-mii bɛnii Ati, na bɛsɔ bilatɔlɔ-mi kudɔ.

²⁰Nsu bɛ́bla lɛlɔ aani uleku utidi ɔni néni lɛla lɛni na únyimi ku ɔgyani na anwu ku-nwu békulo. Ami Unwoti násu ka bɛ́lɛ-mi kama.”

²¹Unwoti ɔnini, “Binu lɛsɛ lɛni nda na abi ammɔ eli! Israelƒuɔ na badi na muuwulo taakpali-mii banii nnu-ma bɔkpali. Báyiƒala-mi na béti ulu ukpidi.

²²“Ndubo-ma bɔsu nnini, ‘Binwini bibo na lɛbwi-mii, na kalɛ na bɛ́lɛ-mii kama ɔsu.’ “Na mmɔ na badubɔsu banini, ‘Bɔdubunwini bubo, ɔsika awɔ ndi Unwoti bula Katɔti.

²³Bɔ́kpa baƒiɔ na abi ammɔ eli ku kɔvanu momoomo, nsu ɔmmɔ ƒui ukpludi na ɔdi, ɔsika awɔ lɛti kani ndubɔkana ka aƒɔ-bu ngba.

²⁴Na ɔ́si bula bati kuuku uwi ɔni na bɔmu bɔdi banamu ni, Baal baƒiɔ bani na bɔ́kpa na ɔdi kɔƒa ala bɔbla áya na bula edula áyii udu ku bebuo ku bebi bananabi ku belekubi ƒui.

²⁵Bɔ́ta búnye-ɔ lɛlɔ aani bula bati kuuku kalɛ kani. Na bula alaekpidi eekpó-bu kɔƒa.’ ”