Read Lelemi Yeremia 6 Bible Online

Yeremia 6 - Lelemi bible

Yeremia 6

¹Unwoti ɔ́su ɔnini, “Amii Benyamin kɔdua bekyuli, bikeli bɛlɛ Yerusalem na bɛƒɔ bina ngba. Na bɛvwi lise na Tekoa ɔma kemmo na bɛsala ogya ɔni madi kati bute ogya na Bet-Hakerem. Uwi ɔsɔ uletu asa na ɔgbankpi ɔdubɔsi kalɔ kammɔ katɔ kakɛ ubeyu-mii ɔtu.

²Yerusalem ɔdi bebuo kadikɔ kabuni, nsu baƒonu badane badubɔka bamana-nwu na bele kalɔ kammɔ ƒui bete lɛlɔ,

³na bana baƒonu bakun livo bedie-ka lɛlɔ ƒui.

⁴“Na baga bammɔ badubɔsu bana bekpone banini, ‘Si búduo Yerusalem ɔtanta ni, na ɔƒiiwi na bɔdubo-ma bukpo. Na si bɔ́kpɛ kama asa na bútéduo ni,

⁵na kadi kadubuti kawɔlɔ ƒui asa na buse kalɔ beteekpo-ma na bɔbwɛ bana kɔgyumanakɔ kpakplaa kɔni na bátu mmɔ.’

⁶“Ami ndi Unwoti Ɔyikune Ƒui na ndubo lɛdi budie bute bekpone bammɔ na bada egyii bava kalɔ na benyimi ligyii lɛmmɔ babla kakɔkɔ bamana Yerusalem awodu ammɔ ƒui kesii kani na badubunye bekpo ɔma ɔmmɔ. Ndubo amii Yerusalemƒuɔ kɔtu bɔni na bina etemila tatɛ ulu siin lɛlɔ ɔsu.

⁷Ekpidi bɔbla bɔ́yu búnye ɔma ɔmmɔ aani kalɛ na libiɔ ntu bɔɔyu teenye libiɔ kemmo. Kalala bɔbla ndi kɔku kɔni mɔɔlɛ́ taasi awodu ani na bɛ́tu bɛ́mana mmɔ kemmo. Na bekyuli bani na bɛɛbla ala amɛni badi békpi bewi na bani lɛnɔ báƒɔ lɛlɛ batɛ kesi kesii.

⁸Amii Yerusalem ku Yudaƒuɔ, bise atu na binu, ndubo-mii atu budie na bina kalɔ kenwini kalɔ kakwiidi na kasɔ kewi ukpludi.

⁹“Ndubo bina bekisine bɔsu na bekpeli bina lɛla biala baƒɔ aani kalɛ na beedé egyiibi teedie kugyii lili ƒui kede kede. Ami Unwoti Ɔyikune Ƒui násu.

¹⁰“Ami Unwoti lɛ́ɛsu bekyuli bamɛni ka ndubo-ma kɔtu bɔni, nsu bɔma kani na baamá-mi, na bébulo banii belenu-mi litemi na badi-ni lɛlɔ.

¹¹Ƒula kɔnyi kɔni na ákɛku Yudaƒuɔ ɔ́ya na mina lɛlɔ kemmo kaada aani ogya, na nsɔ naaakana ɔkplu bɔkya, na ɔmmɔ ɔsɔ ɔkya-mi lɛlɔ kemmo lɛni.” Unwoti ɔnini, “Tetile-mi kɔnyi ulu! Ya na kubo bekyuli ƒui lɛlɔ, banamu bani nli kaƒiakɔ ku benengu ku bakɔdi ƒui lɛlɔ.

¹²Ndubo Yudaƒuɔ kɔtu bɔni na liti bana kɔduli ku mmo lite bekyuli bamba ku bana beleku ƒui. Ami Unwoti násu.

¹³“Bawabane ku balakɛne ƒui ɔdivo bɔdi ku litemi geen tasu kani náƒɔ bana ƒui lɛlɔ kemmo. Na kenye bediene ku bakpane muedi baaadi bekyuli bani na basɔ beti kayi basia.

¹⁴Na kayi kekpludi kani na beesé mina bekyuli bani muunú ɔlɛ geen ka keyi kadubɔyɔku-ma.

