Read Lelemi Yeremia 33 Bible Online

Yeremia 33 - Lelemi bible

Yeremia 33

¹Bagyumanane bammɔ bámu bábala-mi bákya ɔga kaduli mmɔ aani ɔtɔntɛne kalɛ asa na Unwoti ɔ́su-mi ɔnini, “Ami ndi Unwoti, na ami nédie kayawi kemodi kammɔ ƒui.

³Ala ani na aaagyi ƒui ku ani kalɔ na alakana bɔwia bɔti ni, ye-mi na lɛsu-ɔ nya.

⁴“Yerusalem lɛtɔ pii lɛ́kya ku baga kesii muedi lɛni na bébo báƒɛ na béti báklibi awodu bonwu ani na bátu bámana Yerusalem kalɛ na Babilonƒuɔ bekpone balakana buduo bubile ala. Anwuɔsu kesii kani na lɛtɔ lɛmɛni línye únwini kalɔ kekpludi na kewi. Nsu lɛ́kɛ kɔnyi lɛ́kya Yerusalem geen na bekyuli bani na ndubo bɔya na badu ni, badubɔƒɔ mmɔ ƒui. Yerusalemƒuɔ badubo buwulo bakpali-mi bevele, nsu lɛɛɛdubo-ma bɔkpete na bana likyulikpi ɔsu, ɔsika ndubudie-ma atu.

⁶“Kama ƒui na limeyi lɛdi lɛlɔ ni, ndubo mɛni bɔklibi na lɛbwi bekyuli bammɔ ƒui na lɛya na belie ku keyi buɛɛ kani neeebo kawɔlɔkɔ.

⁷Ndubɔsɔku kalɔ kamɛni lite Israel ku Yuda na lɛya na basɔ bakɛ ɔyikun ɔni nákya-ma kudeedi.

⁸Bábla alaekpidi na báta bénye-mi lɛlɔ, nsu ndubuti lɛkyiɛ-ma na lidie bana bɔƒiɔ ƒui bana lɛlɔ.

⁹Na si uwi ɔni na ala amɛni álɛ lɛni ni, kalɔ lɛlɔ kadi bekyuli ƒui badububo ala abuni ani na lɛ́bla líte Yerusalem bɔnu ku kalɛ na lɛ́ya na ɔ́kɛ keyi buɛɛ geen. Na lɛlɔ lɛdubɔyɔ-ma na batɔ ku ebiti na bemwi-mi na bataabu-mi lɛnɔ. Nsu liƒu bonwu lɛdubo-ma bɔda na lɛlɔ litaatɔ-ma.

¹⁰“Yeremia, aasu anii kalɔ kamɛni kadi ketele kalɔ kakwiidi na bekyuli ku bebuo ƒui basɔ beeebo-ka lɛlɔ. Sɔsɔ na ásu na use lɛni ɔƒɛni. Yuda lɛma ku Yerusalem lɛblɔnu ƒui liwi ukpludi na bekyuli ku bebuo badi basɔ beeebo kesii kadi na anu. Nsu limeyi lɛdi ni, adubunu

¹¹lɛlɔyɔ kɔvanu ku ebiti kasala lidu lidu. Na adubunu ka beeti beleku taawɛɛ-ma ku ebiti katɔ. Na si bekyuli bébo-mi kudɔ na mina kakpakɔ banii beeti etela babakpa bete-mi ni, adubunu ka baasu banini, “ ‘Buumwi-ɔ, Unwoti Ɔyikune Ƒui! Bɛgya Unwoti enu, ɔsika ɔdia na ɔɔyɔ́-bu uwi ndi uwi.’ Na kalɔ kammɔ kadubɔsɔ kadia edula.

