Read Lelemi Esekiel 33 Bible Online

Esekiel 33 - Lelemi bible

Esekiel 33

¹Unwoti ɔnini,

²“Esekiel, ɔyawine ubi, tɛmiku ƒula bekyuli kpakplaa na asu-ma anini, ‘Ɔkana na ubo ute ka ami Unwoti lɛ́tala bekisine badi limeyi lɛdi ka bebekpo kalɔ kadi. Na kadi bekyuli bammɔ lɛnɔ báƒuna ukyuli ɔdi banii unye-ma kagyumana na utaanu ala taasu-ma.

³Na ute-ma bɔti si uwi ɔni na ɔ́nu ka ɔgbankpi ɔdi ɔdubo na bana bekisine ɔsu na ɔlɛ-ma lɛƒiɔ.

⁴Si banii ukyuli ɔmmɔ úte bekyuli bamɛni bɔti na béni na bátadi-mu lɛlɔ ni, badubo-ma bɔdu na kekpokɔ. Nsu ɔdi ama alati bɔƒiɔ, ɔsika nka bakana na bekeli ɔgbankpi ɔmmɔ si bunu na nka bénu bɔlɛ bɔmmɔ.

⁶Nsu si ukyuli ɔni mɔɔnu ala taasu-ma mmɔ lɛnɔ néni na útete-ma bɔti ni, bekisine badubo bebekpo na badu alaekpidi bablane badi na kalɔ kammɔ kemmo, na ami Unwoti ndubuti bekyuli bammɔ kukpi etila lɛsia ukyuli ɔmmɔ lɛlɔ.’

⁷“Esekiel, ami náƒuna-a nnii enye Israel kadi bekyuli kagyumana na ataanu ala taasu-ma. Anwuɔsu nu lɛla lɛni mɔɔsu-ɔ kaduɛ na alɛ-ma kpakplaa ete-mi.

⁸Si lɛ́su balalane nnii badubo bukpi na bana ekpidi ɔsu ni, ɔlɛka atɛmiku-ma kpakplaa anii benwini kama bakya bana ekpidi. Nsu si ébulo na átasu-ma ɔmɛni ni, bana kukpi kɔsia-a lili.

⁹Na si álɛ-ma kpakplaa na ɔmɛni lɛlɔ na bámu benye ekpidi ammɔ bɔbla lɛlɔ ni, badubo bukpi na bana ekpidi ɔsu, nsu awɔ édie lɛlɔ na lɛla lɛdi lɛɛɛda-a.”

¹⁰Unwoti ɔnini, “Esekiel, ɔyawine ubi, Israelƒuɔ bakya baakya unyeƒi banii bana ekpidi ani na bábla kɔtu kɔni na ɔlɛka lɛni-ma ni, kútulo-ma buti. Na basɔ beeebo lɛnunsia lɛdi ka badubɔsɔ bakana ngba bulie lɛnɔ. Na ami mmomu na baadú kɔtɔ.

¹¹Su-ma anii kede kede nwaa ni, ami Unwoti Katɔti ɔni na nli ngba uwi ƒui mɛni ni, naaawia ukyuli ukpidi kukpi. Mmomu lɛlɔ mɔɔyɔ́-mi ka lɛnu ka ɔvumana udu na ɔ́da likpidi bɔbla ɔ́ya. Anwuɔsu si Israelƒuɔ baayɔ́ ka belie ngba bɔdi ni, ɔlɛka bada ekpidi bɔbla baya na benwini bebo-mi kudɔ.

¹²“Na asu-ma anii si ukyuli ɔbuni use kalɔ ku likpidi bɔbla ni, ala abuni ani ƒui na ɔ́ɔbla úbavi alakana-nwu bɔƒɔ na ulákɛ kɔtu bɔni. Na aya na bati anii lɛni kani na si ukyuli ukpidi ɔ́da alaekpidi bɔbla ɔ́ya na ɔɔbla lɛbuni ni, ndubuti alaekpidi ani ƒui na ɔ́bla úbavi lɛkyiɛ-nwu kede kede. Na nsɔ lɛɛɛdubo-nwu kɔtu bɔni.

¹³“Biti-nwu bɛnii líse bekyuli babuni kenye ka ndubɔya na belie ngba na ɔmmɔ kama na bése kalɔ baabla alaekpidi na bebo lɛnunsia ka lɛbuni lɛni na bábla bábavi ɔsu ni, badubɔkɛ bɔƒɔ. Mɔɔsu-mii nwaa ka ɔ́bla bi ɔ́bla dɛ ni, bekyuli bamɛni badubo bukpi na bana ekpidi ɔsu. Na bekyuli bayiƒala lɛbuni lɛni na bábla bábavi.

¹⁴“Biti-nwu bɛnii líbo balalane ɔda ka badubo bukpi na bana ekpidi ani na baabla ɔsu na báda-nya bɔbla báya na baabla lɛbuni.

¹⁵Bɛya buti-nwu bɔnii bánu báti ka basɔku ala ani na báƒɔ bekyuli kudɔ bényene kama na lɛla lɛni na bévo básiku-ma kudɔ ɔsu béte balati iye básɔku bekyuli ala ani na béyu bétése balati. Ɔmmɔ kama báda udunkpi biala báya na baadi mina litemi lɛlɔ na baabla lɛbuni ni, badubulie ngba.

¹⁶Ndubuti alaekpidi ani ƒui na bábla bábavi lɛkyiɛ-ma. Na ka bábla lɛbuni ɔsu ni, badubulie ngba.

