Read Lelemi Esekiel 48 Bible Online

Esekiel 48 - Lelemi bible

Esekiel 48

¹Unwoti ɔnini, “Kalɔ kani nwi kási Israel kalɔ ɔmii ɔni ntɛ ɔƒɛ katukɔ kakɛ ɔ́yu útédu Mediterenia Ɛpu na ɔƒɛ kanukɔ ni, kɔdua biala bekyuli badubo kalɔ kammɔ bule lɛkpa lɛdi bɔkɛ. Na ɔmii ɔni ntɛ katɔ kakɛ ɔdubɔsia Hetlon ku Hamat lɛma na útáwɔlɔ na Hasar-Enan ɔni nkya Damasko ku Hamat lɛga kadikɔ kalɔ ntɛ ɔmii lɛlɔ. Na ndubɔtina-a ulu ɔni lɛlɔ na badubo kalɔ kammɔ bule bute adua ammɔ, Dan ku Aser ku Naƒtali ku Manase ku Eƒraim ku Ruben ku Yuda. Na ɔdubɔsi katɔ útédu kada.”

⁸Unwoti ɔnini, “Na Yuda kalɛkɛ kada kakɛ ni, mmɔ na mina kalɔ kani badubudie bese sɛsɛɛ kadubo bɔkya. Na kana bune ɔdi lɛma ntɛ eluku bɔkɔku maane. Na nwuna bɔbɛbɛ ɔdubɔsi Israel ɔmii ɔni nkya ɔƒɛ katukɔ kakɛ úsie ɔƒɛ kanukɔ kakɛ útédu Mediterenia Ɛpu. Na mmɔ lɛnɔ na badubo mina kakpakɔ bɔtu.

⁹“Kesii kadi na kalɔ kamɛni ntɛntɛ kadubɔbla mina ɔdi. Na kadubo bune eluku maane na kabɛbɛ eluku aku.

¹⁰“Ami Unwoti ndubo mina kalɔ kani na bédie bése sɛsɛɛ mɛni kakɛ buti bute bakpane. Na bana kakɛ kani medu-ma kadubune eluku maane úsie eluku atɛ bɔbɛbɛ. Na mina kakpakɔ kadubo ntɛntɛ bunye.

¹¹Na bakpane bani nási Sadok ɔtɔ kemmo lɛti pɛ ndubo kadikɔ bɔkɛ na kalɔ kamɛni bule kemmo. Ɔsika ama kani násiaku-mi kama siin na bátalɛ-mi kama uwi ɔni na Lewiƒuɔ ku Israelƒuɔ bakladi bése kalɔ baabla ekpidi.

¹²Na bakpane kalɔ kamɛni kadubɔbla kedee ketulo ƒui na kadubɔkya Lewiƒuɔ kalɔ kada kakɛ.

¹³“Mina kalɔ kakɛ kakladi kani na bédie bése sɛsɛɛ mɛni ni, ndubuti-ka lite Lewiƒuɔ. Na kana bune bɔdi eluku maane na bɔbɛbɛ bɔdi eluku atɛ.

¹⁴Na útalɛka beti kakɛ kadi beye iye beti-ka badi kuye. Ɔsika kalɔ kammɔ ndi kalɔ kabuni ƒui, na kadi mina kadi.

¹⁵“Na mina kalɔ kada kakɛ mmɔ lɛnɔ ɔdubɔbla eluku maane úsie eluku anyɔ bɔbɛbɛ ɔdubɔbla Israelƒuɔ ƒui ɔdi, na mmɔ na Yerusalem ɔma unengudi ɔdubo bɔkya ku bebuo kadikɔ ku bana lɛtɔ ƒui, nsu mmɔ ɔɔɔdi kesii kani na bédie bése sɛsɛɛ mɛni.

¹⁶Ɔma unengudi ɔmmɔ lɛƒɛnyi ine bɔmmɔ ƒui bɔkɔku bɔdubo bulie. Na ɔƒɛnyi biala ɔdubo bɔbla liluku linwi ku kakɛ.

¹⁷Na kalɔ kadi kadubo bɔka bɔmana ɔma ɔmɛni na kana bɔkɔku bɔdi lɛgba eti maane ku lɛgba aavlanyɔ ɔ́ka ɔmana.

¹⁸Na kalɔ kani nwi ɔƒɛ katukɔ kakɛ ku ɔƒɛ kanukɔ kakɛ ɔ́si ɔma unengudi ɔmmɔ ɔmii lɛlɔ ɔdubo bunwini katumakɔ ute Yerusalem kadi bekyuli.

