Read Lelemi Yeremia 30 Bible Online

Yeremia 30 - Lelemi bible

Yeremia 30

¹Unwoti, Israel Katɔti, ɔ́su-mi ɔnini, “Yeremia, ti kugyii akpa ɔku kakunkɛ iye bebuo ɔku kakunkɛ ɔni lɛlɔ na beenweni ala taasia na enweni ala ani ƒui na lɛ́su-ɔ asia-nwu lɛlɔ.

³Limeyi lɛdi lɛdubo na ndubɔya na Israel ku Yuda ƒui basɔ babasala na kalɔ kani na líti líte bana bati kuuku mmɔ lɛlɔ.”

⁴Unwoti ɔ́tala-mi ɔ́kya Israelƒuɔ ku Yudaƒuɔ ɔnini, “Ami Unwoti muunú kɔvanu kɔni ndanku ayiala na ɔɔɔdi keyi buɛɛ kɔvanu.

⁶Bɔkana na banana badubɔkana na bawɔ? Na bi ɔsu na mɔɔnu-ma ƒuƒuu lɛni na bada bana nƒɔ beesusu ani beleku bani na kawɔƒɔ kaadu?

⁷Mina kadi bekyuli, blii kani nébu na bɛdubo abi bubo geen butulo ala ani náalɛku-mii ábavi. Nsu ndubo-mii budie ƒui.

⁸“Ɔƒaani ni, bɛdi bekyuli bani mɔɔbla kadi bamba bekyuli kabla. Nsu ndubo ala nda-mii mmɔ ƒui bɔƒɛ budie-mii lɛlɔ. Na ndubɔƒɛ katuma kɔgba kɔni nda-mii mmɔ ɔsu na binye bɛɛbla bekyuli bamba kabla budie-mii lɛlɔ.

⁹Na ɔmmɔ kama na binwini mina kabla bablane na lɛƒuna ɔga lite-mii lɛsiku Dawid ɔtɔ kemmo.

¹⁰“Amii, mina bekyuli bani nkya katɔ ku kada ƒui, bɛsɔ bitayia. Ami ɔdi na bɛdi bɛ́manku ka lɛni-mii kɔtu, anwuɔsu na lígyingya-mii lɛ́kya kadi bamba bekyuli akɔ na ɔlɔgyu kakaaka. Nsu nsiaku-mii na ndubɔyila kadi bamba bakyuli bammɔ udu.

¹¹Na ndubɔsɔku-mii ku bina bawɔ liboku bina kalɔ kani lɛlɔ na mɔɔgyumana-mii na mɔɔnu-mii lɛlɔ na mɔɔyá na keyi kaayɔ́ku-mii lɛlɔ. Na liƒu biala lɛsɔ lilakya-mii kemmo. Ami Unwoti násu.”

¹²Unwoti ɔnini, “Mina kadi bekyuli, bɛ́ƒɔ ɔlɛ na bɛɛyɔ́ bikpi.

¹³Bádu-mii likpidi bonwu lɛdi kɔtɔ na ukyuli ɔdi uuubo ukpo ute-mii. Na alɛbi lɛnɔ áƒɔ-mii lɛlɔ kesii biala ɔni na kuvo kɔdi kuuubo na kɔbwi-mii.

¹⁴Na bina bakpana lɛnɔ báyiƒala-mii na basɔ baaadaku-mii lɛda lɛnɔ. Na ami muedi mina ɔbladu ɔ́tina ka línwini-mii ukisine. Na ka bina ekpidi ébomo na emomo ɔsu ni, ndubo-mii ulikplu bɔbla si mɔɔní-mii kɔtu.

¹⁵Anwuɔsu ɔdia-mii utulo ka bíbile kenye kpoo na bɛ́sɔ bítewulo bɛnii ɔdi ubaƒɔ-mii na bina ɔlɛ bunu kemmo.

¹⁶“Nsu si bina bekisine bákɛ kenyekɔ na banii bɛɛyú-mii iye bayila-mii udu ni, ami lɛnɔ ndubo-ma buyu iye lɛyila-ma udu. Na badubuƒie ama lɛnɔ besienku kaƒɔ ɔlɔgyu.

¹⁷Ukyuli biala ulawia ka udie-ɔ kakpana na ɔɔɔdaku-ɔ lɛda lɛnɔ si lɛla lɛdi mɔɔlɛ́ku-ɔ. Nsu ndubo-mii bɔbwi ƒui bɔsiku bina lɛlɛ lɛni nda-mii kudɔ na lɛlɔ lɛsɔ lɛbla-mii sɛɛn na bɛsɔ bɛkɛ bina ɔlɔkplu.”

¹⁸Unwoti ɔnini, “Israel ndubo-ɔ kɔnyana bɔnu na asɔ enwini ebo ɔma. Yerusalem, ɔƒaani ni, ɔma ɔmmɔ ɔ́bwɛ na uwi aani kebu, nsu badubo-ɔ bɔsɔku bɔtu ƒui kede kede ku baga kesii kawɔdi na bina kɔduli kɔdubunye kesii kani kúnye dii kúbavi.

¹⁹Kadi bamba bekyuli badubo-mii bɔnu bɔƒalɛ na babu-mii. Na bebi badubɔƒɔ-mii kɔduli kemmo pii geen. Na bɛdubo limeyi bɔdi na bɛkɛ ebiti na bimwi-mi ku lɛlɔyɔ lɛnu.

²⁰Na ɔdubuse aani kuuku kalɛ kani pɛpɛɛpɛ. Bina kadi bekyuli badubo-mi bɔkpa. Na ndubɔni ukyuli biala medumi-mii kɔtu.

²¹Na bina akɔ kani na bɛdubɔkɛ bina ɔtɔnkune bɛsiku. Na si lɛ́lɔ-nwu nnii ubo-mi kudɔ na mina kakpakɔ ni, ɔdubɔni ude-mi na mina lɛkpabi lɛlɔ. Ɔsika ɔdi ulakana-mi bɔni bude si ɔɔɔdi bɔlɔ na lɛ́lɔ-nwu.

²²Bɛdubo mina bekyuli bunwini na ami lɛnɔ linwini bina Katɔti. Ami Unwoti násu.

²³“Líti kɔnyi geen aani ɔƒɛƒɛɛ ɔni kenye mbo ɔkplu na ndubo bekyuli bani mɔɔbla likpidi butiku.

²⁴Na mina kɔnyi kenye kaaadubo bɔyɔ wetédu uwi ɔni na lɛ́bla lɛni mɔɔyɔ́ lɛ́wɔlɔ. Na limeyi lɛdi ni, bɛdubunu lɛla lɛni na ndanku mɛni kalɔ.”