Read Lelemi Yeremia 43 Bible Online

Yeremia 43 - Lelemi bible

Yeremia 43

¹Lɛ́su bekyuli bammɔ lɛla biala na Unwoti ɔ́su-mi.

²Nsu Hosaia ubidi Asaria ku Karea ubidi Yohanan ku batuɔkplune bamba básu-mi banini, “Ɔkɔ na aanyi! Unwoti ɔdi útasu-ɔ ɔnii su-bu anii butesie Egyipte.

³Bɔgyi Neria ubidi Baruk násu-ɔ ɔnii su-bu lɛni, ɔsika ɔɔwia ka Babilonƒuɔ bebeƒie-bu kalɛ na bakpanku-bu besienku Babilon iye badu-bu muedi.”

⁴Yohanan ku bekpone benengu bamba ku bekyuli bakladi ƒui béni ka basɔ bakya Yuda ina ka Unwoti úbo-ma ɔda.

⁵Anwuɔsu Yohanan ku benengu bammɔ bátɔnku-bu na buti bɔ́yu ulu bésela Egyipte. Na bekyuli bani ƒui náyu ulu ɔmmɔ ndi bekyuli bani negyingya bakya kɔlɔ ƒui lɛlɔ na básɔ bénwini bébo ka nka bebelie Yuda.

⁶Ami ku Baruk nkɛ ku bekyuli bamba bani na nka bulie Gekalia kudɔ ɔni na Nebusaradan, Babilonƒuɔ bagyumanane unengu ɔmmɔ, ɔ́su-nwu kpakplaa ka utaanu abu ku ɔga bebi belekubi bammɔ ku banana ɛlɛɛ badi ku beleku ku banamu bammɔ lɛlɔ.

⁷Bekyuli bammɔ bétenu Unwoti litemi na bátɔlɔ bésie Egyipte na bétéli kesii kani baalɔ banii Taƒanes.

⁸Mmɔ na Unwoti ɔ́su-mi ɔnini,

⁹“Yeremia, ti atabi adi sienku aban ɔgadine ɔmmɔ kaduli kayakun na Taƒanes mmɔ na eku-nya akya atimbɔ aƒidi ani na béti bákya ulu mmɔ kalɔ na Yudaƒuɔ bammɔ anumi.

¹⁰Ɔmmɔ kama na asu-ma ka ami Unwoti Ɔyikune Ƒui, Israel Katɔti, nátala nnii balɔ mina kabla ɔblane Nebukadnesar ɔni nási Babilon. Ndubo-nwu bɔkpanku buboku mɛni na ubatu nwuna lɛga kadikɔ na use nwuna lɛgaboku mɛni na ɔdi lɛlɔ na kesii kani na éku atabi ani na lɛsu-ɔ mɛni ákya kalɔ mmɔ.

¹¹Ɔdubo ubekpo Egyipte na ɔdu bekyuli pii na ɔlɛ ɔdu bana akɔ badi iye bakya-ma lɛbuli batɔlɔku aani bekyuli beƒiedi.

¹²Ndubo bɔya na ɔtu ogya ɔkya Egyipteƒuɔ baƒiɔ akpabi na ɔkyula iye uti baƒiɔ bavɔdi ku anwidi ammɔ ɔtɔlɔku. Na lɛya na ubile bana ekpo ani bábla na ese-ma kedee ute bana ɔƒɛ baƒiɔ mmɔ. “Ɔmmɔ kama ni, Nebukadnesar ɔdubo kalɔ kemodi kammɔ bɔgyu buɛɛ bɔtɔlɔku aani kalɛ na baami kebweyi na adala lɛlɔ na lɛla lɛdi lilabla-nwu.”