Read Lelemi Esekiel 44 Bible Online

Esekiel 44 - Lelemi bible

Esekiel 44

¹Ɔnana ɔmmɔ ɔsɔku-mi úboku kaduli kedeedi kesii kani nde kakpakɔ kammɔ ɔƒɛ katukɔ kakɛ. Na lɛ́nu ka bákalɛ ɔban ɔmɛni kɔyakun kɔlɛmikɔ ƒui bényene.

²Unwoti ɔnini, “Ɔban ɔmɛni kayakun na ami Unwoti Israel Katɔti lɛ́sia líbo. Anwuɔsu ɔlɛka bakalɛ-nwu benyene usela uwi ƒui! Na ukyuli ɔni ɔsɔ utasia mmɔ uteduo iye ɔlɛ lɛnɔ.

³Ukyuli ɔni mɔɔdi Israel lɛlɔ ɔkana na ɔsia ɔban ɔmɛni kemmo ɔtɔ kayakun uduo ubadi akpala ani na bábla béte-mi adila kedee na mmɔ kani na ɔdubɔkana na ɔsia.”

⁴Ɔmmɔ kama ni, ɔnana ɔmmɔ útiku-mi na bútásia ɔban kayakun kani na katɔ kakɛ na kakpakɔ anumi mmɔ. Na lɛ́nu kalɛ na Unwoti uukeye na bukeye bɔmmɔ bɔ́ƒɔ kakpakɔ mmɔ ƒui. Kɔnakunwi ni, líbo kalɔ na líti mina anumi líbi kalɔ.

⁵Unwoti ɔnini, “Esekiel, ɔyawine ubi, ndubo-ɔ ɔda bubo bɔni ndanku mina kakpakɔ bute. Anwuɔsu nu kaduɛ na ati bekyuli bani udu líte kuƒi ka beduo kakpakɔ kammɔ kemmo ku bani na ńtete kuƒi. Ami Unwoti Katɔti muubó-mii ɔda kpakplaa ka bɛda bina likyulikpi ngba bulie bɛya.

⁶Su Israel kadi bekyuli bani náta bénye-mi lɛlɔ mmɔ anii ami Unwoti Katɔti muubó-ma ɔda ka bada bana likyulikpi ala bɔbla baya.

⁷Bɛ́kya mina kakpakɔ kammɔ kɔƒa na uwi ɔni na bɛ́ya na baƒɔ bani na balabu-mi na bebo atuɔkplu bébeduo mmɔ uwi ɔni na baabla akpala teete-mi. Bɛ́ƒiɔ-mi na bíbile lɛla kedee lɛni na línyimiku-mii.

⁸Uwi ɔni na ɔlɛka bɛsia ulu ɔbuni lɛlɔ bɛkpa-mi ni, baƒɔ mmomu na bíti bínyene kenye ka bataanu lɛkpa lɛmmɔ lɛlɛ na mina kakpakɔ.

⁹Anwuɔsu na ami Unwoti Katɔti mɔɔsu nnii naaawia ɔƒɔ biala na ulábu-mi na ɔdi mina ɔda bubo lɛlɔ ka uduo mina kakpakɔ. Na ɔmɛni ɔdanku baƒɔ bani nli Israel kalɔ lɛlɔ.”

¹⁰Unwoti ɔnini, “Lewiƒuɔ bani bénwini kama bákya-mi na basiaku bana kadi bekyuli badi na baakpá baƒiɔ. Anwuɔsu ɔdi ka bani Lewiƒuɔ bamɛni kɔtu!

¹¹Ndubɔsɔ lite-ma kuƒi na bataabla kabla teete-mi na mina kakpakɔ aani kayakun bɔgyumana ku bebuo bani na badubuti bakpa-mi bɔdu na beteebunku bakpane bammɔ.

¹²Nsu ka Lewiƒuɔ bamɛni bébunku Israelƒuɔ na bákpa baƒiɔ ɔsu ni, ami Unwoti Katɔti líse kenye kpakplaa ka bani Lewiƒuɔ kɔtu, ɔsika bátabala Israelƒuɔ na benwini na baƒiɔ bɔkpa kama.

¹³Ka ɔ́si ɔƒɛni ni, nsɔ lɛɛɛdubo bɔya na Lewiƒuɔ badi mina bakpane iye bani bede mina ala ani nse kedee muedi. Ɔsika ɔdi ka kɔƒa kukpo-ma na anumi ewi-ma kalɔ na bebo abi lɛnɔ na ekpidi ani na bábla na eesé lɛlɔ mmɔ ɔsu.

¹⁴Na kabla kpakplaa biala na ɔlɛka babla na kakpakɔ kammɔ kemmo ni, ama ndubo-ka bɔbla.”

¹⁵Unwoti ɔnini, “Lewi kɔdua bebi bani ndi bakpane na bási Sadok ɔtɔ kemmo ni, bátalɛmi kama uwi ɔni na Israelƒuɔ bénwini kama bákya-mi. Anwuɔsu ama kani ndubo bakpane kabla butaabla teete-mi. Na ama ndubo bebuo ubugya ku lɛmwi buteeti taakpa-mi.

