Read Lelemi Esekiel 34 Bible Online

Esekiel 34 - Lelemi bible

Esekiel 34

¹Unwoti Katɔti ɔnini,

²“Esekiel, ɔyawine ubi, Israel batɔnkune bese aani baƒonu badane bani mɔɔnu mina baƒonu bani ndi Israel kadi bekyuli lɛlɔ. Nsu mɔɔwia ka lɛdu bɔtɔnkune bamɛni kɔtɔ na lɛsu-ma nnini, ‘Ami Unwoti Katɔti mɔɔsu amii Israel baƒonu badane nnii bɛdubo udu bɔyii na amii ɔdi ɔsa! Bɛɛnu amii alati lɛlɔ na bíni mina baƒonu lɛlɔ bɔnu.

³Bɛɛní bana anyi ntu na biiti bana linwini teedi adi teete lɛlɔ. Na bɛɛdú babuni bani nélie lɛmwi taakun, nsu bíni na bilanu baƒonu lisu lɛmmɔ lɛlɔ!

⁴Bíni bani nse kpɛtɛ kpɛtɛ bɔgyumana na bɛbwi bani muuƒi iye binyimi-ma lɛlɛ lɛni na báƒɔ. Biidie-ma atu na baakɛ taavi kalɛ kalɛ na bilasia bani náyii ulu kama. Bɛɛbla-ma ulikplu na bɛɛɛdaku-ma lɛda.

⁵Báyii ulu bakɛ kesi kesii na ka bátakɛ ɔdane ɔdi ɔsu ni, beƒiebuo békpoku-ma na béƒie-ma taakun.

⁶Anwuɔsu mina baƒonu bégyingya bakya kalɔ lɛlɔ kesii biala. Bakɛ abi lɛlɔ ku abinkpo ƒui lɛlɔ na bátakɛ ukyuli ɔni nawia-ma kama ulu.

⁷“ ‘Na ɔƒaani ni, binu lɛla lɛni na ami Unwoti Katɔti mɔɔsu amii baƒonu badane bammɔ. Beƒiebuo békpoku mina baƒonu na béƒie-ma bákun, ɔsika bíni-ma lɛlɔ bɔnu. Na bítatásia bani na báyii lɛnɔ kama kudii. Na amii bɛɛdi teemo, nsu bítete mina baƒonu ama adila.

⁹Anwuɔsu ami Unwoti ndubo-mii kɔtu bɔni! Na likpo lɛƒɔ-ma ƒui na bina enu kemmo, na nsɔ lɛɛɛdubo bɔya na bɛbla bana badane ɔƒaamu iye bɛdu ɔdi lɛnɔ bɛkun. Ami Unwoti násu.’ ”

¹¹Ɔmmɔ kama ni, Unwoti ɔ́sɔ ɔ́su ɔnini, “ ‘Ndubo mina baƒonu kama bɔsia na ami ɔlati lɛnu-ma lɛlɔ

¹²aani kalɛ na baƒonu ɔdane ɔɔsia baƒonu bani náyii kama. Ɔ́si kɔnyana limeyi suu lɛni kani na bégyingya-ma bákya kalɔ lɛlɔ kadi bekyuli akɔ ni, uwi ɔmmɔ kani lɛlɔ na mina baƒonu báyii. Nsu ndubo bukpo bɔƒɔ-ma ƒui

¹³na lɛkpanku-ma lɛsiku baƒɔ kɔlɔ kɔni lɛlɔ na bégyingya bakya ƒui lɛsɔku liboku. Ami ndubɔbla bana ɔdane na lɛya na badi na Israelƒuɔ abi ku awɛ kemmo kesii kani na kadi kalɔ kabuni lɛlɔ.

¹⁴Badubo bɔdi bɔvi ƒaa na lɛla lɛdi lilékpoku-ma na kesii kani na kadi adila abuni kakyakɔ.

¹⁵Líse kenye ka ndubo-ma lɛlɔ bɔnu na lɛda-ma kɔkɔɔkɔ.

