Read Lelemi Yeremia 44 Bible Online

Yeremia 44 - Lelemi bible

Yeremia 44

¹Unwoti ɔ́su-mi ɔnii ntɛmiku Yudaƒuɔ bani nkya Migdol ku Taƒanes ku Memƒis lɛma kemmo na Egyipte kalɔ katɔ kakɛ ku bani na bakya kalɔ kammɔ kada kakɛ na lɛsu-ma nnini,

²“Ami ndi Unwoti Ɔyikune Ƒui, Israel Katɔti. Na bɛ́nu kalɛ na lɛ́yila Yerusalem udu ku lɛma lɛni nkya Yuda kalɔ lɛlɔ. Na ɔmwi ni, lɛma lɛmmɔ lɛ́bwɛ na liwi ukpludi,

³ɔsika Yudaƒuɔ bákya-mi kɔnyi na ɔni na bakya baakpá baƒiɔ bani nétebunku bana bati kuuku badi kudii ɔsu.

⁴Mɔɔyá na mina kabla bablane kenye bedie beebo taabatɛmiku-ma taasia kama uwi ndi uwi kalɛ na nkisi bana ablala ani muusé lɛlɔ mmɔ. Na bébo-ma ɔda kpakplaa ka bada bana alaekpidi bɔbla baya.

⁵Nsu béni na bétenu na banii balada bana baƒiɔ bɔkpa lɛnɔ baláya.

⁶Kawɔlɔkɔ ni, mina kɔnyi kɔ́bwɛ kúwi-ma lɛlɔ aani kalɛ na ketu keeyi taabwɛ na keeƒie bekyuli. Na ɔmwi ni, Yerusalem ku Yuda lɛma liwi ukpludi aani kebu alakpi.

⁷“Na ɔƒaani ni, bi ɔsu na binye kpakplaa bɛnii bɛsɔ biiti lɛlɔ bitákya ɔgbankpi ɔbambadi kemmo? Ɔgbankpi ɔni na ɔɔɔdi amii lɛti ndubo-nwu kemmo buduo mmomu ku bina beleku ku bebi ku banamu ƒui?

⁸Bina baƒiɔ bani na bɛɛkpá ku kalɛ na bɛɛkyula oloƒui teete baƒiɔ bamba ɔ́si ɔni na bɛ́si Egyipte bíbo mɛni ɔ́ya na lɛ́kɛ kɔnyi geen. Na bɛdubo kukpi kɔni muusé lɛlɔ bukpi. Na kadi bamba bekyuli badubo-mii lɛnyi bɔlɔ bewida bekyuli banii ɔlɛku-ma kalɛ na ɔ́lɛku-mii.

⁹Uwi ɔni kemmo na bilie Yerusalem ku Yuda ni, bɛ́siaku bina bati kuuku ɔbladu kama na bɛɛbla likpidi aani bina baga ku beleku baga kalɛ.

¹⁰Na úti úbedu ku ɔƒɛni muedi ni, bina lɛlɔ katɔ bɔkɔliku ɔsu bilakana na biti ɔbu bite-mi na bitaadi ɔda bubo ku ala ani na lɛtina bina bati kuuku lɛlɔ.

¹¹“Ami Unwoti Ɔyikune Ƒui lɛ́lɛ ugyii ka ndubɔya na ɔgbankpi lidu libo-mii lɛlɔ na lɛyila-mii lidie ƒui.

¹²Bina ɛlɛɛ bani kani nébu na Yuda na bɛ́lɛ ugyii ka biteesie Egyipte kalɔ lɛlɔ. Nsu ogya ogya kukpi na bɛdubo bukpi na kekpokɔ na kɔka lɛnɔ kɔdu-mii. Na bina lɛnyi na kɔlɔ bamba bekyuli badubo bɔkpali buwida bɔkya bekyuli.

¹³Kekpo ku kɔka ku lɛlɛ lidu na líti lɛ́ni Yerusalemƒuɔ kɔtu na lɛni kani na ndubo amii lɛnɔ bɔbla.

¹⁴Bina ɔdi ɔɔɔdubo bubu bulie ngba. Bɛdubɔbla kasusu ka bɛdubɔsɔ binwini bisie Yuda kalɔ limeyi lɛdi, nsu bina ɛlɛɛ bani ndubo kukpi bukeli kani ndubɔkana na benwini besie mmɔ.”

¹⁵Yudaƒuɔ lisu bonwu lɛdi bani nákya Egyipte kalɔ kammɔ katɔ ku kada kakɛ ƒui benye beenú asa na mɔɔsu ala ani na Unwoti ɔ́su-mi. Na banana bammɔ ketulodikɔ na kasalakɔ kammɔ bagyi ka bana beleku baakyula oloƒui teete baƒiɔ bamba. Anwuɔsu ama ku bana beleku ƒui báva ku lɛdi momoomo banini,

¹⁶“Yeremia, bi nkɛ-bu si Unwoti lɛnyi kemmo na enye aatɛmi? Buni geen na búni bɔnii bulenu-ɔ litemi!