¹⁷“Esekiel, ƒula kadi bekyuli baadú-mi kɔtɔ ka naaabla ala teete-ma ulu lɛlɔ. Nsu ama mmomu naaabla ala ulu lɛlɔ.

¹⁸Si bekyuli babuni bése kalɔ baabla alaekpidi ni, badubo bukpi na ekpidi ammɔ ɔsu.

¹⁹Na si bekyuli bekpidi bése kalɔ baabla lɛbuni ni, badubɔƒɔ bana ngba balɛku kɔtu bɔni kemmo.

²⁰Nsu ɔmɛni ƒui kama ni, Israelƒuɔ ama baanu ka ami naaabla ala teete-ma na ulu lɛlɔ. Anwuɔsu su-ma kpakplaa anii ndubo-ma kɔtu bɔni na bana ekpidi ani na bábla ɔsu.”

²¹Na akwa leevu-anyɔ kama uwi ɔni na béƒie Ɔga Yekonia ku abu bakladi aani batɔntɛne kalɛ bésienku Babilon kalɔ lɛlɔ ni, bekyuli bani muukeli kekpo akɔ unwi ɔ́si Yerusalem úbo-mi kudɔ na kɔbuli leevudi limeyi lɛlɔndi lɛlɔ. Úbasu-mi ka Yerusalem úbuli.

²²Limeyi lɛni useyi uwi asa na ukyuli ɔmɛni ɔdububo-mi kudɔ ni, Unwoti ɔyikun ɔ́ƒɔ-mi lɛlɔ kemmo ƒui. Anwuɔsu asa na kadi keteegye uwi ɔni na ɔnana ɔmɛni úubo ɔkya ni, Unwoti ɔ́ya na lɛ́sɔ lɛ́kana na mɔɔtɛmi taasu nwuna ala.

²³Ɔmmɔ kama ni, Unwoti ɔ́su ɔnini,

²⁴“Esekiel, ɔyawine ubi, bekyuli bani nébu bakya lɛma lɛni bábwɛ na Israel kalɔ lɛlɔ beeye banini, ‘Ukyuli unwi kani na Abraham ɔdi asa na Unwoti úti Israel kalɔ kamɛni ƒui úte-nwu. Na abu bumomo, anwuɔsu ɔlɛka kalɔ kammɔ kenwini abu kadi.’

²⁵“Anwuɔsu ni, Esekiel, su-ma anii ami nnini, ‘Bi ɔsu na bɛɛkali ka kalɔ kamu kadi amii kadi ka bɛɛkun lɛna lɛni kemmo na ubugya ɔmu ɔkya na bɛɛkpá baƒiɔ na bɛɛdú bekyuli?

²⁶Na kalala ala bɔbla bɔ́ƒɔ kalɔ kammɔ ƒui kemmo na bagya ku bele baalɛ́ lɛlɔ kama muedi. Nsu ɔmɛni ƒui kama biitú kɔnu kayi bɛnii kalɔ kammɔ kadi amii kadi!

²⁷“ ‘Na ɔni na ami ndi Unwoti Katɔti na nli ngba uwi ƒui mɛni ni, amii bani nébu bɛkya lɛma lɛni na bábwɛ kemmo mɛni ni, bɛdubo bukpi na kekpokɔ. Na amii bani nkya akpaklɔ ni, beƒiebuo badubo-mii buƒie. Na bani nábɛ bakya atakpɛ libu kemmo ku bani nli atakpɛ eli ƒui ni, ɔlɛ buɛ ndubo-mii bɔdu.

²⁸Ndubo bɔya na lɛla biala lɛyii udu na kalɔ kammɔ ƒui kemmo ka kalɔ kammɔ kasɔ kewi ukpludi na libile ɔyikun ɔni na bɛɛnu ka bibo ɔsu na bɛɛkun lɛmɛnɛ. Abi lɛlɔ muedi livo lilenye na ɔdi ulabla kasusu ɔnii ɔɔsia mmɔ ɔlɛ usie kesii kadi.

²⁹Ndubo-mii kɔtu bɔni na bina ekpidi ani na bɛɛbla ɔsu, na lɛya bina kalɔ kammɔ ƒui kenweni kalɔ kakwiidi kani nsɔ naaadia lɛla lɛdi. Na mmɔ na bɛdubɔnu bɛti ka ami ndi Unwoti.’

³⁰“Esekiel, ɔyawine ubi, bekyuli bani nkya-a kudɔ na Babilon mmɔ ni, baatɛmi-ɔ lɛlɔ kɔtɛ si bása na ɔma ɔmmɔ awodu ani bátu bámana-nwu kudɔ iye bana lɛtɔ kɔyakun. Na baasu banini, ‘Bɛya na buye Esekiel bunu lɛla lɛni na Unwoti ubo ute-bu ɔmwi.’

³¹Anwuɔsu bana ƒui beebo teebenu lɛla lɛni na adubɔsu, nsu béni na balabla taasiaku kalɛ na ásu-ma. Ama baasu ka basiaku-mi kama siin, nsu baanya bana bakpana taakya na beeyu bana egulabi.

³²Bɔnu kani na baanu-ɔ aani ukyuli ɔni muudie bɔyɔ lɛnu taagya ala. Na beenú, nsu balabla lɛla lɛla taasiaku lɛla lɛni na aasu-ma lɛlɔ.

³³“Na uwi ɔsɔ uletu asa na ndubo-ma kɔtɔ bɔni aani kalɛ na ásu-ma ése, na badubɔnu bati ka kenye udiene ɔdi ɔ́kya-ma akɔ.”