Read Lelemi Yeremia 31 Bible Online

Yeremia 31 - Lelemi bible

Yeremia 31

¹Unwoti ɔnini, “Israel, líse kenye ka Limeyi lɛdi lɛdubo ni, ƒula adua ƒui bekyuli badubɔsɔ benwini mina badi na ami lɛdi bina Katɔti.

²“Na ketele kalɔ kakwiidi kemmo ni, lɛ́bla bani ka kukpi kútadu lɛƒɔndia. Na lɛ́ya na bákɛ keyi buɛɛ. Na si uwi ɔmmɔ údu ni, ndubɔbla lɛni kani lite amii lɛnɔ. Ami Unwoti násu lɛni.”

³Uwi ɔdi návi ni, Unwoti údie lɛlɔ ɔ́tina-mi na ɔ́su ɔnini, “Israel, ndubo butaayɔ-ɔ uwi ndi uwi, anwuɔsu na lɛ́kɛku-ɔ kayi buɛɛ na muuwiku-ɔ lɛlɔ ku kɔnyana bɔnu.

⁴Bɛ́ƒɔ-mi uye geen. Anwuɔsu ndubɔsɔku bina kalɔ lɛtu. Na bɛdubo bɔsɔ bɔtɔ ku ebiti na bɛgya bina lɛbentaa.

⁵Bɛdubusie adingyii mmo na Samaria abi lɛlɔ. Na bɛdubɔdi egyiibi ammɔ ku lɛlɔyɔ.

⁶Na uwi ɔdubo ɔni na bagyumane bani mɔɔnu Eƒraim abi kalɔ lɛlɔ badubo kudu bubo momoomo na basu banini, ‘Bɛya na buteesie Sion na butákpa Unwoti bula Katɔti na mmɔ.’ ”

⁷Unwoti ɔnini, “Amii kadi bekyuli bani náƒɔ kuye bitulo ƒui, lɛlɔ lɛyɔ-mii na bɛtɔ ku ebiti. Bibo kudu ku bina bumwi akpala na bɛsu bɛnini, ‘Unwoti bo, na ebedie ƒula kadi bekyuli Israelƒuɔ bani nébu!’

⁸Ami Unwoti ndubɔsɔku mina bekyuli lɛsiku Babilon ku kalɔ kadi bekyuli ƒui akɔ liboku ɔma. Na banumbwɛne ku bekpulone ƒui badubɔkya mmɔ. Na baƒɔndane ku bani na uwi úudu-ma ka bawɔ ƒui badubɔkya kasala kammɔ kemmo.

⁹Badubo buteewulo na baatákpali-mi teevele uwi ɔni na bakɛ ulu badubo ɔma. Na ndubo-ma bɔkpanku busienku abiɔ ani kemmo na ntu bɔbuni bɔkya na bani. Na badubɔsia ulu ɔni ntɛ kalɔ ƒiaa lɛlɔ na beletulo iye bagbanta. Ɔti na ndi nte Eƒraim mina kaƒɔ ubi udeedi ku nwuna badi.

¹⁰“Amii kadi bekyuli ƒui binu, amii bani na amadɔ ku bani na ɛpu ɔvi ƒui. Lígyingya Israel kadi bekyuli lɛ́kya. Nsu nsɔ ndubo-ma bɔsala ƒui. Na ndububo-ma bɔgyumana aani kalɛ na baƒonu ɔdane ɔɔgyumana nwuna baƒonu.

¹¹Ndubo-ma budie bɔsiku bana bekisine bani ndubɔkana na badi-ma lɛlɔ enu kemmo.

¹²Mina bekyuli badubo-mi kudɔ na Sion Kɔbi lɛlɔ na babadi limeyi na bana anumi ekeye, ɔsika ndubute-ma kusɛ kusɛ. Na ndubute-ma antabi ku egyiibi ku nnɔ. Na lite-ma baƒonu ku ɔmantɛ bakɔ. Ala adubo-ma bɔdianku na balɛ lili aani kemo kani edula nákɛ ntu kaduɛ.

¹³Na bakloƒu ku begblebi ku benengu ƒui lɛlɔ lɛdubɔyɔ-ma na batɔ ku ebiti. Ɔsika ndubɔsia-ma kɔnu na lɛya na bana kɔnyana buwulo bunwini ebiti.

¹⁴Ndubute mina bekyuli kusɛ kusɛ na lɛya na bakɛ edula pii betulo kalɛ na baawia muedi. Na bakpane badubɔkɛ bebuo bani na badubɔdu kɔdikɔ kɔbuni. Ami Unwoti násu.

