Read Lelemi Esekiel 13 Bible Online

Esekiel 13 - Lelemi bible

Esekiel 13

¹Unwoti ɔnini,

²“Esekiel, ɔyawine ubi, du Israel kenye bediene kɔtɔ. Bekyuli bani na banii mina kenye na beedie na baasu ala na mina lɛnyi kemmo, nsu ama alati ala ani na baakali taanu ku kasusu etemila kudu na beebó. Na asu-ma ku uwi údu ka benu-mi litemi.

³“Ami Unwoti Katɔti mɔɔsu ka ɔkɔ kenye bediene bammɔ ɔdi ɔ́sa ɔƒaamu. Ɔsika ɔɔɔdi mina kɔyu kemmo ala na baanu mmomu bana kasusu kemmo ala kenye na beedie!

⁴Israel kenye bediene bátavumanaku beƒukutu bani mɔɔkɛ taawia adila na ɔma ɔni nábwɛ únwini aani kebu alakpi akɔ.

⁵Balálɛ bekyuli bammɔ kpakplaa taasu-ma ɔgbankpi ɔni ndubo-ma lɛlɔ iye lɛbibo lɛni na ekpidi ani na baabla taaƒiɔ-mi adanku.

⁶Kenye bediene bammɔ baanyi ɔkɔ taasu ka mina lɛnyi kemmo na baasu etemila, nsu ɔɔɔdi ami náƒuna-ma muedi. Na baakali ka bana etemila ammɔ adububo-nwu kemmo ete-ma kalɛ na básu.

⁷Baasu ka mina etemila lɛsa na baakɔ́, nsu ɔkɔ etemila sɔɔn na adi na ɔɔɔdi ami mɔɔsu-ma lɛla lɛdi!

⁸“Anwuɔsu ndubo ɔkɔ kenye bediene bammɔ kɔtu bɔni, ɔsika baatɔ́lɔ Israel kadi bekyuli bammɔ ku ɔkɔ etemila.

⁹Ndubɔta linye-ma lɛlɔ na nsɔ lɛɛɛdubo bɔya na babla mina bekyuli lɛnɔ. Na basɔ baaadubo lɛnyi bɔdi muedi banii Israelƒuɔ lɛnɔ iye bakya kalɔ kammɔ lɛlɔ muedi. Na badubɔnu bati ka ami ndi Unwoti Katɔti.

¹⁰“Kenye bediene bammɔ béni banii balasu litemi geen lɛdi. Na baasu mina bekyuli ka badubɔkɛ keyi buɛɛ ina ka balanu keyi lɛla lɛdi na bana akɔ. Bese aani kabla bablane bani mɔɔkali banii si béti kɔba bákwaa kowodu kɔni ndaku bɔƒɛ ni, na kɔwodu kɔmmɔ kɔdubo bunye kpakplaa.

¹¹Nsu si uwi ɔni na lɛ́ya na ɔnantu ku ɔƒɛƒɛɛ ku etubankɛ ku ɔƒɛƒɛɛ kpakplaa úbo uukpó ni, ɔ́bla bi ɔ́bla dɛ ni, ɔtɔ ɔmmɔ ɔdubo bɔƒɛ.

¹²Mmɔ na bekyuli badubo buye lɛla lɛni ɔsu na kɔba kɔmmɔ kútakana kowodu kɔmmɔ bɔda buse na kulabwɛ.

¹³“Kowodu kɔmmɔ ndi Yerusalem, na ami Unwoti Katɔti ndubo ɔƒɛƒɛɛ ku ɔnantu ku etubankɛ ku ɔƒɛƒɛɛ kpakplaa bumene na ubaƒɛ kowodu kɔmmɔ ubi kalɔ kpɛtɛ kpɛtɛ.

¹⁴Ɔkɔ kenye bediene bammɔ baakya ɔkplu ka beti ala bebi ekpidi ani nkya Yerusalem, nsu ndubo ɔma ɔmmɔ bubo bɔbwɛ butálɛ ɔka ɔni a bákya ɔma ɔmmɔ kalɔ muedi. Na si uwi ɔni na ɔma ɔmmɔ ɔ́bwɛ ɔ́wɔlɔ ni, kenye bediene bammɔ bekyuli ƒui badubɔti ka ami nábla ala ammɔ.

¹⁵“Yerusalem ɔma unengudi ɔmmɔ ku nwuna ɔkɔ kenye bediene bammɔ ƒui badubo mina kɔnyi ala bɔbla bɔnu. Na lɛkɔ lɛsa lite bekyuli ƒui ka Yerusalem ɔdi ɔ́sa na nwuna kenye bediene lɛnɔ békpi.

¹⁶Ɔsika bése keyi buɛɛ kenye béte mina bekyuli na uwi ɔni na beeebo keyi buɛɛ kadi. Ami Unwoti násu.

¹⁷“Esekiel, ɔyawine ubi, du Israel beleku kɔtɔ. Ama bani mɔɔkɔ́ lɛsa na ala ani na ama alati bana kasusu kátina-ma lɛlɔ.

¹⁸Ya na bati anii ama ɔdi ɔ́sa! Baakya evo ala na kavobi na baamána lɛduku eli lɛni lɛlɔ na evo ala ada. Na baatɔ́lɔ bekyuli na baaƒɔ́ taadi ka badubɔkana na basu ala ani ndubo bɔlɛ uwi ɔni mebo. Nsu baaadubo ɔkɔ ɔmɛni ƒui bɔnyi na balɛ sɛɛn na lɛla lɛdi lilálɛku-ma.

¹⁹Baayá na mina bekyuli beete-ma antabi ku bodobodo blii ɔdi kani na beedumi-mi na bana linyesia lɛni na bebo kemmo. Na baasia ɔkɔ etemila ammɔ lɛlɔ na baadú bekyuli bani na nka bátabla lɛla lɛdi na beebunku bekyuli bani na nka báƒiɔ na baatɔlɔ kɔtu tani tani. Na mina bekyuli baaƒɔ́-ma taadi.

²⁰“Nkisi evo ala ani na baabla teeti taatɔlɔ bekyuli na baaƒɔ́ bana ɔkɔ etemila taadi. Ndubo lɛbuli lɛni nda-ma kuvobi mmɔ bukulo budie-ma egu na lɛya na bekyuli bani na bana evo ala éƒie aani baasɛ na kɔkpagyuɛ kemmo bakɛ bɔnwuna.

²¹Ndubudie ala ani na beeti teebile-ma anumi, na lidie bana ɔyikun ɔmmɔ na bekyuli bani na béƒie lɛlɔ kalɛ na ɔsɔ uladi-ma lɛlɔ. Mmɔ na badubɔti ka ami Unwoti nábla ala amɛni.

²²“Baabla ala ani na ami lɛɛɛdubo bɔbla kudi kudii. Baatɔ́lɔ bekyuli babuni na baakya-ma ogya ka babla likpidi na baayá na kayi keelie bekyuli bekpidi kalɔ ka bataabla bana ekpidi na bayila bana ngba bumodi bɔmmɔ ƒui.

²³Nsɔ lɛɛɛdubo bɔya na beleku bamɛni bataasu bana ɔkɔ kenye kadi. Na lɛya na mina bekyuli balɛ bana lɛlɔ bɔdi kalɔ. Na badubɔti ka ami Unwoti nábla ala amɛni.”