Read Lelemi Yeremia 41 Bible Online

Yeremia 41 - Lelemi bible

Yeremia 41

¹Nsu na kɔbuli maatɛdi kemmo ni, Netania ubidi Ismael ɔni ndi Elisama uwɔ úbo Mispa ɔma kemmo na ɔdanku nwuna bekpone leevu badi. Ismael ɔmɛni ɔdi ɔga kesii ukyuli na ɔ́di ɔga lɛlɔ benengu akɔ unwi. Na básiaku anwu ku nwuna bekpone bammɔ ka babadiku Gedalia na nwuna kesii.

²Kadikɔ mmɔ na Ismael ku nwuna bekpone bammɔ bádu Gedalia ɔni na nka Babilon ɔga ɔ́ƒuna ka utaanu Yuda kalɔ lɛlɔ mmɔ.

³Na bádu Yudaƒuɔ bani nkya Gedalia kudɔ mmɔ ku Babilonƒuɔ bekpone bani lɛnɔ nkya mmɔ.

⁴Na úti útédu ɔni na kadi kégye ƒui ni, bátakana tɔ na banu bekyuli bani nádu bekyuli bamɛni iye kesii kani na bakya.

⁵Uwi ɔmmɔ kemmo ni, nkyuli liti ku avlaatɛ badi básia Mispa ɔma ulu ɔmmɔ lɛlɔ badubo ɔ́si Sekem ku Silo ku Samaria lɛma banii beeti bana etela bebeti Unwoti na nwuna kakpakɔ ani ndi antabi ku oloƒui. Na békpeyi bana kuduo kalɔ linwini ƒui na báni bana adala bábwɛ na békulo bana lɛlɔ ekpo ekpo béti baatina ka beewulo kɔnyana.

⁶Amu na Ismael ɔ́sia ɔ́lɛ ɔma ɔban kenye útásiaku-ma na ɔ́bla lɛlɔ aani si buwulo na ɔda na ɔ́su bekyuli bamɛni ɔnii basia Mispa ɔma kemmo na badu Gedalia ɔni mɔɔnu Yuda kalɔ kammɔ lɛlɔ.

⁷Nsu ɔni na béduo Mispa ɔma ɔmmɔ kemmo kani na ɔ́ya na nwuna bekpone bammɔ bádu-ma na bebo-ma bákya abiɔ kemmo.

⁸Na bana akɔ leevu badi ama ni, utaya na badu-ma, ɔsika básu-nwu banii bebo antabi edula ebi lidu lidu ku uwɔ ku nnɔ bɔni na bábɛla bákya alakpi akɔ kesii kadi na badubuti bete-nwu ɔsu.

⁹Na abiɔ ani kemmo na úbo bekpine bamɛni ɔ́kya ni, Yudaƒuɔ Ɔga ɔni baalɔ Asa néku-nya kalɛ na bataaƒɔ ɔnantu ntu teewi-mu kemmo, ɔsika ɔɔyia Israelƒuɔ Ɔga Baasa ɔdubɔka Mispa ɔma ɔmmɔ ɔkya limeyi na basɔ balákɛ ntu kedukɔ na nwuna ɔma bekyuli balákɛ ntu bɔni na bani.

¹⁰Ɔga Nebukadnesar bagyumanane unengu ɔni ndi Nebusaradan ɔ́da Ɔga Sedekia ku nwuna bebi belekubi ku bekyuli bamba pii ɔ́ka Mispa ɔnii Gedalia utaanu-ma lɛlɔ. Nsu bekyuli bamɛni na Ismael ɔ́kpanku ɔ́tɔlɔku úselaku Amon na Yordan Ketu ɔvi aani nwuna bekyuli beƒiedi.

¹¹Kama ƒui ni, Yohanan ku bekpone benengu bamba bénu lɛla lɛni na Ismael ɔ́bla.

¹²Anwuɔsu ama ku bana bekpone báta básia Ismael kama na bátásiaku-nwu na ubu bonwu ɔdi kɔtu kesii kani baalɔ Gibeon.

¹³Uwi ɔni na bekyuli bani na Ismael úƒie ɔɔtɔlɔku mmɔ bénwini bánu ka Yohanan ku bekpone benengu bamba bammɔ ka badubo ni, lɛlɔ lɛ́yɔ-ma geen,

¹⁴na bénwini békeli badubo Yohanan ku nwuna badi kudɔ.

¹⁵Nsu Ismael ku nwuna badi maane békeli na bátɔlɔ bésie Amon.

¹⁶Yohanan ku bekpone benengu bakladi bédie beleku ku banamu bammɔ ku ɔga kesii benengu bani ƒui na nka béƒie baatɔlɔku mmɔ na Gedalia bɔdu kama. Na Yohanan ɔ́sɔku-ma únwiniku ɔ́siku Gibeon mmɔ.

¹⁷Na béti bésela Egyipte kakɛ. Na báyɔ ka besie mmɔ, ɔsika baayia na baaagyi lɛla lɛni na Babilonƒuɔ badubɔsu banii baabla si bénu ka Ismael ɔ́du Gedalia ɔni na Ɔga Nebukadnesar ɔ́ƒuna ka utaanu Yuda kalɔ lɛlɔ mmɔ. Uwi ɔni na bɔkɛ ulu búsela Egyipte ni, búdi búnye Gerut Kimham, ɔma ɔni nde Betlehem mmɔ.