Read Lelemi Esekiel 36 Bible Online

Esekiel 36 - Lelemi bible

Esekiel 36

¹Unwoti ɔnini, “Esekiel, ɔyawine ubi, kɔ lɛsa te Israel abi lɛlɔ badi ƒui anii

²ami Unwoti Katɔti mɔɔsu-ma nnini, ‘Ƒula bekisine bápii-ɔ, na básu ka ƒula abi ammɔ ƒui adi ama adi.

³Bébile-mii na békpo-mii bádi-mii lɛlɔ ɔ́si lɛƒɛnyi ƒui lɛlɔ. Na kadi bamba bekyuli bani ndi baƒɔ béƒie-mii na baamá-mii.

⁴Anwuɔsu amii abi ammɔ ƒui ku abinkpo ku ntukpa ku awɛ ammɔ ƒui, binu lɛla lɛni na ndubo bɔbla. Bekyuli bakana na bataama amii lɛma lɛni nabwɛ liwi ukpludi ɔƒɛni na beteedumi-mii.

⁵Nsu ndubo kadi bekyuli bammɔ lɛlɔ bɔta bunye ku kɔnyi kpakplaa geen, na bani ɔdi ntulo ndi Edomƒuɔ, ɔsika ama náma-mii bétulo ƒui na báda-mii bebuo kadikɔ kɔlɔ lɛnɔ béti.

⁶Bíibo abi na uwi útu geen na ami Unwoti Katɔti lɛ́kɛ kɔnyi geen! Na kadi bamba bekyuli lɛnɔ bédumi-mii.

⁷Anwuɔsu ami lɛnɔ líse kenye kpakplaa ka ndubo-ma budu-mi na lɛkya-ma kɔƒa.

⁸“ ‘Egyii adubɔkwɛ abi ammɔ lɛlɔ na anwu ebi kaduɛ ete mina kadi bekyuli na bakɛ badi, ɔsika badubo ɔma uwi klukwii kemmo.

⁹Ndubo bɔya na bɛtu kalɔ kabuni kani nwi káyu abi ɔkwalɛ mmɔ binwini ƒui na bɛkya edula na liti lɛnu-mii lɛlɔ.

¹⁰Israel kadi bekyuli badubɔsɔ benwini bebo na bɛsɔku bina lɛma lɛni nábwɛ bɛda na bilie-mi kemmo.

¹¹Bɛdubɔwɔ bebi na bina bebuo lɛnɔ bawɔ. Na nsɔ lɛɛɛdubo-mii atu budie aani kalɛ na use ɔƒɛni. Mmomu bɛdubo bumomo geen na lɛda-mii kaduɛ litulo kudeedi ƒui na bɛnu bɛti ka ami ndi Unwoti.

¹²“ ‘Ndubɔkpanku mina kadi bekyuli Israelƒuɔ liboku ɔma na bebelie bana abi ani ndi bana adi lɛlɔ. Na badubɔtuma na kɔlɔ kɔbuni kɔni néti kɔ́yu ɔkwalɛ ɔmmɔ lɛlɔ, na kɔka kɔsɔ kuládu-ma kudii.

¹³Sɔsɔ na ɔdi ka Israelƒuɔ baakya unyeƒi taasu ka adila aladia-mii lɛlɔ na kɔka kɔɔdú-ma na beekpi.

¹⁴Nsu ami Unwoti muusé kenye ka adila adubɔdia na amii abi amɛni lɛlɔ ɔƒaamu ɔ́si ɔƒɛni úsela uwi ƒui. Na kadi bamba bekyuli akɔ ɔdi ɔsɔ ulasu ulásiku-mii lɛlɔ ɔnii biládia adila na bataapii taama. Mmomu bɛdubo adila butaadia geen na Israel kadi bekyuli bakɛ-nya adila pii geen. Ami Unwoti Katɔti násu.’ ”

¹⁶Unwoti ɔnini,

¹⁷“Esekiel, ɔyawine ubi, uwi ɔni na Israelƒuɔ beli ama alati kalɔ lɛlɔ ni, bébile kalɔ kammɔ ekisila na kasɔ keeese sɛɛn na bana ala ɔbladu ɔsu kalɛ kani na si uleku ɔ́lɛ ɔtɔ na uubile ekisila pii na ɔsɔ uuuse sɛɛn kalɛ.

¹⁸Bádu bekyuli na bákpa baƒiɔ na ɔ́ya na kalɔ kammɔ kásɔ kébie kétulo ƒui. Anwuɔsu líti kɔnyi geen na lɛ́ni mina kadi bekyuli kɔtu,

¹⁹na lɛ́ya na bégyingya bakya kadi bamba bekyuli kɔlɔ ƒui lɛlɔ kalɛ kani na ɔ́manku ka lɛbla-ma.

²⁰Kesi kesii na bakɛ ni, mina lɛnyi kani na baakya kɔƒa. Ɔsika baƒɔ bani na badi kadi bamba bekyuli beedumi-ma taasu ka ami nábɔku mina kadi bekyuli lɛ́lɛku bana kalɔ lɛlɔ.

