Read Lelemi Esekiel 46 Bible Online

Esekiel 46 - Lelemi bible

Esekiel 46

¹Unwoti ɔnini, “Na emeyi aku ani na bekyuli badubuti babla bana kabla na uyolu unwi kemmo ƒui ni, ɔdi ka bakalɛ kakpakɔ geen ɔban kayakun kani nésie ɔƒɛ katukɔ kakɛ. Nsu na Lɛnwunameyi ku limeyi lideedi na kɔbuli kemmo ni, ɔdi ka bakɛmi-ka bewi.

²Na Israel ɔtɔnkune ɔdubɔsi kaduli kedeedi kemmo na ɔsia uduo ɔtɔ ɔni kemmo na baasia teeduo ɔban ɔmɛni kemmo. Na ubenye kayakun na uwi ɔni na ɔkpane unye ɔɔbla akpala teevele mina kusɛ kusɛ ku unwi bɔbla ute bekyuli bammɔ. Uwi ɔmmɔ ni, ɔtɔnkune ɔmmɔ ɔdubɔyu ubi anumi kalɔ ɔtina kalɛ na ɔɔkya lili kalɔ teete-mi, na ɔmmɔ kama na ɔtɔlɔ mmɔ na kayakun kammɔ kasɔ kewi lɛni utédu useyi uwi.

³“Na Lɛnwunameyi biala lɛlɔ ku kɔbuli biala limeyi lideedi lɛlɔ ni, ɔdi ka Israel kadi bekyuli bebo ɔƒɛ katukɔ ɔban kenye mmɔ na babakya lili kalɔ bete-mi na mmɔ.

⁴Na Lɛnwunameyi lɛlɔ ni, ɔtɔnkune ɔdi ka uboku baƒonu bakɔdi ɛku ku koƒonu kɔgyani na beti babla akpala ani ndubɔyɔ-mi kaƒɔ bete-mi. Na bebuo bammɔ batasɔ na kesii kadi.

⁵Na ɔdi uti antabi akyami aani leevu ubunku koƒonu kɔgyani kɔmmɔ. Na baƒonu bakɔdi bammɔ ama ni, ɔkana na uboku kalɛ na anwu ɔlati ɔɔyɔ́.

⁶“Ɔƒɛni si kɔbuli kɔwɔdi kɔ́sia ni, ɔdi ka ɔtɔnkune ɔmmɔ uboku baƒonu bakɔdi ɛku ku ɔmantɛ akɔ ku koƒonu kɔgyani na beti babla limeyi bɔdi akpala ammɔ. Na bebuo bammɔ batasɔ na kesii kadi.

⁷Na ɔmantɛ akɔ iye koƒonu kɔgyani ni, ɔdi ka uti antabi akyami leevu ɔsia ku lɛlɔ uboku-mi. Na baƒonu bakɔdi ama ni, ɔkana na uboku kalɛ na ɔɔyɔ́. Na ɔdi ka uti nnɔ lɛsii ine ubunku antabi akyami leevu biala lɛlɔ.

⁸“Si ɔga úbo ubakpa-mi ni, ɔban kayakun kani na ɔ́sia úduo ni, mmɔ kani na ɔdubɔsia ɔlɛ.

⁹Nsu si mina kadi bekyuli bébo bábakpa-mi na limeyi bɔdi biala kemmo ni, ɔdi ka basia kayakun bamba batɔlɔ na ɔɔɔdi kani na básia béduo. Anwuɔsu si kayakun katɔdi na ásia éduo ni, ɔdi ka asia kadani alɛ. Na si kadani lɛnɔ na ásia éduo ni, ɔdi ka asia katɔdi alɛ.

¹⁰Na uwi ɔni kani na bekyuli bammɔ ƒui beeduo ni, uwi ɔmmɔ kani na bana ɔtɔnkune lɛnɔ uduo. Lɛni kani na ɔlɛka basiaku lɛlɔ balɛ uwi unwi.

¹¹“Na emeyi bamba biala bɔdi kemmo ni, ɔdi ka antabi akyami leevu na beti bebunku ɔmantɛ akɔ ɔmmɔ. Na beti akyami leevu ammɔ kani bebunku koƒonu kɔgyani akpala lɛnɔ. Nsu bekyuli bani nébo bababla akpala ammɔ bakana na beti antabi akyami ani na baayɔ́ bebunku baƒonu bakɔdi bammɔ ɔdi biala anwu lɛlɔ. Na beti nnɔ lɛsii ine bebunku antabi akyami leevu biala lɛlɔ.

