Read Lelemi Esekiel 11 Bible Online

Esekiel 11 - Lelemi bible

Esekiel 11

¹Unwoti Kɔyu kɔmmɔ kútiku-mi kúsienku kakpakɔ kammɔ kayakun na ɔƒɛ katukɔ kakɛ kesii kani na lɛ́nu banana aavlanyɔ-ɛlɔ úbunku Yaasania ku Asur ku Benaia ubidi ɔnanabi ɔni baalɔ banii Pealatia.

²Mmɔ na Unwoti ɔ́su-mi ɔnini, “Esekiel, ɔyawine ubi, bekyuli bamɛni bakya beeti kasusu kekpidi na baakya Yerusalemƒuɔ kasusu kekpidi kammɔ.

³Na ala ani bene na baasu adi ndi ɔnini, ‘Bɛya na bɔtu lɛtɔ na limomo libu. Bula ɔma unengudi ɔmɛni use aani libui lɛni nsia ogya. Na abu ndi lɛna lɛni nkya libui lɛmmɔ kemmo ɔni na libui lɛmmɔ liitile ogya ɔmmɔ kuƒi ka ɔkyula-bu.’

⁴Anwuɔsu ni, Esekiel, du-ma kukpi kɔtɔ!”

⁵Unwoti Kɔyu kɔ́ƒɔ-mi lɛlɔ kemmo na ɔ́su-mi ɔnii nsu batɔnkune bammɔ, “Ami Unwoti ngyi ala ani na amii batɔnkune bammɔ bɛɛsu.

⁶Bɛ́ɛdu bekyuli pii ɔni na bekpine báƒɔ ɔma unengudi ɔmmɔ ƒui!

⁷“Sɔsɔ na ɔdi ka ɔma unengudi ɔmɛni ɔdi libui, nsu bekyuli bani na bɛ́du ɔlɔna ndi lɛna lɛmmɔ. Anwuɔsu ndubo-mii lɛlɔ bunye na lɛbɔku-mii lɛlɛku Yerusalem.

⁸Na ndubuti bekpone kasala limene na bekpo-mii kalɛ kani na amii alati bíise kalɔ bɛɛyia kukuuku mmɔ.

⁹Na kadi bamba bekpone badubo-mii buƒie na bani-mii kɔtu.

¹⁰Badubo-mii bɔdu na amii alati bina kalɔ lɛlɔ, nsu ndubo bɔya na bɛnu bɛti ka ami Unwoti nábla ala amɛni nwaa asa na badu-mii.

¹¹Amii batɔnkune bammɔ bɛɛsu taatina ka lɛna na bɛdi bɛkya libui lɛmmɔ kemmo, nsu ɔma unengudi ɔmɛni ɔɔɔdubo-mii bɔgyumana. Kudii, bɛdubo bukpi na Israel ɔmii lɛlɔ.

¹²Bɛdubo bɔnu bɔti ka uwi ɔni na bɛsiaku kadi bamba bekyuli bani nde-mii mmɔ ɔda bubo kama mmɔ ni, bíni ami bɔdi ku ala ani na mɔɔtina. Nsu ami ndi Unwoti!”

¹³Uwi ɔni na ntaawɔlɔ bɔtɛmi kani na Petalia úbuli úbi kalɔ na úkpi. Líboku lɛlɔ kalɔ na lɛ́va ku lɛdi momoomo lɛ́su nnini, “Unwoti buvele bekyuli bani nébu bakya Israel ni, tadu bana ƒui.”

¹⁴Amu na Unwoti údie kenye ɔnini,

¹⁵“Esekiel, ɔyawine ubi, bekyuli bani nkya Yerusalem baasu ka awɔ ku bekyuli bani ƒui na béƒie béboku Babilon mɛni bɛ́gyu kakyakɔ bɛ́gya, anwuɔsu bilakana-mi bɔkpa. Ɔƒɛni lɛnɔ ni, Israel kalɔ kénwini ama lɛti ɔdi.

¹⁶“Nsu se atu na enu lɛla lɛni na mɔɔwia ka lɛsu Israelƒuɔ bani na nkya Babilon. Sɔsɔ na ɔdi ka ami Unwoti Katɔti nábɔku-mii lɛ́lɛku amii alati bina kalɔ lɛlɔ nnii bitélie kadi bamba bekyuli akɔ. Nsu ɔƒaani ndubulieku-mii kesii biala na bɛkya kalɛ bɛkana na bɛkpa-mi.

¹⁷“Na limeyi lɛdi ni, ndubo-mii bɔsala bɔsiku kɔlɔ kɔni lɛlɔ na bígyingya bɛkya na lɛya na bɛsɔ bibelie Israel kalɔ lɛlɔ.

¹⁸“Na si uwi ɔni na ala amɛni álɛ ni, ndubɔyɔ ka ada baƒiɔ ala ani muusé lɛlɔ mmɔ ƒui edie kalɔ kammɔ lɛlɔ.

¹⁹Na ndubɔda bina atuɔkplu bɔbla ƒui lidie-mii lɛlɔ na lɛya na anumi eteegyie-mii kalɛ na bɛsiaku-mii kama siin na biteenu-mi litemi

²⁰na bitaadi mina ɔda bubo ku mina ala ani mɔɔtina-mii lɛlɔ. Na bɛdubɔbla mina kadi bekyuli na ami lɛbla bina Katɔti.

²¹Nsu bekyuli bani mɔɔkpá baƒiɔ ni, ndubo-ma kɔtɔ kɔni námanku-ma bɔni. Ami Unwoti Katɔti násu.”

²²Amu ka Unwoti ɔ́wɔlɔ bɔtɛmi ni, bebweyi ine bammɔ bégyingya bana avwi na béveyi bésie kayaa na kɛɛkɛ ebi ammɔ akɛ-ma kɔmadɔ na Unwoti bukeye bɔkɛ-ma katɔ.

²³Na bɔ́tɔlɔ Yerusalem búsie bútédi búnye abi adi eli na unengudi ɔmmɔ ɔƒɛ katukɔ kakɛ.

²⁴Na mina kɔyu kemmo ala bɔnu uwi ɔmmɔ kemmo ni, Katɔti Kɔyu kútiku-mi na kɔ́sɔku-mi kúboku Babilon na mina bakpana bakladi bani na abu ku-ma na béƒie mmɔ kudɔ. Na ɔmmɔ kama ni, ala bɔnu bɔmmɔ bɔ́yii bɔ́kya.

²⁵Na lɛ́sɔku ala ani ƒui na Unwoti údie ɔ́tina-mi ƒui lɛ́su-ma.