Read Lelemi Esekiel 47 Bible Online

Esekiel 47 - Lelemi bible

Esekiel 47

¹Ɔnana ɔmmɔ ɔ́sɔ ɔ́kpanku-mi na búnwini búsie kakpakɔ kemmo mmɔ. Na mmɔ na lɛ́nu ketu blii kadi ka kaagbá taasi kayakun kammɔ kalɔ. Kése kalɔ kási kakpakɔ kammɔ kada kakɛ na ɔ́gba ɔkɛ lɛkpabi lɛmmɔ kudɔ na ɔ́gba ɔkɛ kaduli kammɔ kemmo úsela ɔƒɛ kanukɔ kakɛ.

²Bɔ́gyu bɔ́tɔlɔ kakpakɔ amadɔ mmɔ na bɔkɛ bútávi ɔban kayakun katɔdi kudɔ na bɔ́ka bɔ́mana bútédu ɔban kayakun kani na ɔƒɛ katukɔ. Na lɛ́nu ka ketu blii kammɔ kágba késela ɔƒɛ kanukɔ ɔ́si ɔban kayakun kani na kada kakɛ mmɔ kudɔ.

³Ɔnana ɔmmɔ úti úsie ɔƒɛ katukɔ kakɛ na lɛ́nu ka údie nwuna ugyii lɛkɔkula na ɔ́kɔku lɛgba budie eti leevu ku liti ku leevu ɔ́yula kada kalɛ na ketu kammɔ kéti késela mmɔ. Na ɔ́su-mi ɔnii nkya ketu kammɔ lɛgba nteebo. Na ntu bɔmmɔ búbedu-mi anikpo.

⁴Ɔ́sɔ ɔ́kɔku lɛgba budie eti leevu ku liti ku leevu ɔ́yula na ɔ́su-mi ɔnii nkya lɛgba na ntu bɔmmɔ búbedu-mi kavobi.

⁵Ɔ́sɔ ɔ́kɔku lɛgba budie eti leevu ku liti ku leevu ɔ́yula na ketu kammɔ kasɔ kaladia lɛgba bɔkya ntu bɔkpi na ákpi.

⁶Amu na ɔ́su-mi ɔnini, “Esekiel, ɔyawine ubi, se atu na enu lɛla lɛdi asiku ala ani na ánu lɛlɔ.” Bɔ́sia búsie ketu kammɔ kɔtu.

⁷Na ntánu egyii pii ka enye ketu ɔvi ɔnanyɔ.

⁸Na ɔnana ɔmmɔ ɔ́su ɔnini, “Ntu bɔmɛni bɔ́gba bɔkɛ ɔƒɛ kanukɔ mɛni búsela Yordan Ketu ɔkwalɛ kemmo na bɔdubo kenye buti butákya Ɛpugyie kemmo kesii kani na ɔdubo mma ntu bɔmmɔ bunwini bɔbla ntu bɔbuni mamaama bɔni mɔɔdia bɔni.

⁹Na kesi kesii na ntu bɔmɛni bɔ́gba bɔkɛ ni, ketu kemmo lɛna ku kɔbɛ lidu lidu badubo mmɔ bɔkya. Ɔsika ɔdubo ngba ku ntu bɔbuni bɔni mɔɔdia bɔni buti buboku Ɛpugyie kemmo.

¹⁰Na ɔ́si ɔma ɔni baalɔ banii Engedi útédu Eneglaim ɔma bekyuli badubo kɔbɛ buteedie na mmɔ na bakula bana lɛsawu na ɛpu kɔtu mmɔ. Na kɔbɛ lidu pii kɔdubɔkya Ɛpugyie kemmo aani kalɛ na kɔkya Mediterenia Ɛpu kemmo.

¹¹Nsu lɛba lɛni ndubɔkya ɛpu amadɔ mmɔ ani ni, mma bɔdubɔkya-ni kemmo kalɛ na bekyuli bakɛ-mu bedie.

¹²Adingyii pii adubɔkwɛ ketu kamɛni kɔtu na ataanwu ebi kɔbuli biala. Na evete ammɔ aaadubo bɔkwii bɔnu kudii, ɔsika adubo ntu butaakɛ uwi biala taasiku ketu kani mɔɔgbá taasi kakpakɔ kudɔ mmɔ na bekyuli badubuti evete ammɔ babwi bekyuli.”

¹³Unwoti Katɔti ɔ́su Israel kadi bekyuli ɔnini, “Si uwi ɔni na béle kalɔ kammɔ béte Israel adua leevu-anyɔ ammɔ ni, Yoseƒ kɔdua bekyuli badubɔƒɔ bule akpa anyɔ. Na ka éle kalɔ kammɔ likeke, ɔsika ami nése ƒula bati kukuuku kenye ka ndubuti kalɔ kamɛni lite bana. Na ndubɔtina-a kalɔ kammɔ lɛmii.

¹⁵“Ɔmii ɔni na katɔ kakɛ ɔdubuse kalɔ ɔsi Mediterenia Ɛpu kudɔ na uti usie ɔƒɛ katukɔ utédu Hetlon ɔma. Na ɔkɛ Lebo Hamat ɔ́via Sedad.

¹⁶Na ɔkɛ Berota ku Sibraim lɛma lɛni nwi Damasko ku Hamat lɛgakadikɔ kalɔ ɔmii lɛlɔ. Na utáwɔlɔ na Hasa-Hatikon ɔni nkya Hauran ɔmii lɛlɔ.

¹⁷Anwuɔsu ɔmii ɔni na katɔ kakɛ ɔmii ɔdubɔvi Mediterenia Ɛpu ku Hasar-Enan ɔni nkya Damasko ku Hamat ɔmii lɛlɔ ntɛ.

¹⁸“Na ɔmii ɔni na ɔƒɛ katukɔ kakɛ ɔmii ɔdubuse kalɔ ɔsi ɔmii ɔni nkya Damasko ku Hauran lɛga kadikɔ kalɔ ɔmii lɛlɔ. Na ɔdubuti ɔyu kada kakɛ na ɔkɛ Yordan Ketu kani néle Gilead ku Israel kɔlɛkɛ. Na ɔdubusie útáwɔlɔ na Ɛpugyie na kesii kani nde Tama ɔma.

¹⁹“Na ɔmii ɔni na kada kakɛ ɔdubuse kalɔ ɔsi Tama na ɔkɛ kada kada na ɔƒɛ kanukɔ kakɛ útédu abiɔ ani na Meriba-Kades. Na ɔdubɔsia Egyipteƒuɔ ɔmii lɛlɔ utédu Mediterenia Ɛpu.

²⁰“Na ɔmii ɔni na ɔƒɛ kanukɔ ɔdubuse kalɔ ɔsi Mediterenia Ɛpu utédu kesii kani mma Hamat na ɔƒɛ kanukɔ kakɛ.

²¹“Kalɔ kani nkya ntɛ bɔmɛni na badubo bule bute Israel adua ammɔ.

²²Kadubo Israelƒuɔ kadi bunwini ku baƒɔ bani ƒui nkya-ma kudɔ na báwɔ béte Israelƒuɔ. Ɔdi ka banu baƒɔ bamɛni aani Israelƒuɔ bebi na bada-ma lɛni kani na bele kalɔ kammɔ

²³kakɛ kadi bete-ma na kɔdua kɔni kemmo na bakya. Ami Unwoti Katɔti násu.”