Read Lelemi Yeremia 51 Bible Online

Yeremia 51 - Lelemi bible

Yeremia 51

¹“Ami Unwoti ndubuti kɔyu kɔni muubile ala aani ɔƒɛƒɛɛ limene na ubayila amii Babilonƒuɔ udu ku bina ɔma unengudi ɔmmɔ.

²Bekpone bani na badi baƒɔ badubɔsi lɛƒɛnyi ƒui lɛlɔ bebo. Na si uwi ɔni na ɔgbankpi ɔmmɔ kenye kávi ni, Babilon ɔdubɔsɔ uwi ukpludi ɔni na ɔsɔ uuubo lɛla lɛdi bɔbla lɛnɔ.

³Na ndubɔsu bekpone bammɔ nnini, ‘Bikpo-ma kɔnakunwi asa na Babilonƒuɔ bataabu bana kɔtaminta iye bakya bana ekpola. Na bɛdu bana bekpone babuni bammɔ ƒui!’

⁴Bana bekpone lisu lɛmmɔ ƒui badubo bubuli bubi Babilon lɛblɔnu lɛmmɔ lɛlɔ na baƒɔ lɛlɛ ƒui.

⁵Ukyuli biala na Israel ku Yuda ƒui bábla ekpidi na báƒiɔ, nsu ami bana Unwoti Ɔyikune Ƒui lɛɛɛdubo-ma buni.

⁶Bɛvi bɛlɛ Babilon! Na bɛƒɔ bina lili ngba! Nsu si bɛ́ƒɔ lɛlɔ bɛkya mɛni bɔdi ni, bɛdubo bukpi si uwi ɔni na muudie ɔma ɔmmɔ kasi na mɔɔní-nwu kɔtu na nwuna ekpidi ani na ɔ́bla ɔsu.

⁷Babilon úse úte-mi aani sika ugyiedi ɔɔƒɛɛ ɔni kemmo na mina kɔnyi kúyi tɛtɛɛtɛ. Na kalɔ lɛlɔ ƒui kadi bekyuli báni ntɛ bɔmmɔ békpi na basɔ beleti kasusu kadi.

⁸Nsu uwi uletu asa na Babilon ɔdubo bubuli na ɔyii udu. Ami Unwoti násu baƒɔ bani nkya mmɔ nnini, ‘Biwulo bite ɔma ɔmɛni! Na bɛƒɔ kuvo bɛsia-ma alɛbi ani nsia-ma lɛlɔ. Ɔƒɛni kalɛ lɛdubɔsa-ma.’

⁹“Baƒɔ bammɔ bédie kenye banini, ‘Bɔ́ɔsia-ma alɛbi ammɔ kuvo, nsu ébulo bɔsa. Bibo na bula ƒui bɔtɔlɔ buteesie bula ɔma. Lɛla biala lɛsɔ liiibo Babilon. Ala ana ƒui áyii udu.’

¹⁰“Mmɔ na Israel kadi bekyuli básu banini, ‘Bɛsu ukyuli biala na Sion ka Unwoti údie Babilon lɛla lɛni na ɔ́bla-bu kasi.’

¹¹“Ami Unwoti mɔɔwia ka bayila Babilon udu, ɔsika nwuna bekpone báyila mina kadi bekyuli udu. Na bébile mina kakpakɔ. Anwuɔsu amii Media baga bɛdɔ bina atula na bɛgyu bina agyumanala bɛda.

¹²Na bɛkɔliku bina kati bute aƒlaga katɔ na bitaaƒɛ ɔma unengudi ɔmmɔ awodu. Bimene bagyumane bibu. Na bɛya na bekpone bataanu ɔma unengudi ɔmmɔ lɛlɔ. Na bɛbla kɔbɛkɔ kesii kani na bɛdubunye bitaatu ɔma ɔmmɔ. Ami lɛ́ɛbla kasusu ka ndubo ɔma ɔmmɔ udu bɔyila na lɛla lɛdi lɛsɔ liletile-mi kuƒi.

¹³Amii Babilon bekyuli, amii nli Euƒrate Ketu amadɔ na ntu bɔni na bɛ́bwɛ ulu bíte bɔ́ka bɔ́mana-mii. Na bibo lɛkɛ, nsu ɔƒaamu bina uwi údu ka bikpi.

¹⁴Ami Unwoti Ɔyikune Ƒui nkɛnku ami ɔlati mina lɛlɔ líse kenye ka bekisine bekpone badubɔƒɔ ƒula lɛblɔnu lɛlɔ aani baalɔlɔ. Na badubo kudu buteebo taakɛ lɛlɔyɔ ka bádi-mii lɛlɔ ɔsu.”

