Read Lelemi Esekiel 10 Bible Online

Esekiel 10 - Lelemi bible

Esekiel 10

¹Na uwi ɔmmɔ ni, lɛ́nu lɛla lɛni mbi bebweyi ine ku ngba ku ngba bammɔ eli. Na lɛla lɛni na nse aani lɛgaboku lɛni nse aani Saƒira lɛtabi lɛni muukeye mmɔ lɛlɛ.

²Mmɔ na Unwoti ɔ́su ukyuli ɔni na ɔkya awu gyɔlɔɔ mmɔ ɔnini, “Sie vi kɛɛkɛ ebi ene ani nkya bebweyi bammɔ kalɔ mmɔ akɔ na edie ogya agyabi ani na adubɔkana bɔda. Na egyingya-nwu ewi Yerusalem ɔma enengudi ɔmmɔ ƒui.” Na nnye mɔɔnu kalɛ na ɔɔbla lɛla lɛni na Unwoti ɔ́tina-nwu ɔnii ɔbla mmɔ.

³Na uwi ɔmmɔ ni, bebweyi bani mbo avwi mmɔ benye kakpakɔ kammɔ kada kakɛ ka asa na ukyuli ɔmmɔ úsie ɔ́vi-ma ntɛ. Na ulɔyɔ ɔdi ɔ́ƒɔ kakpakɔ kaduli geen kebliidi kammɔ kemmo mmɔ ƒui.

⁴Na Unwoti bukeye bɔni mɔɔtu anumi mmɔ bɔ́ta bebweyi bammɔ lɛlɔ na bútédi búnye kakpakɔ kammɔ kayakun. Na kakpakɔ kammɔ ƒui keekeye na bukeye bɔni mɔɔtu anumi mmɔ bɔ́ƒɔ kaduli kammɔ kemmo ƒui.

⁵Na kɔku kɔni na bebweyi bammɔ avwi aabla aaku momoomo aani Unwoti Ɔyikune Ƒui lɛdi, na kɔɔku teesie kaduli kamaadi kemmo muedi.

⁶Na ukyuli ɔni na nkya awu gyɔlɔɔ mmɔ úubo úbedi unye kɛɛkɛ libi lɛdi kudɔ.

⁷Na bebweyi ine bammɔ akɔ unwi únene kɔnu na usienku ogya ɔni nnye mɔɔda na kɛɛkɛ ebi ammɔ ntɛ na údie ogya agyabi adi úte ukyuli ɔmmɔ na ɔ́tɔlɔ.

⁸Mmɔ na lɛ́nu lɛti ka bebweyi ine bani mbo avwi mmɔ ɔdi biala ubo enu aani bekyuli adi kalɛ na bana avwi ammɔ kalɔ.

⁹Na lɛ́nu ebi ammɔ lɛnɔ ka ede bebweyi bammɔ. Na ebi amɛni eekeye aani sika atabi bamba ani baalɔ Krisolit.

¹⁰Ebi ammɔ ƒui udu élieku lɛlɔ asa na ebi bamba éƒie ammɔ ntɛ ékulo na ɔdi biala ntɛ.

¹¹Anwuɔsu aakana na eesié lɛƒɛnyi ƒui lɛlɔ, nsu balatu teenwini. Na ebi ammɔ ƒui eesié ku lɛlɔ uwi biala na bebweyi bammɔ beeveyi.

¹²Lɛ́nu lɛnɔ ka ebi ammɔ ku bebweyi bammɔ ɔlɔna kesii biala ku bana kama ku enu ku avwi ƒui ni, anumi áka ámana.

¹³Na línu ka lɛdi lɛdi lɛɛkpali taasu lɛnini, “Ebi ani muunwíni lɛlɔ.”

¹⁴Bebweyi ine bammɔ ɔdi biala ubo anumi na lɛƒɛnyi ine bɔmmɔ ƒui lɛlɔ. Ɔmantɛ akɔ anumi ku ukyuli anumi ku gyata anumi ku kɔdigbo aasɛ anumi.

¹⁵Na bebweyi bamɛni badi bani kani na lɛ́nu ka Kedar Ketu kudɔ mmɔ. Na anya mɔɔtina ebi ammɔ uwi ku kesii kani na ɔlɛka esie. Na si bebweyi bammɔ báta ni, ama ku ebi ammɔ mɔɔkɛ na si édi énye lɛnɔ na edi enye. Lɛni kani na si kayaa na béveyi baaví lɛnɔ na ebi ammɔ asiaku-ma.

¹⁸Amu na nnye mɔɔnu uwi ɔni na Unwoti bukeye bɔmmɔ bɔ́sɔ bɔ́gyu kakpakɔ kayakun mmɔ bɔ́tɔlɔ búsie bútédi búnye bebweyi ine bammɔ eli.

¹⁹Na bénene bana avwi na béveyi bésie kayaa na ebi ammɔ akɛ-ma kɔmadɔ. Bétédi bénye kakpakɔ kammɔ ɔƒɛ katukɔ kakɛ. Na Unwoti bukeye bɔmmɔ bɔkɛ-ma eli.

²⁰Na ɔ́bla-mi nwaa ka bebweyi bamɛni kani na lɛ́nu na Kedar Ketu kɔmadɔ ka Unwoti bukeye bɔsiaku-ma na bana eli mmɔ.

²¹Bana ɔdi biala ubo avwi ene na bekyuli enu akya-nya kalɔ na bebo na anumi ene na lɛƒɛnyi ine bɔmmɔ aani bani na ketu kɔtu mmɔ. Na ɔdi biala ɔɔtɔ nwuna anumi siin na ulenwiniku lɛlɔ.