¹⁶Ama ndubuduo mina kakpakɔ na babla akpala bete-mi na batɔnku bakladi na lɛkpa lɛmmɔ kemmo.

¹⁷“Si uwi ɔni na bébeduo mina kakpakɔ kaduli geen kani nkya kemmo ƒui ni, ɔdi ka banu ka bada ɔkpane adala ani ndi kugyii evuo awu kpɛtɛ kpɛtɛ mmɔ. Útalɛ ka mina ɔkpane ɔdi ɔkya awu ɔni béti unwo iye bebuo linwini bábla uwi ɔni na unye mina kabla kadi lɛlɔ na kaduli kamɛni kemmo iye kakpakɔ kemmo.

¹⁸Bana lɛdiku lɛni na beebi lili ku awu ɔlɔndi ɔni nda-ma kavobi muedi ɔlɛka ɔbla awu kpɛtɛ kpɛtɛ ɔmmɔ udu kalɛ ewulu asɔ alatuku-ma si baabla kabla.

¹⁹Na asa na badubɔlɛ kakpakɔ mmɔ lɛnɔ ni, ɔdi bedie ɔkpane adala ammɔ bese likpo kedee lɛni na báklibi bése na lɛtɔ lɛmmɔ kemmo na beti ama alati adala bada asa na basɔ batásalaku bana bekyuli na kaduli kemmo mmɔ. Si bábla lɛni ni, ukyuli bamba ɔdi ulétuku adala ammɔ na weboku ɔgbankpi nwuna lɛlɔ.

²⁰“Ɔɔɔdi ka bakpane bekpeyi bana lili linwini si beewulo kɔnyana. Nsu ɔlɛka bada bana linwini edu na lileyi lilagya.

²¹Útalɛ ka bani ntɛ asa na besie kakpakɔ kaduli geen kemmo mmɔ.

²²“Útalɛ ka ɔkpane uti uleku ɔni na ukyuli ɔdi úuti ɔ́nyonu. Adagyaa kani na ɔdi uti ɔsiku Israel kadi bekyuli akɔ iye ɔkpane bamba ukpinele.

²³“Ɔdi ka bakpane bammɔ batina bekyuli kavumana kani nkya ala ani nse kedee ku ala keeke ntɛ. Na batina-ma ala ani nse sɛɛn ku ani neeese sɛɛn ntɛ.

²⁴Na badubɔbla kabla aani litemi batɛne na baklibi unyeƒi biala basiaku mina bunyimi lɛlɔ. Na ama alati badubɔbla basiaku mina litemi lɛmɛni lɛlɔ na batɔnku bekyuli na mina emeyi buni bɔdi lɛlɔ, na babla mina lɛnwunameyi lɛnɔ kedee.

²⁵“Si ukyuli ɔdi útuku ukpine ni, úbile lɛlɔ likisi na ɔsɔ uuuse sɛɛn. Anwuɔsu utalɛ ka bakpane bani bede bekpine si ɔɔɔdi nwuna bawɔne iye bebi iye banwani bananabi iye belekubi bani neeelie kɔgya kani.

²⁶Si ɔkpane ɔdi útuku ukpine ni, úbile lɛlɔ likisi na ɔsɔ uuuse sɛɛn. Na ɔlɛka ɔbla lɛlɔ bɔbla sɛɛn ɔdi. Na emeyi maatɛ kama ni,

²⁷ɔdi ka usie kakpakɔ kaduli geen kani nkya kemmo ƒui na utábla likpidi lili buvele akpala. Na ɔmmɔ kama asa na ɔsɔ ɔkana na utaabla mina kabla aani ɔkpane kalɛ. Ami Unwoti Katɔti násu.

²⁸“Ami ɔlati ndubo mina bakpane lɛlɔ butaanu, anwuɔsu beeebo kadikɔ kalɔ kadi bele bete-ma.

²⁹Na lɛla lɛni na badubule bete-ma kenye ni, antabi udu etela ani na bekyuli badubuti babakpa bete-mi ku ekpidi lili buvele akpala ani na bekyuli badubɔbla unwi bɔbla akpala ni, badubɔƒɔ ana kakɛ kadi. Na lɛla biala na Israel kalɔ lɛlɔ na bábla-ni kedee bése sɛsɛɛ béte-mi ni, ɔdi bana lɛdi.

³⁰Na edula edeedi biala na báƒɛ lɛnɔ adi bakpane bammɔ. Na ala ani na ukyuli ɔdi úse kenye na adi etela ni, ama lɛnɔ badubɔkɛ kakɛ kadi. Lɛni kani si bodobodo na mina kadi bekyuli akɔ ɔdi úƒi ni, na uti udeedi uboku bakpane bammɔ, na ndubute ukyuli ɔmmɔ kusɛ kusɛ anwu ku nwuna kaduli bekyuli ƒui si bábla ɔmɛni.

³¹“Bakpane beeebo kuƒi ka bakun aasɛ iye ebuo ɔni na anwu alati nékpi nwuna kukpi iye eƒiebuo.”