Read Lelemi Yeremia 37 Bible Online

Yeremia 37 - Lelemi bible

Yeremia 37

¹Babilonƒuɔ Ɔga Nebukadnesar ɔ́bɔku Yehoiakim ubidi Yekonia ɔni ndi Yudaƒuɔ ɔga ɔ́talaku liboku lɛlɔ na úti Yosia ubidi Sedekia únwini Yudaƒuɔ ɔga.

²Nsu Sedekia ɔmɛni ku nwuna benengu ƒui bétenu Unwoti ala ani ƒui na ɔ́su-mi mɛni.

³Kama kama ni, Babilonƒuɔ bekpone bébekpo Yerusalem, nsu bébenwini kama ka bénu ka Egyipteƒuɔ ɔga ɔni baalɔ Apres na basɔ baalɔ-nwu Hopra ɔ́tɔnku Egyipteƒuɔ bekpone na béti básia kakɛ kammɔ bésela ɔsu. Limeyi lɛdi ni, Sedekia ɔ́tala Selemia ubidi ɔnanabi ɔni baalɔ Yehukal ku Maaseia ubidi ɔnanabi ɔni baalɔ Seƒania na ɔdi ɔkpane ɔnii bebo na ami ku-ma bɔtɛmi. Na uwi ɔmmɔ kemmo ni, na mbo bɔnwuna, ɔsika bátakya-mi tɔ ɔtɔ na lɛkana na lisie kesii biala na mɔɔyɔ́. Mmɔ na Yukal ku Seƒania bábasu-mi banini, “Yeremia, buvele, kpali Unwoti bula Katɔti na bula lili.”

⁶Amu na Unwoti ɔ́su-mi ɔnii nsɔku-ma nnwiniku ku kenye kamɛni ɔnini, “Sedekia, aawia ka Yeremia uvele ami Unwoti Israel Katɔti na lɛsu-mii lɛla ndubo bɔlɛ. Anwuɔsu ndubo-mii bɔsu. Egyipteƒuɔ ɔga ku nwuna bekpone bébo bábaƒɔ-mii ngba. Nsu uwi uletu badubɔsɔ benwini besie bana kalɔ lɛlɔ.

⁸Ɔmmɔ kama ni, Babilonƒuɔ badubɔsɔ benwini bebo na bebekpo Yerusalem. Na ɔƒaani ni, badubo ɔma ɔmmɔ bɔka bɔkya na batu ogya bakya lɛla biala.

⁹Utabla-mii aani Babilonƒuɔ bammɔ badubɔsɔ benwini aani kudeedi kalɛ na bise lɛlɔ lisusu.

¹⁰Ina bɛ́di-ma lɛlɔ muedi ni, bekpone bani náƒɔ ɔlɛ, nsu bétekpi mmɔ badubo na bɔsi bana adi nvo kemmo bebo na batu ogya Yerusalem ɔma umodi ɔmmɔ.”

¹¹Ka Egyipteƒuɔ bébo banii bebebunku-bu na bekpo bete-bu ɔsu ni, Babilonƒuɔ básɔ bénwini.

¹²Ɔmmɔ ɔsu lɛ́bla kasusu ka mɔɔtɔlɔ Yerusalem linwini lisie Benyamin kɔdua kalɛkɛ lɛlɔ na ami lɛnɔ ntáƒɔ mina ɔtɔ kemmo kalɔ kadikɔ kani medu-mi.

¹³Ulu ɔmmɔ na ndaku bɔyu ɔ́si Yerusalem na nkɛ kesii kani baalɔ Benyamin Ɔban Kenye uwi ɔni na Selemia ubidi ɔnanabi ɔni baalɔ Iriya na ɔdi Hanania uwɔ na ɔsɔ ɔdi ɔban ɔmmɔ bagyumane lɛlɔ ɔnune údi-mi únyene. Mmɔ na ɔ́su-mi ɔnini, “Yeremia, mɔɔyá-a na ati ka búƒie-ɔ, ɔsika ábla unwi ku Babilonƒuɔ na ésela atásiaku-ma.”

¹⁴Amu na lídie kenye nnini, “Ɔɔɔdi bana kudɔ na lísela ntáblaku-ma unwi!” Nsu Iriya útete-mi kuƒi kɔdi munu munu, mmomu úti-mi úsienku ɔga benengu bammɔ.

¹⁵Mmɔ na bédie lɛdi béte bekpone bammɔ na bébo-mi, ɔsika béti kɔnyi bákya-mi. Ɔmmɔ kama béti-mi bésienku ɔga benengu bammɔ akɔ unwi ɔni baalɔ banii Yonatan kesii, ɔsika nwuna kaduli na béti bénwini bekyuli ɔtɔ kakyakɔ. Na béti-mi bákya ɔtɔ ɔdi na kalɔ kemmo. Uwi ɔni na bákya-mi ɔtɔ mmɔ na ɔ́ɔƒɔ uwi gyɔlɔɔ ni,

¹⁷Ɔga Sedekia ɔ́ya na bábɛ bédie-mi béboku-nwu kudɔ na úye-mi buɛɛ ɔnini, “Adanku kenye kadi ásiku Unwoti kudɔ ete-bu?” Amu na lídie kenye nnini, “Bula ɔga ɔbune, ɛɛn, ndanku kenye kadi. Unwoti ɔdubo bɔya na Babilonƒuɔ ɔga uƒie-ɔ ɔtɔlɔku.”

¹⁸Ɔmmɔ kama ni, líye-nwu nnini, “Ɔga ɔbune, bi na lɛ́bla ɔsu na áya na bákya-mi ɔtɔ? Bɔbla na lɛ́bla likpidi bonwu lɛdi lɛ́ta línye-ɔ lɛlɔ iye ƒula benengu bammɔ ɔdi lɛlɔ iye kalɔ kammɔ ɔda bubo bɔdi lɛlɔ?

¹⁹Na ɔkɔ kenye bediene bani nátɔlɔ-ɔ banii Babilonƒuɔ baaadubo Yerusalem bukpo kudii ni, ákya bana ɔdi ɔtɔ?

²⁰Buvele nda-a, tasɔku-mi tatákya ɔtɔ na Yonatan kesii mmɔ. Si ɔɔɔdi lɛni ni, ndubo bukpi.”

²¹Ɔmmɔ ɔsu Ɔga Sedekia ɔ́ya na béti-mi bátákya ɔtɔ na ɔga kesii kaduli bagyumanane bammɔ enu kemmo, na ɔ́su bekpone bammɔ ɔnii bataasíku bodobodo na bodobodo keƒikɔ mmɔ teeboku-mi limeyi ndi limeyi wetédu ka adila ása ɔma bonwu ɔmmɔ kemmo.