¹²“Na si kaƒɔ ƒaa etela na ɔtɔnkune ɔmmɔ úti úboku ɔnii ubabla unwi bɔbla akpala iye uvele-mi na lite-nwu kusɛ kusɛ ni, badubɔlɛmi kakpakɔ geen kaduli ɔban kayakun kani na ɔƒɛ katukɔ kakɛ bete-nwu. Na ɔdubɔbla nwuna akpala aani kalɛ kani na ɔɔbla na Lɛnwunameyi biala lɛlɔ. Na si ɔ́tɔlɔ ni, na bakalɛ kayakun kammɔ.

¹³“Na ɔtanta biala ni, koƒonu kɔkɔdi kɔni na kútasɔ na ɔdi ka beti bakpa bete-mi na kaƒɔ kayɔ-mi.

¹⁴Na ɔdi ka beti ɔlaaƒɔ akɔkɔ leevu bebunku nnɔ ɔsii unwi. Na ɔda bubo bɔmmɔ bulavumana úti úsela uwi ƒui.

¹⁵Na koƒonu kɔkɔdi ku ɔlaaƒɔ ku nnɔ na bɛdubo buti butaakpa-mi uwi ƒui.”

¹⁶Unwoti Katɔti ɔnini, “Si Israel ɔtɔnkune ɔdi úti nwuna kalɔ kakɛ kadi úte ubidi ɔdi ni, kalɔ kammɔ kadubunwini ubidi kadi na kabla ɔtɔ ɔmmɔ kemmo kese.

¹⁷Nsu si ɔtɔnkune ɔmmɔ úti nwuna kalɔ kakɛ kadi úte nwuna kabla ɔblane ni, kadubunwini kabla ɔblane ɔmmɔ kadi butédu uwi ɔni na baadi bɔnwuna bɔkɛ lɛkwa limeyi, na kalɔ kammɔ kadubɔsɔ kenwini kesie ɔlati ɔtɔnkune ɔmmɔ kudɔ. Ɔsika ɔtɔnkune ɔmmɔ ubidi geen kani na mbo kuƒi ka uti ɔmii ɔni na béte-nwu unwini anwu ɔdi ƒui.

¹⁸“Ɔtɔnkune ɔdi utetile mina bekyuli bana kalɔ lɛlati bɔdi kuƒi na uƒie-ma kalɔ ɔƒɔ. Na kalɔ biala na ɔdubute ubidi ni, ɔti nwaa ka anwu ɔlati kadi na kadi ɔ́si kukuuku.”

¹⁹Ɔnana ɔni mɔɔtina-mi kakpakɔ ala mɛni ni, ɔ́sɔ ɔ́kpanku-mi úsienku kakpakɔ kaduli geen kemmo. Na búti bɔ́sia kaduli kammɔ kada kakɛ na bútédi búnye lɛtɔ lɛni na bédie bése sɛsɛɛ béte bakpane mmɔ kayakun. Mmɔ na ɔ́tina-mi lɛtɔ pii úbu na kakpakɔ kaduli kammɔ ɔƒɛ kanukɔ kakɛ

²⁰na ɔ́su-mi ɔnini, “Mɛni ndi kanwakɔ kesii kani na ɔdi ka bakpane bammɔ beƒulo lɛna lɛni na beeti taabla unwi bɔbla akpala ku ekpidi lili buvele akpala. Na mɛni kani na baagyi antabi ani na beeti taabla akpala mmɔ. Ɔsika útalɛka beti akpala amɛni balɛku mɛni batásia kaduli kedeedi kemmo kesii kani na ɔƒɛni kalɛ ukyuli ɔdubutuku-nya na ɔsiaku ɔgbankpi ɔdi.”

²¹Ɔmmɔ kama búnwini búsie kaduli kedeedi kemmo na bɔ́sia bɔvi lɛƒɛnyi ine bɔmmɔ ƒui.

²²Na ɔkɔkɔ biala na lɛƒɛnyi ine bɔmmɔ ƒui ni, lɛ́nu kaduli blii bamba kadi kani bune ndi lɛgba liti ku leevu-maane na bɔbɛbɛ bɔdi lɛgba liti.

²³Na béti atabi bátu kowodu klukwii kɔdi bámana kɔduli kɔmɛni ɔdi biala kɔmadɔ kɔmadɔ. Na bálɛ asi bámana awodu amɛni lɛlɔ kudɔ kudɔ.

²⁴Amu na ɔnana ɔmɛni ɔ́su-mi ɔnini, “Mmɔ na kakpakɔ kabla bebunkune beeƒulo lɛna lɛni na bekyuli bani nébo babakpa Katɔti béboku.”