Read Lelemi Esekiel 4 Bible Online

Esekiel 4 - Lelemi bible

Esekiel 4

¹“Ɔƒɛni ni, Esekiel, ɔyawine ubi, wia lɛtabi lɛni lɛlɔ na beenweni ala taasia na ata Yerusalem asia-ni lɛlɔ.

²Ɔmmɔ kama na aklibi lɛlɔ aani bukpoku na adubo lɛtabi lɛmmɔ aani si ɔma geen na ɔdi. Na asia ubili aka amana lɛtabi lɛmmɔ ku bekpone kunyekɔ kɔliku sia lɛlɔ amana lɛtabi lɛmmɔ. Na abla bekisine kɔkyakɔ lɛnɔ aka amana lɛtabi lɛmmɔ. Na awia lɛtalagyii bonwu bonwu ekpo kakɛ biala aani si bubo na adubo ɔban kayakun kammɔ abwɛ eduoku ɔma ɔmmɔ kemmo.

³Ti lɛbuala libui lɛdi se awɔ ku lɛtimbɔ lɛmmɔ ntɛ na ɔbla aani kowodu. Na ɔdubɔbla aani bɔlɛ kpakplaa ute Israel kadi bekyuli.

⁴“Na ɔmmɔ kama ni, na asɔ atɛ ƒula kɔmiinu ɔƒɛnyi unwi mmɔ laa útédu emeyi eti maatɛ ku aavlene (390) ɔni mɔɔtina abi ani na badubo bubo limeyi linwi biala lɛkwa linwi.

⁶“Na atu enwini na atɛ kɔdianu ɔƒɛnyi lɛnɔ emeyi 40 na ɔmmɔ lɛnɔ ɔtina kalɛ na Yuda ɔdubo abi bubo limeyi linwi biala lɛkwa linwi.

⁷Lɛtabi lɛmmɔ lílieku Yerusalem, anwuɔsu taanu-ni ɔnusɛ asa na alɛ-nwu kpakplaa anii,

⁸‘Ndubo-ɔ bunyimi buse liku linwi na alakana mmɔ bɔtɔlɔ útédu uwi ɔni na ƒula lɛtuni lɛ́sa.’

⁹“Wia lɛkyami bonwu lɛdi na eti edula lidu ɔlaaƒɔ aani kakpa ebi ku ana lidu bamba pii ɔlaaƒɔ asala na abla bodobodo. Na anwu na adubo bɔdi emeyi eti maatɛ ku aavlene (390) ani na adubo kalɔ mmɔ bɔtɛ.

¹⁰Na kakɛ blii kadi kani na adubo bɔdi limeyi biala.

¹¹Na ani ntu lɛɛƒɛɛ bonwu inyɔ kani.

¹²Na eti ukyuli kuvodɔ kɔni nákwii asala ogya na eƒi bodobodo ɔmmɔ nwuna lɛlɔ na bekyuli bammɔ anumi na eti akun.

¹³Uwi ɔni na ndububo Israel kadi bekyuli bugyingya bɔ́kya kadi bamba bekyuli akɔ ni, lɛni kani na ama lɛnɔ badubo adila ani muusé lɛlɔ bɔdi aani kalɛ na ábla mɛni na bánu.”

¹⁴Mmɔ na lɛ́su nnini, “Unwoti Katɔti, buvele kemmo, taya na lɛbla ɔmmɔ udu! Ɔsika ńtabla lɛla lɛni na lise lɛni kudii na mina ngba kemmo na lɛdi lɛla lɛni ndubɔya na nteese-ɔ lɛlɔ. Na ńtadi lɛla lɛni nékpi ani ɔlati iye ebuo ɔni na eƒiebuo ɔdi ɔ́du ɔ́va iye lɛla lɛni na ásu ka liisé lɛlɔ lɛnɔ.”

¹⁵Mmɔ na Unwoti údie kenye ɔnini, “Na ukyuli kuvodɔ kɔkwiidi kenye ni, ndubɔya na eƒi bodobodo ɔmmɔ na ɔmantɛ akɔ kuvodɔ kɔkwiidi lɛlɔ mmomu.

¹⁶“Esekiel, Yerusalem bekyuli badubo kɔka bukpi. Adila blii kani na ndubo-ma buse, anwuɔsu badubo bɔyia geen na bata babla bekyuli bani lɛlɔ nsɔ neeebo kɔsia kɔdi.

¹⁷Ɔtɔtɔ ukpidi ɔdubo ukyuli biala bɔgyu na lɛla lɛni mɔɔlɛ́ ɔsu. Na badubo buteekpi lɛnɔ buɛɛ na bana ekpidi ɔsu.”