Read Lelemi Yeremia 9 Bible Online

Yeremia 9 - Lelemi bible

Yeremia 9

¹Si bunwini na mina anumi enwini imii ku libiɔ na nteewulo usien ku ɔƒɛ na mina bekyuli bani na bádu ɔsu nka ɔdia-mi.

²Na si busie na ndubɔkana na lisie kalɔ kakwiidi lɛlɔ ntábɛ, na lɛlɛ bekyuli bekpidi bamɛni akɔ ɔkɔ banyine bani naaasiaku Katɔti kama siin kudɔ nka ndubɔyɔ.

³Unwoti ɔnini, “Ɔkɔ etemila aalɛ́ mina bekyuli kenye aani kalɛ na beebó atula taalɛku kataminta kemmo. Na ɔkɔ ala bɔbla ɔyikun kani mɔɔkɔ́-ma katɔ na ɔdi ulaƒɔ enu taasu ɔnii ami ndi Katɔti.

⁴“Yeremia, ɔkɔ etemila kani na ƒula bakpana ku lɛlɔ bekyuli ƒui baasu taasiku-ɔ lɛlɔ. Anwuɔsu teti ƒula anu tasia-ma lɛlɔ.

⁵Lɛlɔ kani na bakɛ beetú taavi uwi ƒui taawia ulu bamba ɔni lɛlɔ na basia banya bana bakpana bakya.

⁶Ukyuli biala ɔɔwia ka ɔkɛ ɔkpanadi lɛlɔ kɔsia. Na ɔdi biala uláwia ka ɔƒɔ enu ɔnii ami ndi Unwoti.

⁷“Anwuɔsu ndubo mina bekyuli kɔnyi bukpo na lɛƒɔ-ku lɛbla sɛɛn aani kalɛ na baakya sika ugyiedi ogya kemmo taaƒɔ-nwu na ɔɔbla sɛɛn. Nsɔ liiibo ulu bamba ɔdi lɛlɔ na ndubo bɔsia.

⁸Bani baawia keyi buɛɛ, nsu bana ɔkɔ ɔni na baanyi kenye kebo ɔbi na ɔɔdú ukyuli teetulo lɛtula lɛni na beebó taalɛ ukyuli na ɔɔɔgyi uuuse.

⁹Lɛ lɛla lɛdi lɛnumi te-mi na ɔdi kasusu kabuni kani ɔsu na bekyuli bamɛni bátamanku kɔtu bɔni? Ami Unwoti Ɔyikune Ƒui nátɛmi.

¹⁰“Muuwulo teete bebuo kadikɔ kani na kakya abi lɛlɔ. Likpo lɛmmɔ lɛ́kwii na livo lɛbuni lɛdi lɛsɔ liiibo mmɔ, ɔsika ɔƒɛ ɔ́kyula lɛla biala na belusiene muedi basɔ balásia mmɔ. Na Ɔmantɛ bebuo ku alakpi akɔ bebuo ku baasɛ ƒui báyii na badi basɔ beeebo mmɔ.”

¹¹Línu ka Unwoti uudie kenye ɔnini, “Si uwi ɔni na lɛ́wɔlɔ ku Yerusalem ku Yuda lɛma ƒui ni, mmɔ kadubɔsɔ kewi ukpludi aani alakpi lisu kesii kani na beƒukutu kani ndubo mmɔ bulie.”

¹²Lɛ́su Unwoti nnini, “Bula ɔdi ulénu kalɔ lɛla lɛni ɔsu na kalɔ kammɔ kénwini kesii kani na ukyuli ɔdi ɔsɔ ulásia taavi lɛnɔ. Ɔdubɔkana na edie kalɔ ete-bu?”

¹³Mmɔ na Unwoti ɔnini, “Líbile kalɔ kammɔ na káyii udu, ɔsika bekyuli bammɔ bátadi mina litemi lɛlɔ na béni mina ɔda bubo ku ala ani na mɔɔtina-ma.

