Read Lelemi Esekiel 28 Bible Online

Esekiel 28 - Lelemi bible

Esekiel 28

¹Unwoti Katɔti ɔnini,

²“Esekiel, ɔyawine ubi, su Tiro ɔga anini, ‘Aatalaku lɛlɔ katɔ taavili na aawia ka bekyuli banu-ɔ aani kayaa ɔyikune ɔdi na adi na Tiro ɔma unengudi ɔmmɔ ɔdi ƒula lɛga kadikɔ, nsu ukyuli keeke kani na adi.

³Aabu ka áda anu etulo Daniel na agyi lɛla biala.

⁴Sɔsɔ ƒula lɛnunda lɛ́ya na énwini ɔlakɛne, ɔsika ebo sika ugyiedi ku ɔƒualadi geen na ƒula egulabi kesekɔ.

⁵Agyi egulabi bɔbla kɔkwɛ lilu geen sɔsɔ na ala lɛnɔ emomo-ɔ geen, nsu ƒula akɛla áya na aatina lɛlɔ na asɔ alabu lɛla lɛdi!

⁶“ ‘Éti lɛlɔ aakɔ́ku kayaa ɔyikune ɔdi, anwuɔsu ɔƒaani ni, ami Unwoti Katɔti

⁷ndubo-ɔ buti bɔkya bekisine balalane enu kemmo na bayila-a udu ku ƒula akɛla ani na ƒui na ábla kabla kpakplaa ákɛ mmɔ ƒui.

⁸Ƒula bekisine badubo-ɔ bɔdu kalala kemmo na ɛpu kalɔ ndubunwini ƒula kaƒiɔtɔ.

⁹Na si uwi ɔni na úbo úte ka enye asiaku ƒula bekisine adubɔsɔ asu anii kayaa ɔyikune ɔdi na adi? Badubo-ɔ bukpoku na ebo abi aani ukyuli ɔyawine bamba kalɛ.

¹⁰Baƒɔ ndubo bebekpoku na badu-ɔ na adubukpi aani bekyuli bani naaakya liili kalɔ teete-mi kalɛ. Ami Unwoti násu.’ ”

¹¹Unwoti ɔnini,

¹²“Esekiel, ɔyawine ubi, die ɔkwanu te Tiro ɔga na asu-nwu anii ami nnini, ‘Na uwi ɔdi návi kemmo ni, na adia geen áwɔlɔ na ebo kasusu geen na aadia bɔnu lɛnɔ.

¹³Na Eden Ɔban kemmo na ákya na áda sika ugyiedi adala ani na béti sika ugyiedi atabi ani mbo bukeye lidu lidu bábla na aadia bɔnu geen. Na ala amɛni ƒui ese ete-ɔ ɔ́si limeyi lɛni na báwɔ-ɔ lɛlɔ.

¹⁴Na lɛ́ya na ngba kebweyi kadi mbo avwi ɔɔgyumana-a kaduli na mina kɔbi kedee lɛlɔ kesii kani na eesié atabi ani muukeye aani sika ugyiedi na aatu anumi akɔ.

¹⁵“ ‘Na ɔ́si uwi ɔni na báwɔ-ɔ mmɔ ni, átaabla ala ƒui ulu lɛlɔ, nsu nwuna kama ni, ése kalɔ aabla ulikplu ala.

¹⁶Átaadiku kadi bamba bekyuli kuye na énwini ɔlalane na likyulikpi lɛ́ƒɔ lɛlɔ kemmo ƒui. Anwuɔsu línye-ɔ lɛlɔ na lɛ́bɔku-ɔ lɛ́lɛ mina kɔbi kedee lɛlɔ mmɔ. Na ngba kebweyi kani na nka kátaagyumana-a mmɔ ɔlati nábɔku-ɔ ɔ́lɛku sika atabi ani náƒɔ kuye akɔ mmɔ.

¹⁷Ƒula bɔdia bɔni na aadia bɔnu nátɔlɔ na énwini ukyuli ɔni na asɔ alábu lɛla lɛdi na aatina lɛlɔ. Na ka ƒula lɛnyi lísie ɔgyu ɔsu ni, ese kalɔ aabla adɔlɔla. Anwuɔsu na líkpeli-ɔ lɛ́va kalɔ na baga babambadi baamá-a.

¹⁸Ánya beyedine bamba ákya ɔni náya na bina kɔkpakɔ kɔmmɔ ƒui kuusé lɛlɔ. Anwuɔsu na lɛ́kya ƒula ɔma unengudi ɔmmɔ ogya na ntɔ sɔɔn kani na ukyuli biala ɔɔnu na kesii kani na nka ƒula ɔma unengudi ɔmmɔ uwi mmɔ.

¹⁹Kadi bamba bekyuli bánu ɔmɛni na liƒu bonwu líƒie-ma. Ƒula kɔtu bɔbi bɔɔtɛ kalɔ munu munu na awɔ áyii udu ƒui kede kede.’ ”

²⁰Unwoti ɔnini,

²¹“Esekiel, ɔyawine ubi, du Sidon ɔma unengudi ɔmmɔ bekyuli kɔtɔ

²²na asu-ma anini, ‘Ami Unwoti Katɔti línwini bina ukisine! Na bekyuli badubo-mi bumwi si lɛ́ni-mii kɔtu na banu-mi bati kalɛ na nse kedee.

²³Ndubo bɔya na lɛlɛ likpidi libo-mii na lɛkyula-mii. Na lɛya na bekisine bebekpo-mii na baka bamana-mii na badu-mii na bɛnu bɛti ka sɔsɔ ami ndi Unwoti.

²⁴Na su uwi ɔni na ala amɛni álɛ ni, Israel badukɛne basɔ balabla bekyuli bekpidi bani ndubukpoku-ma na ɔbla-ma aani si liyu alakpi akɔ na bakya. Na Israelƒuɔ badubo bɔnu bɔti ka ami Unwoti Katɔti nábla ala amɛni.’ ”

²⁵Unwoti Katɔti ɔnini, “Limeyi lɛdi ni, ndubo Israel bekyuli bɔsala bɔsiku kadi bamba bekyuli akɔ kesii kani na bégyingya bakya ɔƒɛni na kadi biala bekyuli banu kalɛ na nse kedee. Na Israelƒuɔ badubɔsɔ bebelie ɔmii ɔni na líti líte mina kabla ɔblane Yakob kemmo.

²⁶Badubo bulie ku keyi buɛɛ na atu ayɔ-ma na ama alati batu bana lɛtɔ na besie bana adingyii mmo. Basɔ baaadubo ɔgbankpi kemmo bɔkya, ɔsika ndubo bana bekisine kpakplaa bammɔ kɔtu bɔni. Na Israelƒuɔ badubo bɔnu bɔti ka ami ndi Unwoti bana Katɔti.”