¹²“Ɔƒaani ni, kewi ukpludi na bekyuli iye bebuo badi beeebo-ka lɛlɔ. Nsu si uwi ɔmmɔ úbedu ni, baƒonu badane ku bana baƒonu badubɔƒɔ lɛma lɛmmɔ ƒui adɔ na abi kalɔ kammɔ lɛlɔ na benye bataanu-ma lɛlɔ na kadikɔ mmɔ. Na badubɔƒɔ abi kɔƒɔna mmɔ bene ƒui úti úsie ɔƒɛ kanukɔ na ketele kalɔ kakwiidi kani na kada kakɛ na Benyamin kɔdua kalɔ kemmo ku Yerusalem amadɔ ku Yuda lɛma amadɔ ƒui. Ami Unwoti násu.”

¹⁴Unwoti ɔnini, “Líse Israel ku Yuda kenye kabuni kadi. Na uwi ɔdi ɔdubo ɔni na ndubɔdi linyese lɛmmɔ lɛlɔ.

¹⁵Líse kenye ka ndubɔƒuna ɔga ɔdi lɛsiku Dawid ɔtɔ kemmo si uwi ɔdi úbedu. Na ɔga ɔmmɔ ɔdubɔsu litemi geen na ɔdi bekyuli lɛlɔ na ɔtɛ litemi ulu siin lɛlɔ.

¹⁶Na uwi ɔmmɔ kemmo ni, Yuda ɔdubulie ƒaa na lɛla lɛdi lɛɛɛdubo-nwu bukpoku. Na Yerusalem ɔdubulie ku keyi buɛɛ na bekyuli badubɔsia-nwu lɛnyi banii ‘Unwoti ɔɔtɛ litemi siin.’

¹⁷“Na uwi biala ni, Israel ɔga ɔdubɔsi Dawid bawɔ kemmo.

¹⁸Na uwi biala kemmo ni, bakpane badubɔsi Lewi kɔdua kemmo na benye bataabla kabla bete-mi na mina lɛkpabi lɛlɔ na bataakyula akpala ani ndubɔyɔ-mi kaƒɔ teete-mi beti bataagya-mi enu.”

¹⁹Ɔmmɔ kama ni, Unwoti ɔ́su-mi ɔnini,

²⁰“Ami Unwoti línyimi lɛla lɛdi líse líte usien ku ɔƒɛ na ɔɔlɛ́ lɛni na uwi lɛlɔ pɛpɛɛpɛ uwi ndi uwi. Na ɔdi ulakana na webile lɛla lɛni na línyimi líte-ma mmɔ.

²¹Na lɛla lɛni na línyimiku Dawid ɔtɔ bekyuli ku Lewi kɔdua bekyuli bani mɔɔkpá na mina lɛkpabi lɛlɔ ni, ɔdi ulakana na webile-mu. Dawid bawɔ akɔ na ukyuli ɔdubɔsi utaadi Israel lɛga uwi biala.

²²Na Dawid ku bakpane bani nási Lewi kɔdua kemmo badubɔkɛ bawɔ pii betulo kayaa ayabi iye ɛpu kɔnwinimi.”

²³Unwoti ɔnini,

²⁴“Baƒɔ benye beedumi mina kadi bekyuli taasu banini, ‘Unwoti ɔ́ƒuna Israel ku Yuda aani nwuna bekyuli, nsu ɔƒɛni amu úni-ma na basɔ beenye aani kadi bekyuli.’

²⁵“Yeremia, lɛɛɛdubo lɛla lɛni na línyimi líte usien ku ɔƒɛ kama bɔlɛ na libile-mu kudii iye lɛya na kalɔ ku kayaa bada-mi ɔda ɔni na líbo-ma lɛlɔ bɔdi baya kudii.

²⁶Lɛni kani na lɛɛɛdubo Abraham ku Isak ku Yakob bawɔ buni iye libile kenye kani na líse-ma ka nwuna bawɔ ndubo lɛga butaadi uwi biala kudii. Ndubo mina kadi bekyuli Israelƒuɔ lɛƒɔndia lɛdi bɔbla na ala asɔ adianku-ma.”