¹⁵“Bekyuli bénu kɔku kɔdi na Rama ka beewulo momoomo. Rahel bawɔ beewulo bana bebi. Na belenu kɔnu bɔsia, ɔsika bebi bammɔ békpi.

¹⁶“Nsu ami Unwoti mɔɔsu-mii nnii bini bina imii biala na bina anumi. Ɔsika uwi ɔdubo ɔni na bina bebi badubɔsi bana bekisine kɔlɔ lɛlɔ bebo ɔma. Na ala ani na bɛ́bla bíte-ma ƒui ni, bɛdubɔkɛ-nya lɛlɔ kɔsia.

¹⁷Anwuɔsu bitayila lɛnunsia. Ami Unwoti násu.

¹⁸“Eƒraim úwulo ɔ́kpali-mi ku kɔnyana ɔnini, ‘Unwoti buse aani alakpi akɔ bakɔ bani na átina lɛnunda na kalɛ na ésusu-bu ɔsu na bɔ́tɛya kalɛ na bunu-ɔ litemi. Awɔ ndi bula Katɔti. Buvele na bɔda-a. Ya na bunwini bubo ɔma.

¹⁹Uwi ɔni na bɔmu bɔdi banamu ni, bɔ́yii ulu na bɔ́bla likpidi bɔ́ƒiɔ-ɔ. Nsu bɔ́nu lɛla lɛni na bɔ́bla-a mɛni bɔ́ti. Kɔƒa kuukpó-bu na bɔɔwia ku bunwini bubo-ɔ kudɔ.’

²⁰Israel kadi bekyuli, ami ɔlati mina bebi bani mɔɔyɔ́ geen na bɛdi. Ɔɔɔdi ami na mɔɔyɔ́ teetulo ƒui na kadi bekyuli akɔ yoo? Ina ka muubó-mii lɛnimi enwu ku kɔnyi taasu ka ndubo-mii bɔtina ni, bɔyɔ na mɔɔyɔ́ ka bɛni bide-mi na lɛnu-mii kɔnyana. Ami Unwoti násu.

²¹“Bɛsala atabi bɛlɛ esu esu na ulu lɛlɔ ku likpose kɔlɛkɛ na biti bɛnu bina kasiakɔ bɛti si bɛdubo ɔma. Ulu ɔmmɔ kani lɛla na bɛ́sia bɛ́tɔlɔ.

²²Bɛɛbla kasusu ka bɛvumana na binwini bɛsiaku-mi kama siin na bɛsɔ bilálɛ-mi kama? Limeyi lɛdi lɛdubo ni, ndubɔnu ka lɛ́vumana ala lɛ́siaku ulu bamba lɛlɔ aani kalɛ na uleku uunwíni taawia ɔnana.”

²³Unwoti Ɔyikune Ƒui, Israel Katɔti, ɔ́su ɔnini, “Líse kenye ka ndubɔya na Yudaƒuɔ bakɛ bɔnwuna na lɛtɔnku-ma liboku bana lɛma. Na si uwi ɔni na lɛ́bla ɔmɛni ni, badubɔsɔ basu banini, ‘Buuvele Unwoti bɔnii ute nwuna ɔma ɔni ndi Yerusalem Kɔbi kedee lili kesii kani na nwuna kakpakɔ kenye mmɔ kusɛ kusɛ.’

²⁴Bekyuli bammɔ badubɔkya Yerusalem ku Yuda lɛma bamba kemmo. Na badi badubɔbla bemonsene na badi badi bebuo badane.

²⁵Bani na lɛlɔ lítu-ma na bábla kpɛtɛ kpɛtɛ ni, badubo ɔyikun ku ngba ɔwɔdi bɔkɛ.

²⁶Na si bátɛ bálɛɛ ni, badubɔgyinya ku ɔlɔkplu ɔwɔdi.

²⁷“Uwi ɔdubo ɔni na Israel ku Yuda ƒui badubo bunwini mina kemo kesii kani na mina bekyuli badubulie babi lɛlɔ ku bana bebuo ƒui.

²⁸Uwi ɔni návi kemmo ni, lɛ́sia ulu biala lɛlɔ nnii mɔɔgyú-ma lidie ku ligyiitu na lɛbwɛ-ma na lɛyila-ma udu ƒui. Nsu si uwi ɔmmɔ úbedu ni, ndubo anu bɔsia na lɛlɛ-ma aani kugyii na balɛ lili.

