Read Lelemi Esekiel 7 Bible Online

Esekiel 7 - Lelemi bible

Esekiel 7

¹Unwoti ɔnini,

²“Esekiel, ɔyawine ubi, su Israelƒuɔ anii ami násu nnini, úwi ɔsɔ uletu asa na Israelƒuɔ ɔdi ɔdubo bɔsa na bawɔlɔ! Ɔsika badubo kalɔ kammɔ ƒui bɔbwɛ na uwi klukwii ɔdi kemmo

³aani lɛtuni ute bina ekpidi ani na bɛɛbla na eesé lɛlɔ ɔsu. Ami Unwoti líti kɔnyi geen

⁴ɔni na nsɔ lɛɛɛdubo ɔdi kɔnyana kɔdi bɔnu lɛnɔ. Ndubo-mii kɔtu bɔni na likpidi lɛni na bɛ́bla ɔsu na bɛnu bɛti ka ami ndi Unwoti.

⁵“Lɛla lɛdi lítalɛ tɔ kudii aani ɔgbankpi ɔni udu nsia ulu ɔdubo mɛni kalɛ.

⁶Na si úbeduo lɛnɔ ni, bina ngba amu bɔ́sa.

⁷Amii Israelƒuɔ ɔdi ɔ́sa! Kébu blii na bɛdubɔnu liƒu ala na abi lɛlɔ na bɛbla gyuma gyuma mmomu na ɔɔɔdi limeyi bɔdi ku lɛlɔyɔ.

⁸Ndubo mina kɔnyi ala bɔbla ƒui na lɛni-mii kɔtu kɔni námanku-mii na bina likyulikpi ala bɔbla kenye.

⁹Bina ekpidi ávi ntu na etulo bɔsu, anwuɔsu nsɔ lɛɛɛdubo-mii kɔnyana kɔdi bɔnu lɛnɔ. Na bɛdubo bɔnu bɔti ka sɔsɔ ami Unwoti náni-mii kɔtɔ lɛni.

¹⁰Ɔgbankpi úude! Litemi tatɛ ulu siin lɛlɔ ku lɛlɔ katɔ bɔtalaku bɔ́ƒɔ kesi kesii.

¹¹Na balalane bakantankpine baalɛ́ enu na balábla-ma lɛla lɛdi. Anwuɔsu ɔdi ɔɔɔdubo bɔlɛ ɔgbankpi ɔmɛni kemmo. Na bina ala ani na bibo ƒui na áƒɔ-mii kuye geen mmɔ badubo-nya bubile.

¹²Uwi ɔdubo ɔni na ukyuli biala ɔdubo udu bɔyii. Na liyedi teete lɛlɔ kenye kadubo buklo.

¹³Na bekyuli bani néti bana nlɔ ku kese kadi béye lɛnɔ ni, balasɔku ala ammɔ belete-ma. Ɔsika ɔlɛka bani bina ƒui kɔtu na bina alaekpidi ɔsu.

¹⁴Bávwi lise béte-mii bɔti ka báaklibi ekpola bése béte kekpo. Nsu bina ɔdi ɔɔɔdubo kekpo kammɔ busie ɔsika lɛ́kɛku Israelƒuɔ ƒui kɔnyi.

¹⁵“Kekpo ku lɛlɛ ku kɔka kɔ́ƒɔ kesi kesii! Na badubo bekyuli bani nkya akpaklɔ bɔdu na kekpokɔ. Na bani nli lɛma kemmo badubo bukpi na kɔka ɔsu iye lɛlɛ likpidi ɔsu.

¹⁶Na bani na ndubo bubu bulie ngba lɛnɔ badubo bukeli busie abi lɛlɔ aani babloduma bani mɔɔtɔlɔ kɔwɛ kemmo taatáwia kabɛkɔ kesii kani na bakɛ bɔƒɔ. “Na bina ƒui bɛdubo kɔnyana buwulo na bina ekpidi ɔsu.

¹⁷Bina enu adubo butaatɔ na bina akɔnkɔ ayɔ.

¹⁸Na kɔnyana adala na bɛdubo butaada biti bɛtina kalɛ na bɛkya lɛƒɛda kemmo. Nsu liