Read Lelemi Esekiel 21 Bible Online

Esekiel 21 - Lelemi bible

Esekiel 21

¹Unwoti ɔnini,

²“Esekiel, ɔyawine ubi, tɛmiku Israelƒuɔ ƒui kpakplaa na adu-ma kukpi kɔtɔ ka ekpo ani ƒui na bekyuli baakpá na Yerusalem kátamanku.

³Na ndubo-ma kɔtu bɔni. Ndubo mina kewii bɔni bɔkpa na lɛdu ukyuli biala babuni ku bekpidi ƒui.

⁴Na bekyuli badubo bukpi bɔsi kada kakɛ butédu katɔ kakɛ

⁵na nsɔ lɛɛɛdubo-ka bɔsɔku bɔkya livuo kemmo.

⁶“Esekiel, teedumo ku kɔnyana geen na bekyuli ƒui benu-ɔ kɔku.

⁷Na si béye-ɔ lɛla lɛni ɔsu na eedumo lɛni ni, su-ma anii énu kenye kekpidi kani mɔɔda liƒu geen na kadubɔya na ukyuli biala nénu-ka ɔtɔtɔ ɔgyu-nwu na utaatɔ ku liƒu kpakpaakpa. Na uwi ɔsɔ uletu asa na ala amɛni adubo bɔlɛ. Ami Unwoti muusé kenye kamɛni!”

⁸Unwoti ɔnini,

⁹“Esekiel, ɔyawine ubi, ya na Yerusalemƒuɔ bati anini, ‘Lɛ́ɛdɔ mina kewii kani na ndubo buti bɔdu-mii líse kese yayaaya na keekeye na kadubo-ma akɔ bɔvi aani kalɛ ka katɔ kaabwɛ ogya! Kɔtu bɔni ndubo, anwuɔsu bɛsɔ bitadi limeyi lɛdi, ɔsika bina akɔ ɔdi biala úni mina bɔlɛ.

¹¹Bésusu mina kewii nnɔmii kaduɛ na kebo ɔbi na kenye kagyumana lɛnɔ ka uwi ubugya kalɔ.

¹²Esekiel, teedumo ku kɔnyana momoomo, ɔsika báani kewii kammɔ bákpa béte mina kadi bekyuli ku bana batɔnkune bammɔ bɔdu. Na badubo bukpi sɔsɔ, anwuɔsu sɔ tasia lɛla lɛdi anu.

¹³“ ‘Nnye mɔɔkɔ́ku mina bekyuli taanu na baaadubo lɛla lɛdi bɔkana bɔbla na babala-mi. Ami Unwoti násu.’

¹⁴“Esekiel, tɛmiku mina bekyuli kpakplaa na lɛlɔ lɛyɔ-ɔ na agya enukpɛ ka lɛ́di lɛlɔ ɔsu. Mina kewii kani muubile ala kadubo bekyuli bɔdu buwi kalɔ bɔsia kama kalɛ kani na mɔɔmɛnɛ na kayaa mmɔ.

¹⁵Ɔtɔtɔ ƒui ɔdubo-ma bɔgyu na beteebuli ku liƒu bonwu. Na mina kewii kadubo bunye butaakywɛɛ-ma na ɔban kayakun biala kenye. Na kadubo ogya buteedie na kenye kagyumana ka kadu bekyuli.

¹⁶Kadubo butaamɛnɛ teesie kɔmii ku kɔdianu na kesii kani na ɔ́tina.

¹⁷Na ɔmmɔ kama mina kɔnyi kɔdubɔyɔ-mi na lɛgya enukpɛ ka lɛ́di lɛlɔ. Ami Unwoti násu.”

¹⁸Unwoti ɔnini,

¹⁹“Esekiel, ɔyawine ubi, die kuƒi siaku lilu inyɔ lɛlɔ na atina Babilon Ɔga kesii kani na ɔdubo bɔsia si úbeduo ku nwuna kewii. Na lilu lɛmmɔ lise kalɔ lɛsi likpo linwi, nsu sia anumi na alɛ likpose kɔlɛkɛ na kesii kani na lilu lɛmmɔ líle lɛlɔ lɛ́tina lɛƒɛnyi bamba.

²⁰Na atina-nwu nwaa kesii kani na lilu lɛmmɔ líti lísela. Unwi úsela Raba ɔni ndi Amon kalɛkɛ ɔma unengudi. Na unyɔdi úsela Yerusalem, Yudaƒuɔ ɔma unengudi ɔni na bátu kɔgyumanakɔ bámana.

