Read Lelemi Kɔnyana Buwulo 1 Bible Online

Kɔnyana Buwulo 1 - Lelemi bible

Kɔnyana Buwulo 1

¹Aanu kalɛ na ɔma unengudi ɔmmɔ ɔ́ƒɔ lɛlɔ uwi ukpludi. Ɔma ɔni na nka bekyuli báƒɔ-nwu kemmo pii dii, ɔƒɛni amu ɔ́ta ɔ́bla aani ukpinele. Nka anwu náƒɔ lɛnyi dii na kadi bekyuli akɔ. Anwu ɔni na nka úse aani beleku ɔga na kɔlɔ kɔni na amadɔ mmɔ ƒui akɔ ɔƒɛni amu únwini bekyuli bamba kabla ɔblane.

²Keku kani nda usien umodi. Na imii bɔɔgbá-nwu anumi ƒui. Na útakɛ ukyuli ɔni na ɔsia-nwu kɔnu na nwuna bayɔne ƒui akɔ. Mmomu bénwini-nwu bekisine ɔƒaamu.

³Kekpo kéƒie Yuda kátɔlɔku késinku kalɔ bamba, na únwini bekyuli bamba kabla ɔblane ku lɛbibo. Kadi bamba bekyuli akɔ na ɔkya na útakɛ kanwunakɔ kadi. Na bekyuli bani nsia beekpóku-nwu báavi báda-nwu na kesii kani na úmii ɔkya.

⁴Lilu lɛni ntɛ lísela Sion ƒui lɛtɛ kɔka ku kɔnyana ɔsika ukyuli ɔdi ɔsɔ ulásia-ni lɛlɔ na besie batádi bana emeyi buni adi. Nwuna ɔma unegudi lɛban kɔyakun ƒui kuse ukpludi. Na bakpane bammɔ beewulo teedumo. Banana bamba beebo teebeƒie-nwu badagyaa taatɔlɔku. Na kɔnyana ku ɔdu kati kati náƒɔ ɔma ɔmmɔ.

⁵Nwuna bekisine nénwini ɔma ɔmmɔ lɛlɔ badine, na bekisine bammɔ belie-nwu ƒaa. Ekpidi bonwu ani na ɔɔbla ɔsu na Unwoti ɔ́ya na lɛbibo lɛmmɔ udu líbo-nwu lɛlɔ, na ɔ́ya na bekisine béƒie nwuna bebi bátɔlɔku na béténwini bana bekisine kalɔ bakyane.

⁶Kalɛ na Sion uukeye ɔ́yii udu, na nwuna batɔnkune báta bábla aani bakwa bani nsɔ naaakɛ́ taadi, anwuɔsu basɔ beeebo ɔyikun na bekeli na bagbini bammɔ kudɔ.

⁷Na nwuna lɛbibo ku ala ani muukpóku-nwu kemmo ni, Yerusalem ɔɔkali taanu akɛla ani nése-nwu na uwi ɔni nábavi dii kemmo, na ɔƒɛni amu ɔkɛ kɔlɔ ƒui lɛlɔ ɔɔví. Uwi ɔni na úduo nwuna bekisine enu ni, útakɛ ukyuli ɔni nebunku-nwu na bekisine bammɔ benye baanu-nwu na beedumi-nwu taama na nwuna ɔgbankpi ɔsu.

⁸Ekpidi bonwu ani na Yerusalem ɔ́bla ɔsu bekyuli béti ɔma ɔmmɔ bénwini lɛmala. Na bekyuli bani na nka baabu ɔma ɔmmɔ beekisi-nwu ɔƒaamu, ɔsika údie lɛlɔ kasɔngya na únwini anumi ku kɔƒa ku keku ku edumo.

⁹Nwuna ekpidi énwini ala éduo-nwu adala na uleti kasusu lɛla lɛni ndubo-nwu bɔlɛku na uwi ɔni ntɔ-nwu anumi adubo lɛlɔ. Anwuɔsu Yerusalem kalɔ bubo bɔdi kɔnyana litemi bonwu, na ukyuli ɔdi uuubo na ɔsia-nwu kɔnu uwi ɔni na ɔ́su ɔnini, “Unwoti, nu kalɛ na mina bekisine bádi-mi lɛlɔ na muubó abi na anu-mi kɔnyana.”