¹⁵Katɔti úti nwuna lɛnunda ku ɔyikun na údie kalɔ ku kayaa ala ƒui.

¹⁶Eedie lɛdi teete ntu bɔni na áya na bɔƒa kayaa na buudu ku kɔku bonwu. Na liƒlukutu lɛɛdá taalɛ kayaa. Aayá na ɔƒɛƒɛɛ ɔɔsí ƒula kesii kani na áklibi ala ése teebekpo. Na kayaa kemodi kaabwɛ ogya si ɔnantu ɔɔna.

¹⁷Bekyuli bani mɔɔnwí na baavɔ́ ala teese lɛlɔ aani baƒiɔ bádɔlɔ! Badubo bana lɛnunsia bɔyila na enu aƒɛ-ma, ɔsika bana ɔkɔ bɔnyi baƒiɔ bammɔ balakana bɔnwuna.

¹⁸Baƒiɔ badi aƒiankula ku amala na si uwi ɔbuni úbo ubedu ni, badubo-ma udu bɔyila ƒui.

¹⁹Nsu awɔ Israel Katɔti ni, eeese lɛni. Awɔ nédie ala ƒui na áƒuna Israel kadi bekyuli na badi awɔ badi geen. Ƒula lɛnyi ndi Unwoti Ɔyikune Ƒui.

²⁰Unwoti ɔnini, “Babilon, awɔ na lɛ́da aani lɛbuala lɛni na muubó ala, na awɔ na líti ńtaawɔ kadi ƒui bekyuli na lɛ́bwɛ lɛga kɔdikɔ.

²¹Na lítu bekpone bani nkɛ lɛgba ku bani ndanku kɛɛkɛ lɛ́bwɛ.

²²Na banana ku beleku banamu ku benengu ƒui lɛni kani na lɛ́bla-ma.

²³Baƒonu badane ku bana bebuo lɛnɔ ku bemonsene ku bana bebuo bani mɔɔtuma teete-ma lɛnɔ bátalɛ-nwu kemmo ku aban bagadine ku bana benengu ƒui.

²⁴“Nsu ɔƒaani ni, mina bekyuli badubunye banu uwi ɔni na muudie-mii kasi na kalɛ na bɛ́bla Sion kenye.

²⁵Bɛ́yila kadi bekyuli pii udu na kalɛ na bɛɛnu lɛlɔ ka bibo ɔyikun aani kɔbi ɔsu. Nsu ami nénwini bina ukisine ɔƒaamu. Na lɛkana na liƒie-mii na libo-mii lɛsiku atakpɛ lili mbaƒiɛmi kalɔ. Na si uwi ɔni na lɛ́wɔlɔ ala ani ƒui na nnii mɔɔbla ni, bɛdubunwini aani atimbɔ ani na bébo béwi na ɔƒɛ úƒi-nya.

²⁶Na bina atabi ani na bɛ́nwi bíse mmɔ ni, ɔdi ɔsɔ uleti-nwu ulenyimi kowodu likpo iye beti bakya kowodu ɔka kalɔ. Na muusé kenye ka ɔ́si ɔƒɛni úsela uwi ƒui ni, bɛdubunwini aani kalɔ kakwiidi. Ami Unwoti násu.”

²⁷Unwoti ɔnini, “Bite kalɔ bekyuli bɔti na benye kagyumana kalɛ na betékpo. Na bɛkɔliku kati bute aƒlaga katɔ na bɛvwi lise. Na bɛtala na betétiku bekpone basiku Ararat ku Mini ku Askenas. Na bɛƒuna bekpone ɔtɔnkune na bɛya na bekpone bani nkɛ lɛgba batɔ kekpo aani baalɔlɔ lisu bonwu kalɛ.

²⁸Bɛsu baga ku aban bagadine bammɔ ku batɔnkune ku Medes lɛga kɔdikɔ bekyuli bammɔ ƒui bɛnii baklibi lɛlɔ bete kekpo!

²⁹Kalɔ kemodi kammɔ kakya lɛbibo kemmo na kenye kelii na keesusu lɛlɔ. Ɔsika lɛ́ɛlɛ ugyii ka lɛya na Babilon unwini kalɔ kakwiidi kesii kani na ukyuli biala ɔsɔ ulakana bulie na nsɔ lɛɛɛdubo mina kasusu bɔvumana.

³⁰Babilonƒuɔ bekpone báyila bana ɔyikun ku ɔtɔtɔ na báƒɔ lɛlɔ bakya bana kagyumanakɔ lɛtɔ kemmo na balakana na bekpo uwi ɔni na bana bekisine baabwɛ bana ɔma awodu taasia ɔban kenye teeduo-ma lɛlɔ na baatu ogya taakya bana kɔduli.