²⁹“Na ɔ́si uwi ɔmmɔ úsela ni, ɔdi ɔsɔ ulakana bɔsu ɔnini, ‘Kugyii ebi nyanyaanya ani na bawɔne badi ni, bana bebi kenye kemmo na ɔdu ɔmmɔ úbaƒɔ lɛlɔ ɔkya.’

³⁰Ɔsika si limeyi lɛmmɔ lídu sɔsɔ ni, ama bani nádi egyiibi nyanyaanya ni, ama kani bana inye na ɔdu ɔmmɔ ɔdubo bɔkya. Na bani lɛnɔ nábla ekpidi ama kani na badubo bɔdu.”

³¹Unwoti ɔnini, “Ami Unwoti mɔɔsu ka ni, uwi ɔdubo ɔni na ndubo lɛla lɛwɔdi bunyimiku Israel kadi bekyuli ku Yuda kadi bekyuli.

³²Na ulése aani kalɛ na línyimiku bana bati kuuku na uwi ɔni na lɛ́da-ma kɔnu kɔnu na lɛ́tɔnku-ma lɛ́lɛku Egyipte kalɔ lɛlɔ. Na ina ami ndi bana Katɔti muedi ni, bátadi bunyimi bɔmmɔ lɛlɔ.

³³“Bunyimi bɔni na ami Katɔti mɔɔsu ka ndubo bunyimiku-ma na uwi ɔni ndubo kemmo ndi ɔmɛni. Ndubuti mina ɔda bubo lɛkya-ma kayi kemmo. Na ndubunweni-mu lɛsia-ma kasusu lɛlɔ Ndubɔbla bana Katɔti na ama lɛnɔ babla mina bekyuli.

³⁴“Na ɔ́si ɔƒɛni ni, ukyuli ɔdi ɔsɔ ulatina ɔkpanadi iye ɔnwani ka ɔti Blɔti. Ɔsika bana ƒui badubo-mi bɔti ɔ́si ubliidi ƒui útálɛ unengudi lɛlɔ. Na ɔ́si ɔƒɛni ni, ukyuli ɔdi ɔsɔ ulatina ɔkpanadi iye ɔnwani ka ɔti Blɔti. Ɔsika bana ƒui badubo-mi bɔti ɔ́si ubliidi ƒui útálɛ unengudi lɛlɔ. Na ndubuti bana alaekpidi ani ƒui bábla lɛkyiɛ-ma. Na nsɔ lɛɛɛdubo bana ekpidi bunyimo kudii.

³⁵Ami ndi Unwoti Ɔyikune Ƒui na ami nédie lɛdi líte ɔƒɛ ka uteete bukeye limeyi ndi limeyi. Na kɔbuli ku ayabi lɛnɔ eteekeye usien na ɛpu avlɔvɔ eteeto taabla kudu.

³⁶Naaayiƒala ɔdi lɛdi lɛmmɔ budie bute uwi ɔdi. Lɛni kani na naaada Israel kadi bɔda bɔnyonu nnii basɔ betenwini kadi bekyuli kudii. Ami Unwoti násu.

³⁷“Ɔdi ɔdubɔka kayaa bɔkɔku bɔnu? Na kalɔ nɔɔ ɔdi ɔdubɔkana ka ɔkɔku-ka bɔgyu ɔnu? Lɛni na ubo-mi ɔkplu ka lɛda Israel bekyuli lɛnyonu uwi ƒui ina ka bábla likpidi. Ami Unwoti násu.”

³⁸Unwoti ɔnini, “Limeyi lɛdi lɛdubo ɔni Yerusalem ɔdubunwini ami ɔdi geen geen. Badubo-nwu bɔsɔku bɔtu na nwuna ɔmii ɔsia ɔsi Hananel Kagyumanakɔ kpakplaa utédu kesii kani baalɔ banii Ɔkodo Ɔban Kayakun.

³⁹Na ɔmii ɔmmɔ ɔdubɔsia mmɔ ligeen usie Gareb kɔbi lili. Na unwini ɔyu usie Goa.

⁴⁰Na Hinmn Kɔwɛ kesii kani muusé lɛlɔ mmɔ muedi ɔdubo bunwini kesii kani ndubɔbla kedee ute-mi. Na ɔdanku kesii kani baalɔ Bapɔnkɔ Ɔban Kenye na ɔƒɛ katukɔ kakɛ ɔ́yu útéduo Kidron Kɔwɛ kemmo. Na basɔ baaadubo Yerusalem bɔbwɛ lɛnɔ kudii.”