¹⁰Béyu Sion akɛla ƒui békeliku, na unye ɔɔnu uwi ɔni na kadi bamba bekyuli béduo nwuna kakpakɔ ina ka ɔdi ekisila bubile ka bekyuli bani naaadi Yudaƒuɔ beduo mmɔ.

¹¹“Budumo sɔɔn na mina bekyuli beedumo taawia bana limeyi lɛdila. Na beeti bana ala ani náƒɔ-ma kuye teeye, na basɔku beye lɛla blii lɛni kani na badi belie ngba.” Yerusalem ɔ́kpali Unwoti ɔnini, “Buvele, nwini nu-mi na anu kalɛ na lɛ́yii udu.”

¹²“Amii bani mɔɔví, bɛɛɛdaku-ni? Bɛnu si ɔdi ɔsɔ uubó bula abi amɛni udu. Lɛbibo lɛni kemmo na Unwoti ɔ́ya na líduo na nwuna kɔnyi kpakplaa ɔsu.

¹³“Áya na ogya ɔ́si katɔ úbo na ɔɔkyula-mi teeduo-mi ekubi kemmo. Ákywɛ-mi kakpagyuɛ, na nsɔ naaakɛ́ kavikɔ. Na áya na ɔtɔtɔ ɔɔgyú-mi limeyi limodi na ɔlɛ ɔni na muunú uwi biala ɔsu.

¹⁴“Ébo mina ekpidi áda-mi ɔkwɛ, na aayu-mi unu, na mina ɔyikun ɔ́sa. Áya na mina bekisine bákɛ ɔyikun na mina lɛlɔ, na bákɔ-mi básɔ ɔni na bebo ɔyikun bétulo-mi.

¹⁵“Awɔ Unwoti, éni mina bekpone na édie bekpone bamba ákya-mi ka babayila mina bakloƒu bekpone udu. Yuda use aani uleku ɔni na nka bétetuku-nwu kudii, nsu anwu nénwini ukyuli ɔni na baanya teesusu aani kalɛ na baamana egyiibi ntu teewi ntɛ kewikɔ.

¹⁶“Ɔmɛni ɔsu kɔnyana kani na muuwulo, na imii bɔ́ƒɔ-mi anumi uwi ƒui. Na ukyuli ɔdi uuubo na ɔsia-mi kɔnu iye ɔkya-mi ogya lɛnɔ. Kekpo kádi-mi lɛlɔ na mina bekyuli beebó abi.”

¹⁷Sion údie enu na ɔɔwia ubunkune nsu útakɛ kɔnu ɔsiane. Unwoti ɔ́ya na kadi bekyuli bani náka bámana Sion báta bénye Yakob bebi ku bawɔ ƒui lɛlɔ. Yerusalem únwini aani lɛla lɛni muusé lɛlɔ na nwuna liku bekyuli ƒui anumi.

¹⁸“Unwoti ablala ƒui ese siin. Na ami mmomu, néni na neeenu-nwu litemi. Na ɔƒaani ni, mɔɔsu-mii nnii binwini bɛnu abi ani na muubó. Béƒie-mi bakloƒu ku begblebi ƒui bátɔlɔku bésienku kaƒɔ.

¹⁹“Lɛ́lɔ mina bebunkune bakpana nsu bákya-mi kakya. Mina bakpane ku kadi batɔnkune békpi uwi ɔni na bakya baawia adila ani na badi.

²⁰“Unwoti, elenwini alanu kalɛ na lɛla lɛmɛni liikpóku-mi? Kaƒɔ kébo-mi likpo na kayi kaakpulu-bu, ɔsika lɛ́lɛ-ɔ kama na ńtenu ƒula litemi. Bádu bekyuli na lɛblɔnu lɛlɔ ku kɔduli kemmo lɛnɔ ƒui.

²¹“Ukyuli biala únu kalɛ na muudumo, nsu ukyuli biala uuubo na ɔsia-mi kɔnu. Na mina bekisine lɛnɔ bánu lɛbibo lɛni kemmo na éti-mi ákya báti. Na ɔmɛni ɔ́ya na baakɛ́ ebiti na mina lɛlɔ geen. Buvele, babla na ebo abáni-ma kɔtu na kenye kani na ése-mi ése kenye.

²²“Taya na bana ekpidi ani baabla avi-ɔ anumi. Mmomu ni-ma kɔtu kpakplaa geen aani kalɛ kani na áni ami lɛnɔ kɔtu na mina ekpidi ɔsu. Lɛ́yila lɛnunsia biala, na naaada budumo taaya lɛnɔ.”