Read Lelemi Yeremia 4 Bible Online

Yeremia 4 - Lelemi bible

Yeremia 4

¹Unwoti ɔnini, “Israel kadi bekyuli, si bɛɛyɔ́ ka bɛsɔ binwini bibo-mi kudɔ ni, bɛda atu bidie baƒiɔ bani muusé lɛlɔ mmɔ lɛlɔ na bibo ala ammɔ biwiakun.

²Na bise kenye biala na mina lɛnyi kemmo! Na bɛdi lɛla lɛni kenye na bíse lɛnɔ lɛlɔ! Na kadi bekyuli ƒui badubo-mii buteemwi na lite-mii kusɛ kusɛ.

³“Amii Yerusalem ku Yuda kadi bekyuli ƒui, bɛda atu ɔkplu ani udu na bɛɛbla mmɔ bɛ́ya! Bina atu kpakplakpa ammɔ áya na bina kayi lɛnɔ kábla kpakplakpa aani kalɔ kani na bétegulu-ka kudii na liyu alakpi sɔɔn áƒɔ mmɔ.

⁴Biti bina kayi ƒui biƒie lɛla lɛna na línyimiku-mii ƒui bɛda. Nsu si bítada bina atuɔkplu bítaya na bɛmu binye bɛɛbla ekpidi ni, mina kɔnyi kɔdubo-mii lɛlɔ aani kalɛ na ogya ɔɔkyula lɛla lɛdi na balakana-nwu bunine.”

⁵Unwoti ɔ́su ɔnini, “Bɛvwi ese na bɛkɔ lɛsa momoomo na Yuda ku Yerusalem ƒui na bɛsu-ma bɛnini, ‘Bikeli bisie lɛma linengudi lɛni na bátu bámana kemmo na bɛkɛ bɔƒɔ!’

⁶Biti anumi bɛtina Yerusalem iye ɔma bamba ɔni na bátu bámana-nwu kemmo! Yeremia, aya na bati ka ndubɔya na ɔgbankpi ɔsi kalɔ kammɔ katɔ kakɛ ubo-ma lɛlɔ.

⁷“Bekpone badi badubɔda babalɛ-mii lɛlɔ aani gyata ɔni nási ɔ́lɛ nwuna lɛtabi ubu kemmo na babakyula kadi bekyuli pii na ɔbwɛ bina lɛma na lɛsɔ liwi ukpludi.

⁸Na Israelƒuɔ ama ni, lɛ́su-ma nnini, ‘Biti kɔnyana ala bɛda! Na biteewulo kanyana ku keku momoomo.’ Ami mɔɔnu ka Unwoti ɔ́mu úti kɔnyi ɔ́kya-bu geen.”

⁹Ɔmmɔ kama ni, Unwoti ɔ́su ɔnini, “Si uwi ɔni na ala amɛni ƒui álɛ lɛni ni, ɔga ku nwuna bakutine ku kenye bediene ku bakpana ƒui badubo butaayia ku liƒu bonwu geen.”

¹⁰Mmɔ na lɛ́su nnini, “Awɔ ndi Unwoti Katɔti. Na bi ɔsu na ése ukyuli biala lisusu, na ɔni ntulo ƒui ndi ƒula kadi bekyuli Israelƒuɔ lɛnɔ lɛni? Bi ɔsu na ése-bu kenye ka bɔdubɔkɛ keyi buɛɛ na uwi ɔni na kewii nsia-bu ɔkwɛ na badubo-bu bukulo?”

¹¹Uwi ɔni na ɔgbankpi ɔmmɔ ɔdubo bɔlɛ ni, Unwoti ɔdubɔsu amii Yerusalemƒuɔ ɔnini, “Ndubɔya na ɔƒɛƒɛɛ kpakplaa ukpo ɔsi kalɔ kakwiidi lɛlɔ na ɔɔɔdi ƒɛƒɛɛ buɛɛ ɔni muuƒwi aƒata teedie bina kamu kemmo na kakpa. Mmomu ɔdubɔkpala-mii ɔtɔlɔku aani kɔtu bɔni na bina ekpidi ɔsu.

¹³Bɛnu! Aanu bina bekisine bekpone ka bási baayu aani kalɛ na kɔdigbo kɔɔtu taayu lɛla lɛni na uƒie lɛlɔ. Bana bapɔnkɔ ku kɛɛkɛ uukeli usi momoomo teetulo kalɛ na ɔƒɛƒɛɛ kpakplaa uuminime liƒlukutu na kayaa. Na mmɔ na bɛdubɔsu ku kɔnyana bɛnini, ‘Abu ɔdi ɔ́sa!’