¹⁵Ɔlɛka kɔƒa kuteekpo-ma na bana ekpidi ani muusé lɛlɔ mmɔ ɔsu. Nsu bana anumi aláƒalɛ lɛla lɛdi munu munu. Anwuɔsu si nnii mɔɔní Yudaƒuɔ kɔtu ni, bana kɔwɔlɔkɔ ndi kukpi na bana ƒui badubo bubuli bɔtɛ kalɔ na bekpi ƒui aani bekyuli bamba kalɛ. Ami Unwoti násu.”

¹⁶Unwoti ɔ́su ɔnini, “Uwi ɔni na bísie bítédu elukpo ni, lɛ́su-mii nnii, ‘Bɛsia ulu ɔni lɛlɔ na bina bati kuuku básia na bɛdubulie ku keyi buɛɛ.’ Nsu bíni.

¹⁷Na lɛnɔ ni, lɛ́tala kenye bediene lɛ́kya-mii nnii babalɛ-mii kpakplaa na ɔgbankpi ɔni ndububo-mii lɛlɔ lɛlɔ. Nsu uwi ɔni na beebó kudu ka binu-ma kenye kani na badanku ni, bítese atu.

¹⁸Anwuɔsu lɛ́su kadi bekyuli ƒui nnini, ‘Bitaanu lɛla lɛni na ndubo bɔbla!

¹⁹Mina bekyuli bédie-mi atu na béni mina ɔda bubo. Bábla kasusu ka bataabla likpidi. Na ɔƒaani ni, likpidi kɔkwɛ ala ani na bábla ala ndubo-ma bɔlɛku.

²⁰Amii Yudaƒuɔ, bɛda oloƒui bɛ́siku Seeba kalɔ lɛlɔ bíboku-mi ku kutu akyala ƒɛƒɛɛ ani na bɛ́siku kalɔ ɔgyu kakaaka bíboku-mi. Na bɛɛbla akpala lidu lidu lɛnɔ. Nsu bi ɔsu na binye biikpóku lɛlɔ lɛni? Bina etela ammɔ ƒui adi ala ani muusé-mi lɛlɔ na muukisi-nya geen!

²¹“ ‘Anwuɔsu ndubo ala buti bɔda-mii ulu lɛlɔ. Na ukyuli biala ɔdubo bukpi amii bawɔne ku bebi ƒui ku badukɛne ku bakpana ƒui.’ ”

²²Unwoti ɔnini, “Ɔ́si ɔgyu kakaaka na kalɔ kammɔ katɔ kakɛ ni, kadi bekyuli bayikune badi báata bátu akpagya na benye kagyumana ka bebekpo.

²³Bátu akpagya kaduɛ na bebo kalala na balánu kɔnyana. Na bana bapɔnkɔ bani mɔɔƒulu kɔku kuse aani kalɛ na ɛpu uubó ku kɔku teebewi utubli. Yerusalem ɔbuni, bekpone bamɛni badubo-ɔ bukpoku.”

²⁴Mmɔ na bekyuli bammɔ básu banini, “Ɔni na búnu-ma kɔku kani na bula lɛlɔ kemmo kése kalɔ kaatɔ́ ku liƒu na bunye buuliiku lɛlɔ aani uleku ɔni ntɛ kɔwɔ.”

²⁵Unwoti ɔnini, “Bitesie bina mmo bɛnii bitátuma iye bɛkɛ ulu lɛlɔ bitaavi muedi, amu bɛdubuduo ɔgbankpi kemmo ɔƒɛni kani. Bina bekisine bátu akpagya geen bakɛ kesi kesii.

²⁶Beeyú bekyuli teekpoku-ma ɔni na baaagyi beeese. Anwuɔsu ni, mina bekyuli, bise kalɔ biteewulo kɔnyana ku keku aani si bina ubi unwi pɛ ɔdi nékpi. Na bɛda lɛlɔ ku ala ani mɔɔtina ka biiwulo kɔnyana na bɛtɛ biteebo teeminime ntɔ akɔ.”

²⁷Unwoti ɔnini, “Yeremia, tákɔku mina bekyuli nu aani kalɛ na baanu lɛbuala bɔdia.

²⁸Na adubɔnu ka bebo ɔkplu geen aani abuala egyiedi ku atonwudi. Na badi bekyuli bani mɔɔta teenye-mi lɛlɔ na ɔkɔ kani na baanyi uwi ndi uwi.

²⁹Bakana na baƒɔ sika ɔƒualadi na ɔbla sɛɛn na ogya lɛyu kemmo.

³⁰Nsu mina bekyuli bebo kalala geen ɔni na basɔ balakana bɔbla sɛɛn. Anwuɔsu líni-ma.”