Read Lelemi Esekiel 19 Bible Online

Esekiel 19 - Lelemi bible

Esekiel 19

¹“Esekiel, die ɔkwanu ɔkɛnku Israel bagabi lɛlɔ

²na asu anini, “ ‘Ƒ'ini ɔdi gyata uni ɔdi udu. Na ɔ́kya bagyata bamba akɔ! Ɔɔyu taatɛ bagyatabi bammɔ akɔ na ɔɔnyuɛ nwuna bebi.

³Na ɔ́tina bana akɔ unwi kabui na ɔdi gyata ɔni na ubo ogya geen. Na ɔ́tɛya kalɛ na ɔsiaku ebuo na uƒie-nwu ɔduli. Na ɔɔduli bekyuli teebweli.

⁴Kadi bekyuli ƒui bénu-nwu kɔku kɔmɛni. Na béku ubu bonwu ɔdi bákywɛ-nwu kakpagyuɛ na úbanu-ka. Na bábala-nwu abuala na báni-nwu bésienku Egyipte kalɔ lɛlɔ.

⁵“ ‘Uni únye utaanu-nwu ulu ka unwini ubo, nsu únye ɔ́nɔ. Ka ɔ́yila lɛnunsia ɔsu ni, ɔ́ƒuna nwuna ubi bamba na ɔ́nyuɛ-nwu na ɔɔbla ogya geen.

⁶Anwu lɛnɔ ɔ́kya útaabwi na bagyata bamba akɔ na ɔdi gyata ɔni na ubo ogya geen. Ɔ́tɛya kalɛ na baasia ebuo teeƒie-nwu. Na útaaduli bekyuli taakun teebweli.

⁷Ɔ́bwɛ lɛma kɔgyumanakɔ kɔni na bátu bényene mmɔ úwi kalɔ, na úbile ala na lɛma kemmo na lɛ́ƒɔ lɛlɔ liwi ukpludi. Na kalɔ kemodi kammɔ ku bekyuli bani ƒui nkya-ka kemmo ni, liƒu geen liiƒie-ma si ɔɔkwanyi.

⁸Kadi ƒui bekyuli bábata bénye-nwu lɛlɔ. Na bási kɔlɛkɛ bonwu bonwu kɔni na amadɔ mmɔ ƒui kemmo bébo bébeku ubu bákywɛ-nwu kakpagyuɛ. Na kakpagyuɛ kammɔ kédie-nwu.

⁹Bábala-nwu abuala adi na báni-nwu bákya lɛyu lɛdi kemmo na béti-nwu bésienku Babilonƒuɔ ɔga kudɔ. Mmɔ na bátábala-nwu bákya ɔtɔ katɛnkɔ kadi. Anwuɔsu ukyuli ɔdi ɔsɔ ulenu-nwu bɔkwanyi na Israel abi lɛlɔ mmɔ bene ƒui.

¹⁰“ ‘Ƒ'ini ɔdi kɔdingyii kabuli kani na kenye ketu kɔtu. Na ka kɔɔƒɔ́ ntu pii na mmɔ ɔsu ni, kúdie kɔgba ku ligyiitu pii.

¹¹Nwuna kɔgba kpakplaa kɔmmɔ kunye kute kenyekɔ ɔyikun na kɔ́kuku kutulo egyii ƒui. Na kalɛ na kɔ́lɛ lili na kubo ɔkplu ni, ukyuli biala ɔɔnu taati.

¹²Nsu na kɔnyi ɔsu ni, lɛ́gyu-ku lídie mmɔ ku lidu ku lidu lɛ́va kalɔ na ɔƒɛƒɛɛ ɔni mɔɔkula ala ɔ́si kalɔ kakwiidi lɛlɔ úbo úbakula-ku ku ebi ani na asia-ku lɛlɔ ƒui na kɔ́yɛyɛ.

¹³Ɔmmɔ kama béti-ku bátálɛ kalɔ kakwiidi kani náƒɔ ogya lɛlɔ.

¹⁴Na mmɔ ni, kugyii kɔmmɔ ntɛ kɔ́ƒɔ ogya na ɔ́da úsie kuna kɔgba akɔ na kɔ́kyula-ku ku ebi ammɔ ƒui na kagba kadi kásɔ kétebu ɔni na kugyii kɔmmɔ kɔ́sɔ kunye salalaa.’ “Ɔkwanu ɔmɛni ni, budie na ɔlɛka bedie-nwu ku kɔnyana.”