²¹Na si uwi ɔni na Babilonƒuɔ ɔga úbedu mmɔ ni, anwu ɔlati ɔdubɔlɛ ugyii kesii kani na ɔdubo bɔsia si ɔ́kunku nwuna atula iye unye ɔ́nu ebuo ɔni na bádu bákpa bete bana baƒiɔ ɔni ndi ulu ɔni lɛlɔ na baasia teebo like teeye bana baƒiɔ ala teenu.

²²Nwuna kɔdianu kɔnu kɔdubo lɛtula lɛni lɛlɔ na bénweni básia banii Yerusalem bɔni bɔlɛku. Na mmɔ ni, ɔdubo kati bute na bavwi kekpo lise na basia ubili bakɔliku ɔma ɔmmɔ awodu etédu ana lili na benye mmɔ babwɛ awodu ammɔ bewi kalɔ ku ɔban kɔyakun kɔmmɔ kɔni na bánwi ku akpa bonwu ani na ebo ɔkplu geen mmɔ na badu bekyuli bammɔ ƒui.

²³Ukyuli biala na ɔkya Yerusalem úse kenye ka ɔdubɔdi Babilonƒuɔ ɔga litemi lɛlɔ, anwuɔsu bana ɔdi ɔsɔ ɔɔɔsia lɛnu ka lɛla lɛmɛni udu lɛdubɔlɛku-ma. Nsu Babilon ɔga ɔdubo-ma bunyimene ekpidi bɔbla ngba bɔni na belie na ɔlɛ-ma use kpakplaa kalɛ na badubo-ma buƒie bɔtɔlɔku.

²⁴“Esekiel, su Yerusalemƒuɔ ku bana ɔtɔnkune anii ami Unwoti Katɔti mɔɔsu nnii, ‘Bina ala ani ƒui na bɛɛbla adi kalala ala bɔbla na eedie-mii taatina kalɛ na bibo likyulikpi. Bɛ́ƒiɔ na ɔmmɔ ɔsu na badubo-mii bɔkpanku bɔtɔlɔku aani batɔntɛne.

²⁵Na awɔ Israel ɔtɔnkune ni, ƒula ekpidi ku kalala ala bɔbla ɔsu ni, ƒula limeyi líidu lɛ́wɔlɔ ka akɛ ƒula kɔtu bɔni.

²⁶Ami Unwoti Katɔti muudie lɛdi taakya-a ka edie ƒula ɔyikun lɛduni lɛni nda-a lɛlɔ ku ƒula kagabwa ƒui ese, ɔsika lɛla biala lɛdubo bɔvumana ɔ́si ɔƒɛni. Na bani ƒui na beeebo ɔyikun kenyekɔ kadi kuuku ni, ama ndubo kunyekɔ kɔmmɔ bunye ɔƒaamu. Na bani na nka baadi lɛlɔ mmɔ ni, badubo bekyuli keeke bani lɛlɔ neeebo kɔsia bunwini.

²⁷Ndubo bɔya na Yerusalem ɔbwɛ unwini atɔnku ɔma uwi ɔni na mina kabla ɔblane ɔni na lɛ́ƒuna ɔdubo bɔda bɔlɛ na ubani ɔma unengudi ɔmmɔ kɔtu.’ ”

²⁸Unwoti Katɔti ɔ́nini, “Esekiel, ɔyawine ubi, Amonƒuɔ bédumi Israelƒuɔ, anwuɔsu du-ma kukpi kɔtɔ na asu-ma anini, ‘Báni kewii bákpa livuo kemmo bada benye ka bewi ubugya kalɔ. Bésusu-ka nnɔmii na keekeye kaduɛ ka kenye kagyumana ka ɔdu bekyuli aani kalɛ na katɔ kaava taayu bekyuli na beekpi.

²⁹Amonƒuɔ balalane, ɔkɔ kɔyu kemmo ala na bɛɛnu na ɔkɔ kenye na bɛɛƒɔ́ taadi. Nsu bina kɔtu bɔni limeyi líide suɛlɛ suɛlɛ na mina kewii kadubo-mii bɔdu ƒui!

³⁰Uwi ɔni na amii mɔɔní bekyuli bamba kɔtu ɔ́vi, anwuɔsu bɛbɛla bina kuwii.

³¹Mina kɔnyi kpakplaa kɔdubo-mii buƒi aani ogya. Na ndubo-mii buti bɔkya balalane bani na bagyi bekyuli bɔdu kabla kaduɛ enu kemmo.

³²Badubo-mii bɔkyula ƒui na bikpi na amii alati bina kalɔ lɛlɔ. Na bekyuli badubo-mii bɔyiƒala ƒui. Ami Unwoti násu.’ ”