¹⁴Bábla atuɔkplu na bakya baakpá Baal baƒiɔ aani kalɛ na bana bati kuuku bábla.

¹⁵Ɔmmɔ ɔsu na ami, Unwoti Ɔyikune Ƒui, Israel Katɔti, líse kenye ka ndubo-a ugyulo ukpidi bute na bani na libile adila lite-ma na badi likpila.

¹⁶Na ndubo-ma bugyingya bɔkya na lɛbɔku-ma ntákya kaƒɔ kakaaka kesii kani kɔku na ama ku bana bati kuuku bétenu kudii. Na kawɔlɔkɔ ni, ndubo bɔya na bana bekisine bekpone bebo babadu bana bekplodi ɛlɛɛ bani mebu.”

¹⁷Unwoti Ɔyikune Ƒui ɔnini, “Bɛtala na betétiku beleku bani mɔɔtu lɛkwanu teewulo keku na baƒɔ-ma kayu na bebo. Na bɛwia bani geen na ngyi-nwu kemmo kaduɛ mmɔ.

¹⁸Na bekyuli bammɔ lɛnɔ bátuna kɔnakunwi banini, ‘Bɛya na beyile bubo na bebewulo bete-bu utédu uwi ɔni na abu lɛnɔ bula anumi adubɔƒɔ imii.’

¹⁹Bɛya na abu bani nkya Sion buteewulo momoomo na bɔsu bɔnii, ‘Bɔ́yii udu ɔƒaamu! Na bulakana kɔƒa kɔmɛni udu kenye bunye. Ɔsika bábwɛ-bu kɔduli ƒui na bábɔku-bu bálɛku bula kalɔ lɛlɔ.’ ”

²⁰Na buuvele amii beleku bani muudie lɛnu lɛmmɔ bɔnii bɛsia lɛla lɛni na Unwoti ɔ́su anu kaduɛ. Na bɔdubɔtina-mii ɔkwanu ɔni na bɛdubuti bɛtina bina bebi belekubi ku bakpana.

²¹Bɔkya bula kɔgyumanakɔ kpakplaa kɔni na bɔ́tu kemmo, nsu kukpi kúyu kɔ́sia kúduo-bu lɛlɔ na kɔ́du bula banamu bani nli mɔɔƒia muedi ku bula bakloƒu bani mbo ɔyikun betulo ƒui.

²²Unwoti ɔ́su-bu ka bula bekyuli badubo bukpi buwi kalɔ ƒui bɔka bɔmana aani kalɛ na kamu kaayɛɛlɛ teewi kalɔ na bátanwa-ka iye alakpi ani na bébo béwi kalɔ na ute-ka lɛmwi.

²³Unwoti ɔnini, “Ɔdi biala utakun lɛmɛnɛ na nwuna lɛnunda iye ɔyikun iye lɛkɛ lɛlɔ.

²⁴Na ukyuli ɔni mɔɔkun lɛmɛnɛ ni, ɔnu ka nwuna kasusu kese-nwu nwaa na ɔsiaku ami Unwoti. Na lɛla lɛni na mɔɔyɔ́ teetulo ƒui ndi lɛƒɔndia bɔbla ku etemila bɔtɛ siin ku bekyuli kɔnyana bɔnu na kalɔ kammɔ ƒui lɛlɔ.

²⁵“Limeyi lɛdubo na ndubo Egyipteƒuɔ ku Edomƒuɔ ku Amonƒuɔ ku Moabƒuɔ kɔtu bɔni ku adua ani bekyuli nkya abi lɛlɔ mmɔ ƒui. Bekyuli bamɛni ƒui békulo ago, nsu ɔɔɔdi ami na baasiaku. Na lɛni kani na use amii Yudaƒuɔ lɛnɔ. Bina ɔlɔna kani na bíkulo na ɔɔɔdi bina kɔyi na bíti bíte-mi na bɛ́vumana udu na bɛsiaku-mi kama siin.”