Read Lelemi Esekiel 3 Bible Online

Esekiel 3 - Lelemi bible

Esekiel 3

¹Amu na Unwoti ɔ́su ɔnini, “Esekiel, ɔyawine ubi, si ákun kakunkɛ kamɛni áwɔlɔ ni, na esie na atátɛmiku Israel bekyuli.”

²Úti kakunkɛ kammɔ úte-mi na ɔ́su-mi ɔnini, “Kun kakunkɛ kamɛni na emo.” Na ami lɛnɔ lɛ́kun-ka na káyu-mi emini na kenye kemmo aani uwɔ.

⁴Unwoti ɔ́nini, “Esekiel, awɔ ɔlati ƒula bekyuli kudɔ na mɔɔtala-a.

⁵Na Israelƒuɔ na badi. Baaadi baƒɔ bani mɔɔtɛmi lɛdi bamba lɛni na alakana bunu. Si baƒɔ kudɔ na lɛ́tala-a ni, nka badubunu-ɔ litemi.

⁷Nsu Israel kadi bekyuli badubo buni na belénu litemi, ɔsika béni na bétenu-mi litemi. Bana ƒui bebo atuɔkplu na kayi kétitili-ma,

⁸anwuɔsu ndubo bɔya na awɔ lɛnɔ abla atuɔkplu akya-ma na kayi ketitili-ɔ bana kalɛ.

⁹Anumi adubo-ɔ bugyie geen ka asu mina litemi ɔni na lɛla lɛdi lilakana-a ulu butile. Ndubo bɔya na ayu ɔkplu kpakplaa aani sika lɛtabi kpakplaa lɛni muukeye. Batuɔkplune bammɔ lɛla lɛdi biala lilakana-a liƒu bɔkya na ataayia-ma.

¹⁰“Se atu na enu lɛla biala na ndubo-ɔ bɔsu kaduɛ na abla kasusu asiku-nya lɛlɔ.

¹¹Ɔmmɔ kana na esie bekyuli bani na awɔ ku-ma na béti béboku Babilon mɛni kudɔ na asu-ma ka adanku linyesia lɛdi ásiku ami Unwoti Katɔti kudɔ éboku-ma. Beenú o-o, belenu o-o ni, awɔ bla kalɛ na lɛ́su-ɔ.”

¹²Amu na Kɔyu kɔmmɔ kúti-mi uwi ɔni kani na Unwoti bukeye bɔmmɔ búse kalɔ bɔɔyii taakya-mi anumi na línu lɛdi bonwu lɛdi na mina kama ku budu momoomo.

¹³Na kɔku kɔmmɔ kɔdi bebweyi ine bammɔ avwi ani muukuo lɛlɔ ku kɛɛkɛ ebi ammɔ bunwini.

¹⁴Ɔmmɔ kama Kɔyu kɔmmɔ kúti-mi kɔ́tɔlɔku. Na Unwoti ɔyikun ɔ́ƒɔ-mi lɛlɔ kemmo ƒui na líti kɔnyi na livo lɛnɔ liiƒí-mi geen.

¹⁵Uwi ɔni na línwini líbo mina badi bani nli kɔbi kɔni baalɔ banii Abib na ude Keba Ketu kudɔ mmɔ ni, lɛ́kya-ma kudɔ mmɔ emeyi maatɛ na mina kasusu kábla-mi kalɛ kadi ku liƒu na lɛla lɛni nálɛku-mi mmɔ ɔsu.

¹⁶Ka lɛ́nu Unwoti Bukeye emeyi maatɛ kama ni, Unwoti ɔ́su-mi ɔnini,

¹⁷“Esekiel, ɔyawine ubi, lídie-ɔ líse ka ataasia Israelƒuɔ anu. Anwuɔsu se atu na enu lɛla lɛni na mɔɔsu-ɔ na alɛ-ma kpakplaa ete-mi.

¹⁸Si lɛ́su balalane nnii badubo bukpi na bana ekpidi ɔsu ni, ɔlɛka alɛ-ma kpakplaa anii bada bana ekpidi bɔbla baya na benwini kayi kalɛ na baláni-ma kɔtu. Na si éni na átabla lɛni ni, bana kukpi kɔkɛ-ɔ.

¹⁹Nsu si álɛ-ma na bamu benye baabla bana ekpidi bɔdi ni, badubo bukpi na ekpidi ammɔ ɔsu, nsu awɔ édie lɛlɔ na lɛla lɛdi lɛɛɛda-a.

²⁰“Ɔƒɛni si bekyuli babuni lɛnɔ bése kalɔ baabla ekpidi na lɛ́ya na ala aabala-ma na bana ngba keliela ulu lɛlɔ na ala asɔ alátɛku-ma ni, bámanku ka bekpi. Anwuɔsu si ébulo na átalɛ-ma ni, ndubo bɔyiƒala uwi ɔni na básiaku-mi kama siin na bekpi, nsu bana kukpi kɔsia-a lɛlɔ.

²¹Nsu si álɛ-ma na bénu na bénwini kayi ni, ndubɔya na belie ngba. Na lɛla lɛdi lɛɛɛda awɔ lɛnɔ.”

²²Unwoti ɔyikun ɔ́ƒɔ-mi lɛlɔ kemmo na ɔ́su-mi ɔnini, “Ta nye! Teesie kɔwɛ kemmo ngye na ndubo-ɔ bɔtɛmiku na mmɔ.”

²³Amu na lɛ́ta lísie kɔwɛ kemmo mmɔ kɔnakunwi kesii kani na ńtánu Unwoti bukeye aani kalɛ na lɛ́nu ḿbavi na Keba Ketu kɔtu mmɔ na lɛ́yu líbi anumi kalɔ.

²⁴Nwuna Kɔyu kɔ́ƒɔ-mi lɛlɔ kemmo na kɔ́tala-mi kúnyene mina lɛgba lɛlɔ. Mmɔ na Unwoti ɔ́su-mi ɔnini, “Nwini sie na atákalɛ lɛlɔ akya ƒula ɔtɔ kemmo!

²⁵Badubo-ɔ bunyimi kalɛ na asɔ akya mmɔ na alálɛ.

²⁶Na ndubo bɔya na alakana bɔtɛmi iye alɛ bekyuli bani náta benye-mi lɛlɔ mmɔ.

²⁷Nsu uwi ɔdi ɔdubo ɔni na ndubɔtina-a lɛla lɛni na adubo bɔsu na adubo bɔkana na asɔ atɛmi na uwi ɔmmɔ lɛlɔ na asu bekyuli bammɔ mina litemi. Badi badubo bunu na badi lɛnɔ beni na belénu.”