¹⁹Bekyuli bani nkya ɔma unengudi ɔmɛni kemmo ɔdi biala ɔkana na ɔtuma kalɔ kamɛni lɛlɔ na ɔɔɔda kɔdua kɔni ukyuli na ɔdi.

²⁰“Na kalɔ kamɛni ntɛntɛ na mina kalɔ kani bédie bése-mi sɛsɛɛ mmɔ kakya. Na kadi ɔma unengudi ɔmmɔ kadi ku kese. Na kana bune ku bɔbɛbɛ ƒui bɔdubɔbla unwi ɔni ndi eluku maane ɔƒɛnyi biala.

²¹“Na kalɔ kani nwi ntɛ bɔmɛni kama kakɛ úsie ɔƒɛ katukɔ ku kanukɔ kadi Israel ɔtɔnkune kalɔ. Na nwuna kadikɔ kamɛni kakɛ késie ɔƒɛ katukɔ kakɛ útédu Yordan Ketu. Na ɔkɛ útédu Mediterenia na ɔƒɛ kanukɔ kakɛ. Na nwuna kalɔ kamɛni ntɛntɛ na mina kalɔ kani na bédie bése sɛsɛɛ mmɔ ku mina kakpakɔ kakya.

²²Na kadanku kesii kani ndi Lewiƒuɔ kadi ku kesii kani na Yerusalem ɔma unengudi ɔmmɔ uwi. Na Israel lɛlɔ ɔdine ɔmɛni kalɔ ɔmii ɔni nkya katɔ kakɛ ni, mmɔ ndi Yuda kalɔ. Na nwuna ɔmii ɔni nkya kada kakɛ ni, mmɔ ndi Benyamin kalɔ.”

²³Unwoti Katɔti ɔnini, “Kalɔ kamɛni kada kakɛ ni, mmɔ ndi kalɔ kani na béti béte Israelƒuɔ adua akladi. Na kɔdua biala ɔdubɔƒɔ kalɔ kani nási ɔmii ɔni ntɛ ɔƒɛ katukɔ ɔ́yu úsie ɔƒɔ kanukɔ útédu Mediterenia Ɛpu. Na ndubɔtina-a kalɛ na badubule kalɔ kammɔ ɔ́si katɔ útédu kada. Na ulu ɔmɛni lɛlɔ na badubo kalɔ kammɔ bɔƒɔ, Benyamin ku Simeon ku Isakar ku Sebulon ku Gad.

²⁸“Na Gad kalɔ ɔmii na kada kakɛ kani ndi Israel kalɔ kawɔlɔkɔ ɔmii. Na ɔdubuse kalɔ ɔsi Tama ɔma na ɔkɛ kada kada na ɔƒɛ kanukɔ útédu abiɔ ani nka Meriba-Kades. Na ɔkɛ útásia Egyipteƒuɔ ɔmii lɛlɔ na útáwɔlɔ na Mediterenia Ɛpu.

²⁹“Lɛni na badubo kalɔ kammɔ bule bute Israelƒuɔ adua leevu-anyɔ ammɔ. Ami Unwoti Katɔti násu.”

³⁰Unwoti ɔnini, “Ɔban kɔyakun leevu-inyɔ ndubo Yerusalem ɔma awodu ani na bátu bámana mmɔ lɛlɔ bɔkya. Na kɔyakun ɛtɛ ɛtɛ ndubo lɛƒɛnyi ine bɔmmɔ bɔkya. Na badubɔsia-ku anyi ɔkɛnku adua leevu-anyɔ ammɔ anyi lɛlɔ. Na katɔ kakɛ na Ruben ku Yuda ku Lewi ɔban kɔyakun kɔdubɔkya. Na ɔƒɛ katukɔ kakɛ ni, Yoseƒ ku Benyamin ku Dan ɔban kɔyakun kɔdubɔkya. Na kada kakɛ ni, Simeon ku Isakar ku Sebulon ɔban kɔyakun kɔdubɔkya. Na ɔƒɛ kanukɔ ni, Gad ku Aser ku Naƒtali ɔban kɔyakun kɔdubɔkya. Na ɔƒɛnyi biala kowodu bune bɔdi liluku linwi ku kakɛ. Anwuɔsu lɛƒɛnyi ine bɔmmɔ ƒui kowodu bune bɔdi eluku aku. Na lɛnyi lɛwɔdi lɛni na badubo ɔma unengudi ɔmmɔ bɔlɔ ndi Unwoti Uli Mɛni!”