³¹Na batu basiaku lɛlɔ atɔ asia na beete kati ka bádi Babilon lɛlɔ na béƒie-nwu báƒɔ!

³²Na kesii kani ndi ketu kaviakɔ mmɔ ni, bekisine mɔɔdi mmɔ lɛlɔ! Na bátu ogya bákya ketu alakpi kangyaa ani nse na ƒula bekpone bágyini benye.

³³“Ami ndi Unwoti Ɔyikune Ƒui, Israel Katɔti, na ami muusé kenye kamɛni nnii uwi ɔsɔ uletu asa na badubutu Babilon babwɛ bewi kalɔ kpɛtɛ kpɛtɛ na mmɔ kabla tataata aani kakpa kesii kani na beewiile kamu teewi.

³⁴“Yerusalem, bɛsu bɛnini, ‘Ɔga Nebukadnesar ɔ́ya na bɔ́gyini. Liƒu kebweyi kammɔ kéti-bu ku bula akɛla kése lɛlɔ lɛmwi na abu bɔ́sɔ bɔkya ukpludi. Úti-bu ala ani na ɔɔwia úbweli na útuo akladi úwi.

³⁵Na Babilonƒuɔ bákya abu badi ɔlɛ na bádu bakladi. Na ɔƒɛni ni, Unwoti ɔ́ya na báƒɔ kayu kammɔ!’

³⁶“Mina kadi bekyuli, nnye nte-mii na bina kakɛ na ndubo Babilon kasi budie. Ndubo-ma kuƒi butile na basɔ balákɛ ntu kedukɔ, ɔsika bana ketu kadubo bɔkwii.

³⁷Babilon ɔdubunwini kebu alakpi ɔlɛ lisu kesii kani na beƒukutu kani ndubo mmɔ bulie. Bekyuli badubo-ma bɔma, nsu badubo bɔyia lɛnɔ ka besie bavi kebu alakpi ammɔ kemmo.

³⁸Babilonƒuɔ badubo butaakwanyi na beteebo adi aani bagyata bebi.

³⁹Na ka kɔka mɔɔda-ma ɔsu ni, ndubute-ma na badi na bakɛ lɛlɔyɔ na ɔmmɔ kama na lɛya na balɛɛ lɛlɛɛ linwi na basɔ balata!

⁴⁰Ndubo-ma bɔtɔnku na betékpi aani baƒonu ku bese bani na béti béselaku bekyuli bani mɔɔdú-ma teeye.

⁴¹“Ɔƒaamu kadi bekyuli ƒui bimwi Babilon. Nsu si uwi ɔni na béƒie-nwu báwɔlɔ ni, liƒu lɛdubo kadi bekyuli bammɔ kani bɔda geen.

⁴²Na Babilonƒuɔ bekisine badubo bɔta aani ɛpu avlɔvɔ na baƒɔ ɔma unengudi ɔmmɔ kemmo ƒui.

⁴³Na ala bubile kpakplaa bɔdubuse kalɔ na lɛma lɛni na adɔ kemmo. Na kalɔ kammɔ ƒui kadubo bunwini kalɔ kakwiidi kesii kani na ukyuli ɔdi ulakana bulie iye besie bavi kemmo muedi.

⁴⁴Na ndubo Babilonƒuɔ baƒiɔ bani baalɔ Marduk kɔtu bɔni geen na lɛya na ɔdala lɛla biala na ɔ́ƒɔ úbweli. Na kadi bekyuli badi basɔ beleboku-nwu etela adi. Na Babilon awodu adubo bɔƒɛ búwi kalɔ.

⁴⁵“Mina kadi bekyuli, bɛvi bɛlɛ Babilon ɔma kemmo na bɛƒɔ bina lili ngba asa na lise kalɔ ntaabwɛ ɔma unengudi ɔmmɔ na mina kɔnyi kemmo!

⁴⁶Bɛsɔ bitayia na bɛyila lɛnunsia lɛnɔ ina ka atɛ keeke ada lɛkwa ndi lɛkwa banii bɔtɔnkune baata teenye teekpoku lɛlɔ na ɔni madi lɛlɔ na Babilon ɔsu.

⁴⁷Uwi ɔdubo ɔni na ndubo ɔkɔ baƒiɔ bani nkya Babilon kɔtu bɔni. Na ukyuli biala ɔni na ɔkya mmɔ ɔdubo bukpi na kɔƒa kukpo ɔma umodi ɔmmɔ.

⁴⁸Uwi ɔni na bekpone badubɔta basi katɔ kakɛ bebebile ala ni, katɔ ku kalɔ ku ana ala ani nkya-nya kemmo ƒui badubɔkɛ lɛlɔyɔ.

