Read Lelemi Yeremia 50 Bible Online

Yeremia 50 - Lelemi bible

Yeremia 50

¹Unwoti ɔ́su-mi ɔnii nsu Babilonƒuɔ bammɔ nnini, “Su-ma lɛla lɛni ndubo bɔlɛ na tada lɛdi tedie-nwu kemmo.

²Lɛ kati bute aƒlaga na ava momoomo kalɛ na kadi bekyuli ƒui benu anini, ‘Badubo Babilon buƒie enu enu! Na kɔƒa kɔdubo bana Marduk baƒiɔ bammɔ bukpo na liƒu liƒie-nwu geen na bebo ala ani na bávɔ béte-nwu bɔbwɛ buwi kalɔ ƒui.

³Na Babilonƒuɔ bukpoku bɔmmɔ bɔdubɔsi katɔ kakɛ. Na ama ku bana bebuo ƒui badubo bukeli bɔtɔlɔ na bada ɔma ɔmmɔ bewi ukpludi.’ ”

⁴Unwoti ɔnini, “Amii Israel ku Yuda kadi bekyuli, uwi ɔni na ala amɛni adubɔlɛ ni, bɛdubo buwulo na bɛsɔ binwini bisie kalɔ lɛlɔ na bɛkpa-mi bina Unwoti ku Katɔti.

⁵Bɛdubo Sion ɔma ulu buye na bibo bibasalaku-mi na bunyimi lɛla lɛwɔdi lɛni na bɛsɔ bilayiƒala.

⁶Mina kadi bekyuli, bise aani baƒonu bani na bana lɛlɔ banune bányonu bákya abi lɛlɔ. Na kesii kani na bɛɛtɛ taanwuna muedi bɛ́yiƒala mmɔ.

⁷Ndi bebuo kadikɔ kabuni nte-mii kani na bina bati kuuku básia anu. Nsu bíni-mi, anwuɔsu bina bekisine lɛnɔ bákɛ-mii béƒie aani kalɛ na baaduli ebuo teebweli na bana kayi kátadu-ma kɔtɔ kɔdi.

⁸“Mina kadi bekyuli, bikeli Babilonƒuɔ na bɛlɛ bana kalɔ kemmo! Bitenye bitagya ukyuli ɔdi.

⁹Ndubɔsala kadi bayikune lɛsiku kalɔ kammɔ katɔ kakɛ liboku na bebekpoku Babilonƒuɔ na beƒie-ma enu enu. Kalɛ na beebó kɔtaminta use aani bekpone babuni ƒui kɔtaminta bubo kalɛ na belebo taaƒiɔ.

¹⁰Badubo Babilon lɛlɔ bɔdi na nwuna bekisine beti lɛla biala na baawia batɔlɔku.”

¹¹Unwoti ɔnini, “Lɛlɔ lɛ́yɔ-mii ka bíyu mina bekyuli. Bítuku lɛlɔ ku kudu momoomo aani bapɔnkɔ na bɛɛƒulu taavi ɔmantɛ bakɔ bakɔdi bani muuwila edula ebi.

¹²Ƒula ɔma unengudi ɔni na aayɔ́ aani ƒula uwele ɔdubo kɔƒa bɔdi na unwini aani kalɔ kakwiidi kani nsɔ neeebo lɛblakula.

¹³Mina kɔnyi kɔdubo Babilon bɔkyula na ukyuli ɔdi ɔsɔ ulelie mmɔ. Na liƒu lɛdubɔda ukyuli biala ɔni ndubɔsia mmɔ ɔvi na lɛla lɛni ndubɔlɛ mmɔ ɔsu.

¹⁴Babilon ɔ́ta únye-mi lɛlɔ. Anwuɔsu atula bebone binye bina kunyekɔ kpakplaa na bibo bina atula bibo bina kɔtaminta bɛlɛ Babilon.

¹⁵Bikpo-ma na lɛƒɛnyi lɛlɔ! Babilon úte lili! Bekisine bammɔ báƒɛ-ma awodu ƒui béwi kalɔ ku bana kɔgyumanakɔ kɔmmɔ ƒui. Lɛla lɛni na Babilonƒuɔ bábla lɛma linengudi bamba ni, ami lɛnɔ muudie-ma kasi kammɔ.

