Read Lelemi Yeremia 39 Bible Online

Yeremia 39 - Lelemi bible

Yeremia 39

¹Ulu ɔmɛni lɛlɔ na básia báƒɔ Yerusalem. Na lɛkwa yaalenwidi kɔbuli leevudi kuna limeyi leevudi ka Sedekia ɔɔdi lɛga ni, Babilon Ɔga Nebukadnesar ɔ́tɔnku nwuna bekpone ƒui ka betékpo Yerusalem. Na báka ɔma ɔmmɔ bákya.

²Na kɔbuli kunedi limeyi yaalenwidi na lɛkwa leevu-unwidi kemmo ka Sedekia ɔɔdi lɛga ni, bábwɛ awodu ammɔ na báda bálɛ-ma lɛlɔ.

³Uwi ɔni na kekpo kéƒie Yerusalem káwɔlɔ ni, Nebukadnesar benengu bani ntulo ƒui mmɔ ku Nebo Sarsekim ku Nergal-Saresa bani nási Simigar bábaƒɔ kalɔ beli na kesii kani baalɔ banii Ɔmantɛ Ɔban Kenye mmɔ beti batina ka ama mɔɔdi ɔma ɔmmɔ lɛlɔ ɔƒaamu.

⁴Uwi ɔni na Ɔga Sedekia ku nwuna bekpone bánu ka kekpo kéƒie Yerusalem ƒui ni, báwia ka bekeli balɛ ɔma ɔmmɔ kemmo usien ɔmmɔ kani. Na bésie ɔga kevoma kemo kesii kani na bátábɛ básia ɔban ɔni nkya ɔma ɔmmɔ awodu anyɔ kɔsa mmɔ na béti eli bátina Yordan Ketu kɔwɛ kemmo.

⁵Nsu Babilonƒuɔ bekpone bábi básiaku-ma na bétéƒie-ma na Yeriko ɔma kudɔ na bákpanku Ɔga Sedekia bésienku ɔma ɔnii baalɔ Ribla na Hamat kalɛkɛ kemmo. Mmɔ na Nebukadnesar ɔ́tɛku-nwu litemi na ɔ́du-nwu kɔtɔ ka nwuna litemi lɛɛɛdia.

⁶Na Ribla mmɔ ni, bádu Sedekia bebi bananabi ku nwuna benengu uwi ɔni na anwu ɔlati unye ɔɔnu.

⁷Na bátu-nwu anumi bédie evuo kemmo na bákya-nwu ɔbuli báni-nwu bésienku Babilon.

⁸Na uwi ɔmmɔ kemmo ƒui ni, na Babilonƒuɔ bekpone báakyula kɔduli kɔni nkya Yerusalem ƒui úbunku ɔga kesii lɛtɔ lɛmmɔ ƒui. Na báƒɛ ɔma unengudi awodu ammɔ ƒui béwi kalɔ.

⁹Babilonƒuɔ bagyumanane lɛlɔ ɔnune unengu ƒui ɔni baalɔ Nebusaradan ɔ́ya na bákpanku bekyuli bani ƒui nébu bakya Yerusalem mmɔ ku bani néeti lɛlɔ béte-nwu ƒui bátɔlɔku aani bekyuli beƒiedi kalɛ úsienku Babilon kalɔ lɛlɔ.

¹⁰Na bekyuli bani ndi bawabane geen na beeebo lɛla lɛla kani nébu bakya Yuda kalɔ lɛlɔ mmɔ. Na Nebusaradan ɔmɛni úte-ma kɔlɔ ku mmo bɔdi.

¹¹Amu na Nebukadnesar úbo Nebusaradan ɔda ɔmɛni ɔnini,

¹²“Wia Yeremia na agyumana-nwu kɔkɔɔkɔ na abla lɛla biala na weye-ɔ ete-nwu.”

¹³Ɔmmɔ kama ni, Nebusaradan ku Nebusasban ku Nergal-Saresa ku Ɔga Nebukadnesar benengu bamba ƒui

¹⁴bémene bana bekpone badi banii babakpanku-mi basiku ɔga kesii bagyumanane kaduli kesii kani na nka nkya mmɔ beboku. Na béti-mi bákya Ahikam ubidi Gedalia ɔni ndi Saƒan uwɔ kɔnu banii uti-mi usienku mina kaduli. Na béte-mi kuƒi ka lɛ́sɔ nkya bekyuli bani nébu kudɔ na Yuda kalɔ lɛlɔ mmɔ.

¹⁵Uwi ɔni na ndi ɔtɔntɛne na nkya ɔga kesii bagyumane kaduli mmɔ ni, Unwoti ɔ́su-mi ɔni nsu

¹⁶Ebedmelek ɔni ndi Kusni ɔmmɔ ɔnini, “Ami ndi Unwoti Ɔyikune Ƒui, Israel Katɔti. Na mɔɔlɛ ɔdi biala kpakplaa ka ndubo bɔya na ɔgbankpi ubo ɔma ɔmɛni lɛlɔ na ɔɔɔdi keyi kayɔdi ku kubiti. Na ɔƒaani ni, uwi ɔsɔ uletu ndubo lɛla lɛni na lɛ́su bɔbla na ɔdi biala ɔnu ka lɛ́lɛ sɔsɔ.

¹⁷Nsu ka áƒɔ-mi ádi na ƒula anu asia-mi lɛlɔ ɔsu ni, ndubo-ɔ bɔgyumana bɔsiku Yudaƒuɔ benengu enu kemmo. Na si uwi ɔni na ɔgbankpi ɔ́bwɛ úwi Yuda lɛlɔ ni, ndubudie-ɔ na lɛya na elie ngba. Ami Unwoti násu.”