¹⁷Astarot ɔni ndi kayaa uleku ɔga baƒiɔ na abu búse kenye ka bɔdubɔkpa. Na ɔmmɔ geen na bɔdubo bɔbla. Bɔdubo oloƒui bɔkyula bute-nwu na buwi ntɛ kalɔ bɔkpa-nwu kalɛ kani na bula bati kuuku ku baga ku bula batɔnkune bábla uwi ɔni na bɔ́kya Yerusalem ku Yuda lɛma bamba kemmo. Lɛni na bɔ́bla na adila ákya-bu kaduɛ uwi ɔmmɔ na ala ádianku-bu na likpidi lɛdi lítalɛku-bu kudii.

¹⁸Nsu uwi ɔni kani na bɔ́da oloƒui bɔkyula teete-nwu bɔ́ya na bɔ́da ntɛ kalɔ buwi teete-nwu lɛnɔ bɔ́ya kani na búse kakɔ buukpi na kekpokɔ na kɔka lɛnɔ kɔɔdú-bu.”

¹⁹Amu na beleku bammɔ lɛnɔ básu banini, “Bɔ́kya Yuda na bútaakpa Kayaa Uleku Ɔga na buteeti ntɛ ku bodobodo sɛsɛɛ ɔdi udu na béƒi-nwu na nwuna udu kenye taakpa teete-nwu. Na bula bagya lɛnɔ bagyi ɔmɛni na bátunaku-bu lɛnɔ.”

²⁰Mmɔ na lɛ́su kasalakɔ kammɔ nnini,

²¹“Bilakali ka Unwoti ɔ́ti ka lɛni na amii ku bina bati kuuku ku bina batɔnkune ku baga ku bekyuli bakladi ƒui bítaakyula oloƒui teete baƒiɔ bamba na Yerusalem ku Yuda kesii biala?

²²Na uwi ɔni na útulo-nwu na ɔ́nɔ bɔnu ni, úwida bina kalɔ na káta kénwini ketele kalɔ kakwiidi kalɛ udu na kese ɔmwi na bɛɛnu mɛni.

²³Ɔgbankpi ɔmɛni úbo-mii lɛlɔ, ɔsika bɛ́kpa baƒiɔ bamba na bɛ́ta bínye Unwoti lɛlɔ na bíni bɛnii bilenu-nwu litemi na bɛsiaku nwuna ɔda bubo ku ala ani na ɔɔtina lɛlɔ ɔsu.”

²⁴Amu na lɛ́su banana bammɔ ku bana beleku ka Unwoti Ɔyikune Ƒui ɔnini, “Na Egyipte mɛni lɛnɔ ni, bɛmu binye bina linyese lɛlɔ ka bɛdubo bina lɛla lɛni na bɛɛlɔ bɛnii Kayaa Uleku Ɔga bɔkpa na bɛkyula oloƒui ku ntɛ akpala bite-nwu.

²⁶Bɛdi bina linyese lɛmmɔ lɛlɔ! Nsu mɔɔyá na bɛti lɛla lɛni ndubo-mii bɔlɛku. Ka ami ndi Unwoti Katɔti ɔsu ni, líse kenye ka kenye biala kadi kasɔ keeebo na bɛdubuse na mina lɛnyi kemmo na menu mete-mii.

²⁷Na ɔni na ntaanu-mii lɛlɔ kenye ni, ndubɔwia ulu ɔni lɛlɔ na masia mani-mii kɔtu mmomu. Na bina badi bɛdubo bukpi na kekpokɔ na kɔka lɛnɔ kɔdu badi.

²⁸Bina ɛlɛɛ kani ndubɔlɛ ɔgbankpi ɔmɛni kemmo na basɔ benwini besie Yuda kalɔ lɛlɔ. Ɔmɛni ɔdubɔya na amii bani ƒui nésie Egyipte kalɔ lɛlɔ bɛti ka si ami lɛ́su nnii lɛla lɛdi lɛdubo bɔlɛ ni, ɔ́bla bi ɔ́bla dɛ ni, lɛla lɛmmɔ lɛdubɔlɛ lɛni kani. Ina bi na amii bɛ́su.

²⁹Na ɔmɛni na bɛdubuti bɛnu bɛti ka ngba liƒu akyala ani na mɔɔsu ka adubɔlɛku-mii na Egyipte kalɔ lɛlɔ mɛni adubo bɔlɛ lɛni sɔsɔ.

³⁰Ndubo Egyipteƒuɔ Ɔga Hoƒre bɔnyonu bute nwuna bekisine na badu-nwu aani kalɛ na lɛ́nyonu Ɔga Sedekia líte Babilonƒuɔ Ɔga Nebukadnesar na ɔ́du-nwu.”