Read Lelemi Esekiel 42 Bible Online

Esekiel 42 - Lelemi bible

Esekiel 42

¹Kama ƒui uwi ɔni na bɔ́tɔlɔ kakpakɔ kesii mmɔ búnwini búbo kaduli kedeedi kammɔ kemmo ni, ɔnana ɔmmɔ ɔ́tina-mi lɛtɔ lɛdi nnye lisu na ɔtɔ ɔni nnye ɔƒɛ kanukɔ kudɔ katɔ kakɛ, na lɛtɔ lɛmmɔ bune ɔdi lɛgba eti atɛ ku aavlanyɔ na bɔbɛbɛ bɔdi lɛgba liti ku avlaatɛ-ɛlɔ.

³Na lɛtɔ lɛmmɔ ɔƒɛnyi unwi ni, kalɔ ƒiaa kewi na kana bɔkɔku ɔdi lɛgba avlaatɛ-ine ɔdanku kakpakɔ kammɔ. Na ɔƒɛnyi ɔkladi ɔdi lɛgba kasiakɔ kani náka kámana kaduli kedeedi kammɔ. Na bátu lɛtɔ lɛmmɔ básiaku lɛlɔ esu ntɛ bule kɔtɛ.

⁴Na bálɛmi lɛtɔ lɛmmɔ kɔyakun béwi úti úsie katɔ kakɛ na lɛgba kasiakɔ katɛ kɔyakun kɔmmɔ anumi na kábɛbɛ lɛgba leevu-maatɛ na úne lɛgba eti atɛ ku aavlanyɔ.

⁵Lɛtɔ lɛtɔdi kemmo lise blii suɛ litulo lɛni nkya ntɛntɛ. Na lɛni ntɛntɛ mmɔ lɛdi lɛnɔ lɛsɔ lise blii suɛ litulo lɛni na kalɔ.

⁶Lɛtɔ lɛni nkya kalɔ nda lɛni nkya ntɛ ku katɔ lɛdi ƒui, anwuɔsu akpa abambadi adi asɔ aaada lɛtɔ lɛmmɔ aani kalɛ na use lɛtɔ lɛbambadi lɛni nnye kaduli kemmo mmɔ.

⁷Na katɔ kakɛ ƒui ɔtɔ ɔdi údie lɛlɔ na úne lɛgba liti ku avlaatɛ.

⁹Na ɔtɔ ɔmɛni ɔƒɛ katukɔ kakɛ ni, kayakun kadi kakya na ulu ɔtɛ ɔ́si kaduli kamɛni kemmo útéduo lɛtɔ lɛmmɔ kemmo. Na lɛtɔ lisu lɛdi lɛnɔ lɛkya ɔtɔ ɔni nnye ɔƒɛ kanukɔ mmɔ kada kakɛ.

¹¹Lɛtɔ lɛmɛni lise aani lɛni nkya katɔ kakɛ mmɔ udu na ani lɛnɔ libo lɛgba kasiakɔ na nina anumi.

¹²Na kayakun kani na baasia teesie lɛtɔ lɛmɛni kemmo ɔkya ɔtɔ nnye anumi mmɔ na nwuna kowodu kúti kúsie ɔƒɛ katukɔ kalɛ mmɔ.

¹³Mmɔ na ɔnana ɔmɛni ɔ́su-mi ɔnini, “Lɛtɔ lɛni na nkya kakpakɔ kammɔ katɔ kakɛ ku kada kakɛ ni, ani bédie bése sɛsɛɛ béte Unwoti bakpane badubɔdi akpala ani nse kedee etulo ƒui mmɔ. Na akpala amɛni ndi antabi udu akpala ku ekpidi lili buvele akpala ku unwi bɔbla akpala.

¹⁴Si uwi ɔni na bakpane báklibi lɛlɔ ka balɛ kakpakɔ kammɔ kemmo ni, lɛtɔ lɛmɛni kemmo na ɔlɛka basia asa na benwini besie kaduli kammɔ kemmo. Na bana adala ani na bábla bése sɛsɛɛ ute kabla kammɔ ni, mɛni na ɔlɛka bedie adala ammɔ bese na beti adala bamba bada asa na ama ku bekyuli bamba bataasala ku lɛlɔ.”

¹⁵Uwi ɔni na ɔnana ɔmɛni ɔ́wɔlɔ lɛtɔ lɛni nkya kakpakɔ kaduli geen mmɔ bɔkɔku ni, ɔ́kpanku-mi na bɔ́sɔ bútásia ɔban kayaku kani nkya ɔƒɛ katukɔ mmɔ na útákɔku kowodu kɔni náka kɔ́mana mɛni.

¹⁶Na úti nwuna ugyii lɛkɔkula na ɔ́kɔku kowodu kɔmɛni kakɛ kani nésie ɔƒɛ kanukɔ kakɛ na kúne lɛgba eti maane ku aavlene.

¹⁷Lɛni kani na ɔ́kɔku katɔ kakɛ ku kada kakɛ ku ɔƒɛ kanukɔ kakɛ, na ekpo amɛni ƒui ɔdi biala bune bɔdi lɛgba eti maane ku aavlene.

²⁰Anwuɔsu kakpakɔ kaduli geen kammɔ katɛ lɛƒɛnyi ine bɔmmɔ ƒui lɛlɔ. Na kowodu kɔni náka kɔ́mana mɛni ɔɔtina ka béle ala ani na bédie bése sɛsɛɛ bete Unwoti ku ala aƒuƒuɛdi ntɛ.