¹⁶Ukyuli ɔdi ɔsɔ uuubo Babilon kalɔ lɛlɔ na ɔkya edula adi iye ɔƒɛ adi lɛnɔ. Na baƒɔ bani ƒui nkya mmɔ bátɔlɔ bésie bana lɛma na bekisine bammɔ bɔyia ɔsu.

¹⁷Israelƒuɔ bese aani baƒonu lisu lɛni na bagyata bani na kɔka kɔɔda bábɔku bégyingya. Na Asiria ɔga náka-ma bɔduli kɔkɛ kɔkɛ lɛni asa na Babilon Ɔga Nebukadnesar úbabwɛ-ma ku ekubi ƒui.

¹⁸“Ami Unwoti Ɔyikune Ƒui, Israel Katɔti, lɛ́ni Asiria kɔtu na ndubo Babilon lɛnɔ kɔtu bɔni.

¹⁹Nsu ndubɔsɔku Israel liboku nwuna kalɔ lɛlɔ. Na badubuse aani baƒonu bani ndubunye badi bemo na Karmel Kɔbi lɛlɔ na Basan kalɛkɛ kani nkya Eƒraim ku Gilead abi lɛlɔ kalɔ kemmo.

²⁰Ndubudie Israelƒuɔ ku Yudaƒuɔ nkyuli ɛlɛɛ badi na ndubuti bana ekpidi lɛkyiɛ-ma ɔni na ɔdi ɔsɔ ulanu ekpidi bɔƒiɔ biala bɔdi ka bɔkya-ma lɛlɔ.”

²¹Unwoti ɔnini, “Lɛ́ɛsu Babilonƒuɔ bekisine nnini, ‘Bikpoku Merataim ku Pekod kadi bekyuli. Bɛdu bana ƒui! Na bibile bana ala ani nse-ma ƒui!’

²²Bɛdubunu ka kekpo ku ala bubile kudu kɔda.

²³Babilon nse aani lɛbuala lɛni na bada baawɔ́ kɔlɔ ƒui bekyuli. Nsu ɔƒɛni amu lɛbuala lɛmmɔ lɛ́ƒɛ. Na nwuna kalɔ bubo bɔmɛni bɔ́bla kalɔ kemodi kammɔ ƒui kalɛ kadi!

²⁴Babilon ɔ́kyaku ami Unwoti Ɔyikune Ƒui unyeƒi. Nsu kalɔ lɛlɔ bekyuli bammɔ baaagyi banii ɔ́ɔnu mina kakpagyuɛ kani na lɛ́kywɛ-nwu.

²⁵Lídie mina ekpola keyi na anya na ndubuti lɛbla na ewida asiaku Babilon.

²⁶Amii Babilon bekisine bɛsi ɔlɔgyu kakaaka ƒui bibo! Na bɛsala bana antabi edula udu ƒui bɛsiku bana linwu kemmo na bɛkyula-nya ku ala bamba biala na bebo ƒui.

²⁷Uwi údu ka bani Babilon bekpone bammɔ kɔtu, anwuɔsu bɛdu-ma ƒui.

²⁸Babilonƒuɔ nébile mina kakpakɔ, nsu uwi ɔsɔ uletu asa na ndubudie-ma kasi. Na bekeline bani nási Babilon mmɔ bésie Sion alati ndubo kenye budie na litemi lɛmɛni lɛlɔ.

²⁹“Bikpoku Babilon amii nwuna bekisine atula bebone. Na bɛbla kakyakɔ bɛmana ɔma unengudi ɔmmɔ. Na bitaya na ɔdi biala ukeli ɔtɔlɔ. Babilon ɔ́ta na únye ɔ́siaku ami Katɔti kedee. Anwuɔsu ala ani na ɔ́bla lɛma linengudi bamba ni, amii lɛnɔ bɛbla-nwu lɛni kani.

³⁰“Ami Unwoti nése kenye ka amii Babilonƒuɔ bekpone babuni ƒui muedi badubo bukpi buwi bina lɛblɔnu lɛlɔ.

³¹Babilon, ɔlɛka basia-a lɛnyi banii, ‘Lɛlɔ Katɔ Ɔtalane.’ Nsu uwi údu na ami Unwoti Ɔyikune Ƒui lɛni-ɔ kɔtu.