⁴⁹“Ɔlɛka bekpeli Babilon bebo, ɔsika ɔ́du Israel ku kadi bamba bekyuli pii.

⁵⁰Mina kadi bekyuli, bíkeli kukpi uwi ɔni na Yerusalem úbuli. Na ɔƒaani ni, bɛdubɔkya ɔgyu kakaaka bɔsiku bina ɔma, nsu bɛƒɔ-mi bɛdi na bina kasusu kasia Yerusalem lɛlɔ. Bɛtɔlɔ Babilon! Na bitakya mmɔ!

⁵¹“Kɔƒa kuukpó-mii na bɛɛnu bɛnii bina anumi éwi kalɔ ka baƒɔ béduo mina kakpakɔ kedee ɔsu.

⁵²Uwi ɔsɔ uletu asa na ndubɔya na kekpo kekpo Babilon na liti lɛni nwuna baƒiɔ bani na bábla bete lɛlɔ kɔtu na lɛya na bana bekyuli bani náƒɔ lɛlɛ basɔ batɛ beteedumo na kesi kesii.

⁵³Ina ka bátu Babilon awodu bákɔliku katɔ katɔ kakaaka muedi ni, bekpone bani na ndubo bumene badubo ɔma unengudi ɔmmɔ bɔbwɛ ƒui. Ami Unwoti násu.”

⁵⁴Unwoti ɔnini, “Binu kɔvanu kɔni nda Babilon kesii biala na beevele ka bekyuli bebunku-ma ka baabwɛ ɔma unengudi ɔmmɔ.

⁵⁵Nsu bekisine bammɔ bɔkwanyi bɔni nse aani kalɛ na ɛpu uubó momoomo ɔdubɔyila Babilonƒuɔ buvele kɔvanu kɔmmɔ uwi ɔni baabwɛ ɔma unengudi ɔmmɔ teewi kalɔ kpɛtɛ kpɛtɛ.

⁵⁶Ukisine ɔdi ɔdubo ubekpo Babilon na ɔyila-nwu udu. Na badubuƒie nwuna bekpone na baƒɛ bana ekpola, ɔsika ami ndi Katɔti ɔni muudie kadi biala bekyuli kasi na ala ani na bábla ɔsu.

⁵⁷Ami Unwoti Ɔyikune Ƒui ɔni ndi Ɔga geen ɔmmɔ, muusé kenye ka Babilon benengu ku bana kasusu bakyane ku aban bagadine ku batɔnkune bammɔ ƒui badubo bɔlɛɛ aani ntɛ mɔɔda-ma na basɔ baaadubo bɔtɔ kudii.

⁵⁸“Na badubɔƒɛ bana awodu bonwu bonwu ammɔ ƒui bewi kalɔ na batu ogya bakya lɛban kɔyakun kɔmmɔ. Na ala ani ƒui na bábla kabla ku lɛnungyie bákɛ ƒui badubo-nya bɔkyula na uyɔ utaakɔ ka teesie katɔ.”

⁵⁹Na lɛkwa linedi kemmo uwi ɔni na Sedekia ɔɔdi lɛga na Yuda ni, úsie Babilon anwu ku Baruk ɔnwani Seraia ɔni ndi Neria ubidi na ɔdi Maseya uwɔ ɔni Yeremia ɔ́su ka ubunku na ɔnu ɔga keduokɔ ala lɛlɔ.

⁶⁰Asa na badubɔyu ulu ni, línweni ɔgbankpi ala ani ndubɔlɛku Babilon lɛ́sia kakunkɛ kadi lɛlɔ.

⁶¹Na líti-ka líte Seraia na lɛ́su-nwu nnini, “Si bíduo Babilon ni, na aka ɔku ɔmɛni momoomo ete bekyuli bammɔ na benu.

⁶²Na akpali Unwoti evele anini, ‘Bula Unwoti, ése kenye ka adubɔkyula likpo lɛmɛni na ɔ́ta unwini kalɔ kakwiidi kani lɛlɔ na ukyuli ɔdi iye bebuo lɛnɔ basɔ belelie kudii.’

⁶³Si áwɔlɔ Katɔti bɔkpali lɛni ni, na ebo ɔku ɔmmɔ ada lɛtakpɛ lɛdi lɛlɔ na ebo atákya Euƒrate Ketu kemmo na asu anini,

⁶⁴‘Lɛni na Babilon ɔdubo bɔnyi busie kalɔ kalɔ si uwi ɔni Unwoti ɔdubo kalɔ kammɔ bɔkyula. Na ukyuli biala na ɔma unengudi ɔmmɔ kemmo ɔdubo bukpi balákɛ ɔyikun ɔni na basɔ benwini bebo ngba.’ ” Yeremia ala ani na únweni ni, édu kawɔlɔkɔ.