¹⁶Na ndubɔsia bani náyii ku bani négyingya bakya lɛnɔ kama na linyimi bani náƒɔ lɛlɔ alɛbi na bani lɛgyumana bani nse kpɛtɛ kpɛtɛ. Na bani nélie lɛmwi na bebo ɔlɔkplu ni, ndubɔdu ama, ɔsika lɛla lɛni ndi lɛbuni na mɔɔbla uwi biala.’ ”

¹⁷Unwoti Katɔti ɔ́su Israelƒuɔ bani nse aani nwuna baƒonu ɔnini, “Ndubo-mii anu bɔsia geen unwi unwi na lɛnu bani ndi baƒonu bani mbo ɔlɔkplu ku bani nse kpɛtɛ kpɛtɛ.

¹⁸Bina badi bɛɛkun livo lɛbuni geen na bɛɛnya taavi lɛkladi lɛlɔ si uwi ɔni na bɛ́wɔlɔ. Na bina badi bɛɛní ntu bɔbuni, na si bɛ́wɔlɔ na bɛkya bɔkladi lɛgba na bɔbla aba aba.

¹⁹Na ɔmmɔ ɔɔtina ka mina baƒonu bakladi ama balakɛ ntu bɔbuni taani.

²⁰“Anwuɔsu ami Unwoti Katɔti ndubo-mii kemmo bule na bani mbo ɔlɔkplu bakya bunwu, na bani nse kpɛtɛ kpɛtɛ lɛnɔ bakya bunwu.

²¹Ɔsika amii bani lɛlɔ mbo ɔkplu bɛɛtu bani nse kpɛtɛ kpɛtɛ ku bina ese kpakplaa kalɛ na adila edu amii lɛti.

²²Nsu ndubo bukpo bɔƒɔ-ma ƒui kalɛ na bilátaabla-ma lɛla lɛni naaadia. Na ndubɔƒuna-ma lɛsiku-mii kudɔ na lɛdu-mii kɔtɔ.

²³“Na ɔmmɔ kama ni, ndubute-mii baƒonu ɔdane buni ɔni ndubɔsi mina kabla ɔblane ɔni ndi Ɔga Dawid ɔtɔ kemmo na bina ƒui bani mbo ɔlɔkplu ku bani na bese kpɛtɛ kpɛtɛ ƒui bakɛ ɔdane unwi pɛ na ɔnu-mii lɛlɔ kaduɛ.

²⁴Anwu ndubɔbla bina ɔtɔnkune na ami lɛbla bina Katɔti. Ami Unwoti násu.

²⁵“Israel kadi bekyuli ndi mina baƒonu. Na líse kenye kpakplaa ka badubuli na atu bɔyɔ kemmo. Na ndubo eƒiebuo biala bɔbɔku bɔtɔlɔku kalɔ kakwiidi ku lɛku lɛmmɔ kemmo na basɔ baaadubo bɔyia.

²⁶Badubulie bamana mina kɔbi kedee lɛlɔ. Na ndubo-ma kusɛ kusɛ bute na ɔnantu ɔna ute-ma utulo kalɛ na baawia muedi.

²⁷Na bana adingyii adubo bɔnwu kaduɛ na edula lɛnɔ adia-ma. Ndubo bɔya na bakɛ bɔnwuna ƒaa na belie bana kalɔ lɛlɔ ku atu bɔyɔ na basɔ balabla ukyuli bamba kabla. Na badubɔnu bati ka ami ndi Unwoti.

²⁸Kadi bamba bekyuli basɔ baaadubo-ma buyu. Na beƒiebuo lɛnɔ basɔ beleƒie-ma balakun. Na basɔ baaadubo lɛla lɛdi lɛnɔ bɔyia.

²⁹Ndubo bɔya na baƒɛ edula abuni geen balɛku bana mmo kalɛ na kɔka kɔsɔ kulada-ma iye baƒɔ bani na bana adɔ basɔ baláma-ma.

³⁰Na ukyuli biala ɔdubɔnu ka mɔɔgyumana mina kadi bekyuli Israelƒuɔ. Ami Unwoti nése kenye kamɛni.

³¹Mina baƒonu na badi na ami ndi bana Katɔti. Na mɔɔnu-ma lɛlɔ.”