³²Aatalaku lɛlɔ katɔ, nsu adubo butulo na ebuli na ɔdi biala ɔɔɔdubo-ɔ bubunku na ata. Na ndubɔya na batu ogya bakya ƒula akpaklɔ lɛma ƒui. Na lɛla biala náka lɛ́mana-a lɛdubo butaada ogya.

³³“Babilonƒuɔ bábla Israel ku Yuda kalala. Bɛ́kpanku-ma bɛ́tɔlɔku aani bekyuli beƒiedi na bíni bɛnii bɛɛɛdubo-ma kuƒi bute na benwini batɔlɔ.

³⁴Nsu ami Unwoti Ɔyikune Ƒui ndubo-ma budie na lɛya na bakɛ keyi buɛɛ na bana kalɔ kemmo na bukpoku bubo amii lɛlɔ mmomu.

³⁵“Líte ulu ka kekpo kekpo amii ku bina benengu ku bina kasusu bakyane ƒui.

³⁶Na kekpo kamɛni ndubɔya na bɛti ka bina kenye bediene badi ɔkɔ banyine ku badɔlɔdi. Na kekpo kammɔ kadubo bina bekpone liƒu bɔda geen.

³⁷Na bina bapɔnkɔ bani mɔɔní bina kɛɛkɛ ku baƒɔ bani na bakya bina bekpone akɔ badubuni na belésie kekpokɔ. Na bekisine badubuti bina akɛla biala na bibo batɔlɔku.

³⁸Na bina ntukpa ku ntu bɔni na bɛ́bwɛ ulu bíte ka butaavi ƒui bɔdubo bɔkwii. Na ala amɛni ƒui adubɔlɛ lɛni na baƒiɔ ala ani náƒɔ bina kalɔ kammɔ lɛlɔ ƒui na ábla-mii bɔdɔlɔdi ɔsu.

³⁹“Na ka ɔ́si ɔƒɛni úsela ni, bekyuli basɔ baaadubo ƒula kalɔ lɛlɔ bulie, amu ntu beƒukutu ku ketele kakɔ kakwiidi bebuo ku baasɛ bani muusé lɛlɔ kani.

⁴⁰Lɛ́kyula Sodom ku Gomora ku lɛma lɛni na lide-ma ƒui. Na lɛni kani na ndubo Babilon lɛnɔ bɔkyula kede kede. Na ukyuli biala ɔdi ɔsɔ ɔɔɔdubo mmɔ bulie.

⁴¹“Bɛnu! Ɔ́si ɔgyu kakaaka na kalɔ kammɔ katɔ kakɛ ni, kadi bekyuli bayikune badi ku baga pii báata bátu akpagya na benye kagyumana ka bebekpo.

⁴²Bada kɔtaminta ku atula ku kuwii. Na bekpone bammɔ bebo kalala na balanu kɔnyana lɛnɔ. Na bana bapɔnkɔ bɔnya kɔku kɔda momoomo aani kalɔ na ɛpu uubó teebewi ketudɔ. Bekpone bammɔ benye sininii badubo bebekpoku Babilonƒuɔ!

⁴³Na ɔ́si ɔni na bina ɔga únu kekpo kamɛni kɔku kani na kɔyɔ ku liƒu líƒie-nwu. Na uususu lɛlɔ na uulii lɛlɔ aani ɔƒɔndane ɔni ntɛ kɔwɔ.

⁴⁴Ndubo awɔ Babilon bukpoku aani kalɛ na gyata ɔɔsí lɛku kemmo teebekpoku baƒonu bani nnye kadikɔ na Yordan kɔtu. Na ulaƒɔ uwi ɔdi asa na baƒonu bammɔ beekeli taatɔlɔ na bada kalɔ kammɔ bese ukpludi. Ɔma na ndubo bɔƒuna na ukpoku-ɔ? Ami ɔlati ndubo-ɔ bukpoku! Ɔsika ɔdi ulakana-mi bunye bɔsiaku na kekpokɔ iye ɔbɔku-mi na likeli lɛtɔlɔ.

⁴⁵Bise atu na binu lɛla lɛni na lɛ́ɛlɛ ugyii líse na amii Babilon bekyuli lɛlɔ. Badubo bina bebi ɔbuli bɔkya bɔni bɔtɔlɔku na babwɛ bina kalɔ kemodi kammɔ ƒui.

⁴⁶Na bekyuli badubunu kɔku na kadi bekyuli ƒui akɔ na kalɔ kammɔ kakunku.”