¹⁴Nsu ni, Yerusalem, uwi ɔmu ɔkya-mii ka bɛkɛ bɔƒɔ. Bɛƒɔ bina ekpidi ƒui bidie lɛlɔ ku kayi kemmo na bɛda likpidi kakwɛ biala bɔkya bɛya,

¹⁵asa na ɔgbankpi ɔdi kɔku kɔsi Eƒraim abi lɛlɔ ku Dan ɔma ubeduo-mii atu kemmo.”

¹⁶Amu na Unwoti ɔ́su ɔnini, “Su kalɔ lɛlɔ bekyuli ka mina kadi bekyuli báta bénye-mi lɛlɔ. Anwuɔsu ndubo bɔya na bekpone basi ɔgyu kakaaka babaka bamana Yerusalem ku Yuda lɛma lɛmmɔ. Ami Unwoti násu.

¹⁸“Na amii Yudaƒuɔ ni, bɛdubo ɔlɛ bunu geen na kayi kataakpulu-mii, nsu amii alati na ɔ́si ɔsu na badubo-mii kɔtu bɔni lɛni.”

¹⁹Naaakana lɛbibo lɛmɛni kenye bunye! Mina utu uubó momoomo geen, na muususu lɛlɔ ku kɔnyana bonwu. Muunú ka bekisine bekpone baavwi kekpo kati bute lise na naaakana kenye bubile bɔsɔ bulie kpoo.

²⁰Na mɔɔnu teemene kalɛ na bekisine baadi-bu lɛlɔ taasia kama na beebile lɛla biala. Na mina kaduli muedi bébo-ka bábwɛ ɔni na útaƒɔ uwi ɔdi.

²¹Uwi ɛlɛ sɔɔn na ndubunye ntaanu bekisi aƒlaga ku bana ese ani na bada baavwi?

²²Línu ka Unwoti ɔɔsu ɔnini, “Mina bekyuli béni-mi. Bebi badɔlɔdi na badi na baaagyi banii kɔtu bɔni bɔdubo-ma lɛlɔ. Lɛla lɛni kani na bagyi ndi ka belie bataabla ekpidi.”

²³Ɔmɛni kama ni, lɛ́nu lɛ́mana kalɔ kammɔ ƒui lɛlɔ na lɛ́nu ka kese ƒue, na alanu ngba lɛla lɛdi na kesii kadi. Ɔƒɛ ku kɔbuli ku ayabi ƒui áyii.

²⁴Abi ammɔ aakunku na eesié taasɔ.

²⁵Na alánu bekyuli badi na kesii kadi. Na baasɛ bammɔ lɛnɔ ƒui béveyi bátɔlɔ.

²⁶Katumalɔ ƒui kénwini kalɔ kakwiidi na lɛma ƒui líbie liwi ukpludi. Kɔnyi kpakplaa kɔni na Unwoti úti ɔsu na ɔmɛni ƒui ɔ́lɛ lɛni.

²⁷Unwoti ɔnini, “Lɛ́ɛbla mina kasusu lɛ́wɔlɔ na nsɔ lɛɛɛdubo-ka bɔvumana. Kalɔ kamɛni kadubo udu bɔyii, nsu lɛɛɛdubo-ka udu bɔyila ƒui kede kede. Kayaa kadubo bɔbla suu na kalɔ kammɔ ƒui kabla kɔnyana na ɔmmɔ ɔsu.”

²⁹Bekisine bekpone bani muulie bapɔnkɔ ku bani muubó atula beedie bana kekpo lɛnu na bekyuli beekeli taatábɛ na egyii ku atakpɛ kalɔ na báda lɛma béwi ukpludi.

³⁰Yerusalem, bákpala lɛla biala bédie ƒula kalɔ lɛlɔ, nsu bɔkɛ kani na akɛ aaví taabla ala aani ɔyalɛ na aawia ka ƒula basɔnɔ kuuku bani muukisi-ɔ ɔƒaamu basɔ benwini bebo-ɔ kudɔ. Lɛwu ligyiedi ku sika asɛɛ ani na akya ku ala ani na áwɛɛ anumi mmɔ ƒui ɔkyiɛdi na ɔdi. Bɔdu geen na ƒula bayɔne bammɔ bébo-ɔ bɔdu!

³¹Muunú aani si ukyuli muudumo ku keku. Uleku ɔdi ntɛ kɔkwalawɔ? Oowo, Yerusalem na ɔdi mɔɔnwuna taanɔ na ɔtɛ uuvele ka banu-nwu kɔnyana na ɔɔsu ɔnini, “Bukpi na nda! Bádu-mi.”