²¹“Mɔɔbla kasusu na ala ani na baƒɔ bammɔ baasu taasiku-mi lɛlɔ lɛlɔ.

²²Anwuɔsu su Israelƒuɔ lɛla lɛni na mɔɔsu-ɔ mɛni anini, ‘Bɛ́kya-mi lɛnyi lɛni muukeye kɔƒa na kadi bamba bekyuli bani akɔ na bili mɛni akɔ. Anwuɔsu bítamanku lɛla lɛni na mɔɔwia ka lɛbla lite-mii mɛni munu munu. Ndubo-mii bɔkpanku busienku ɔma na bekyuli babu-mi lɛnyi.

²³Na kadi bamba bekyuli banu kalɛ na mina lɛnyi liikeye. Na bɛnu bɛti ka ami ndi Unwoti Katɔti. Ami násu.

²⁴“ ‘Ndubo-mii bɔkpanku bɔsiku kadi bamba bekyuli akɔ na lɛsala-mii liboku bina ɔma.

²⁵Ndubo ntu bɔni nse sɛɛn bɔkuna buwi-mii lɛlɔ na bina lɛlɔ lɛbla sɛɛn na lɛƒɔ-mii. Ndubo-mii ntu bɔkpila na bɛlɛ sɛɛn bɛsiku lɛla biala náya na biisé lɛlɔ kudɔ ku baƒiɔ ala anu ƒui muusé lɛlɔ mmɔ kudɔ.

²⁶Ndubɔda bina kayi kani neeenu litemi mmɔ lidie-mii lɛlɔ kemmo na lite-mii kayi kawɔdi ku udu ɔni mɔɔtina ka bɛsɔ bilálɛ-mi kama. Na kasusu kabuni sɔɔn na bɛdubo buteeti ɔƒaamu.

²⁷Ɔsika ndubuti mina kɔyu lite-mii na lɛya na mina litemi lɛlɔ bɔdi ku ala ani mɔɔtina-mii kama bɔsia kɔka kutaada-mii.

²⁸Na bɛdubɔsɔ binwini bibelie ɔmii ɔni na líte bina bati lɛlɔ na binwini mina kadi bekyuli na ami lɛbla bina Katɔti.

²⁹Na ndubo-mii bɔgyumana bɔsiku ala ani ƒui mɔɔyá na biisé lɛlɔ kudɔ. Na bina mmo bɔdubɔdi edula pii na kɔka kɔsɔ kuládu ɔdi.

³⁰Bina adingyii adubɔnwu ebi pii na bina edula ani na bɛ́kya lɛnɔ adia geen, na kɔƒa kɔsɔ kɔɔɔdubo-mii bukpo kudii ka biiibo adila ani bɛdi ɔsu.

³¹Bɛdubo bina ngba bukpidi bɔni na bílie bíbavi bunyimo na kɔƒa kukpo-mii geen na ala ani na bɛ́bla lɛlɔ.

³²Israel kadi bekyuli, ɔɔɔdi amii ɔsu na mɔɔbla ala amɛni, ɔsika bɛ́bla alaekpidi bítuloku lɛlɔ. Na ɔlɛka nka bina anumi ewi kalɔ na kɔƒa kukpo-mii lɛnɔ geen na ala ani na bɛ́bla ɔsu. Ami Unwoti násu.’

³³“Na su-ma anini, ‘Uwi ɔni na lɛ́bla-mii sɛɛn lɛ́wɔlɔ ni, ndubɔya na bɛsɔku bina lɛma lɛni nábwɛ bɛtu na bilie-ni kemmo.

³⁴Bɛsɔ bɛdubo bina kalɔ bɔtuma na ɔdi ulakana bɔnu bɔti ka nka kébie dii na kasɔ kaládi lɛla lɛdi.

³⁵Mmomu bɔsu na badubo banii kaadia bɔnu aani kalɛ na Eden ɔban kemmo kése dii. Na bekyuli balanu ka lɛma lɛmmɔ lɛ́bwɛ liwi, mmomu badubɔnu lɛma lɛni bátu bényene kpakplaa na bekyuli báƒɔ-mi kemmo tɛɛ.

³⁶Na kadi bamba bekyuli bani nébu beli na bina amadɔ badubɔnu ka ami násɔku lɛma lɛmmɔ lɛ́tu na lɛ́sɔku mmo bɔni nébie na buládia lɛla lɛdi mmɔ lɛnɔ lɛ́bla bɔwɔdi na bɔɔdia edula. Ami Unwoti nése kenye kamɛni.

³⁷“ ‘Ndubɔsɔ linu-mii bɔkpali ɔƒaamu na lɛbla lɛla lɛni na bɛdubuvele-mi lite-mii na bina kadi bekyuli basɔ bemomo aani baƒonu lisu bonwu kalɛ.

³⁸Na lɛma lɛni ƒui náyii udu na lɛ́bwɛ liwi kalɔ ɔƒɛni ni, bekyuli badubɔƒɔ-ni kemmo aani kalɛ na Yerusalem úse dii uwi ɔni na bebuo báƒɔ-nwu kemmo tɛɛ úte akpala bɔbla na limeyi kadikɔ.’ ”