Read Lelemi Esekiel 38 Bible Online

Esekiel 38 - Lelemi bible

Esekiel 38

¹Unwoti ɔnini,

²“Esekiel, ɔyawine ubi, Ɔga Gog ɔlalane ɔni mɔɔdi Mesek ku Tubal lɛga kadikɔ kani nkya Magog kalɔ lɛlɔ mmɔ ni, du-nwu kukpi kɔtɔ. Na asu-nwu anini,

³‘Ami Unwoti Katɔti ndi-ɔ ukisine.

⁴Na ndubo ƒula ɔyikun ƒui udu bɔyila na liti ɔdaliwa lɛkya-a ɔnungla na lɛni awɔ ku ƒula bekpone lisu bonwu lɛmmɔ. Awɔ muudie lɛdi teete bekpone bapɔnkɔ beliene bani nkya ekpola bonwu bonwu na bada kekpo agyumanala ku kuwii na bana enu kemmo.

⁵Na ebo bekpone ásiku Persia ku Kus ku Libia kɔlɔ kemmo.

⁶Na badi lɛnɔ bási Goma ku Bet-Togarma na kalɔ kammɔ katɔ kakɛ ɔni na sɔsɔ ƒula bekpone bemomo geen.

⁷“ ‘Anwuɔsu bunku ƒula bekpone na baklibi lɛlɔ na bekpo.

⁸Ɔsika na akwa alɛɛ adi kama ni, ndubo lɛdi budie bute-ɔ na etékpo Israel kadi bekyuli bani na kekpo kábwɛ-ma lɛma ƒui. Báyii udu na bekyuli bédie-ma atu uwi gyɔlɔɔ ɔdi mɛni. Nsu bekyuli bammɔ bási baƒɔ kɔlɔ kɔni lɛlɔ na bélie dii mmɔ bénwini bébo ɔma bébo beli bana kalɔ lɛlɔ. Beli ku keyi buɛɛ na ama alati bana kalɔ kemmo na abi lɛlɔ.

⁹Nsu awɔ ku ƒula bekpone lisu bonwu lɛmmɔ bɛdubo-ma bukpo aani kalɛ na ɔƒɛƒɛɛ kpakplaa ɔɔkya ligede na bɛka bɛmana-ma aani liƒlukutu bonwu lɛdi.

¹⁰“ ‘Si limeyi lɛmmɔ lídu ni, ngyi ka bɛdubo kasusu kekpidi bɔbla

¹¹bɛnii bɛdubɔkɛ kadi bani bekyuli nse kpɛtɛ kpɛtɛ na beli ku atu bɔyɔ mmɔ lɛlɔ kɔsia. Ɔsika beli lɛma lɛni na bátatu awodu bátamana-ni na bakya-ni ɔban kɔyakun bonwu na babala-ni.

¹²Na bɛdubo bekyuli bani na bábwɛ-ma lɛma béwi aani kebu alakpi dii mmɔ buyu. Bekyuli bamɛni bélie kaƒɔ aani batɔntɛne kalɛ, nsu básɔ bénwini bébo Israel kalɔ lɛlɔ kesii kani náƒɔ kuye ketulo na kalɔ ƒui lɛlɔ, na bebo bebuo ku akɛla bamba lɛnɔ.

¹³Na Seeba ku Dedan kadi bekyuli ku beyedine bani nási akpaklɔ ani nde mmɔ badubo-mii kama bunye na bebunku-mii. Ɔsika badubɔyɔ ka ama lɛnɔ bakɛ sika ɔƒualadi ku ugyiedi ku bebuo ku bana akɛla bamba ani na bebo na bekpone bamɛni badubo buƒie bɔƒɔ Israelƒuɔ kudɔ ɔsu.

¹⁴“ ‘Ami Unwoti Katɔti ngyi ka si uwi ɔni na ánu mina bekyuli bamɛni ka beli ku keyi buɛɛ lɛni ni, adubo ƒula bekpone bapɔnkɔ beliene bɔtɔnku katɔ mmɔ na ƒula lɛga kadikɔ mmɔ eboku.

¹⁵Na awɔ ndubo ƒula bekpone kpakplaa bamɛni bɔtɔnku bɔsiku ƒula lɛga kadikɔ na katɔ mmɔ buboku.

¹⁶Na adubo mina bekyuli bukpo aani liƒlukutu ku ɔƒɛƒɛɛ bonwu ɔni muutile kayaa. Na ndubo kuƒi bute na ekpo mina kadi bekyuli Israelƒuɔ kalɛ na kadi ƒui bekyuli na kalɔ lɛlɔ banu bati ka ami Unwoti nse kedee.’ ”

¹⁷“Unwoti ɔ́su Ɔga Gog ɔnini, “ ‘Kukuuku ni, mbo kenye bediene pii bani na lɛ́ya na básu mina kadi bekyuli Israelƒuɔ kpakplaa ka limeyi lɛdi ni, ndubo ukisine ɔdi budie bɔkya-ma. Na awɔ Gog ndi ukisine ɔmmɔ. Na limeyi lɛmmɔ lɛnɔ lɛ́ɛsi lɛdubo.

¹⁸Si uwi ɔni na ékpo Israelƒuɔ bammɔ áwɔlɔ ni, ndubo kɔnyi bɔkɛ geen.

¹⁹Na ndubo bɔya na kalɔ bɔkunku kpakplaa bɔdi bubo na bubakunku Israel kalɔ kammɔ na mina kɔnyi kɔmmɔ kemmo.

²⁰Na lɛlɔ lɛdubo ngba lɛla biala nkya kalɔ kammɔ lɛlɔ bɔtɔ ku bɔyia geen na ami ɔsu, kɔbɛ ku baasɛ ku alakpi akɔ bebuo ku bebuo bani mɔɔkpɛ́ kaƒɔ kalɔ ku bekyuli bayawine ƒui. Abi adubo butaabwɛ teegyingya na atakpɛ ataamami na lɛma linengudi ala ataaƒɛ teewi kalɔ.

²¹Ami Unwoti ndubɔya na Israel abi aƒɛ ebi-ɔ lɛlɔ. Na liƒu lɛni ndubo ƒula bekpone bɔda ɔsu badubo bunwini bunye bana lɛlɔ lɛlɔ beteekpoku bana bakpana ku kuwii.

²²Ndubo bɔya na ɔlɛ buɛ ubo-mii na kukpi na ndubuti lɛni-mii kɔtu. Na ɔnantu ku ɔƒɛƒɛɛ kpakplaa ku etubankɛ ku ogya aƒɛ ku ɔnyi gbagbangba ndubo butaayu-mii lɛlɔ aani kalɛ na baawɛ́ lɛla lɛdi.

²³Ndubo ɔmɛni bɔbla liti lɛtina kayawi ƒui ka ami Unwoti nse kedee.’ ”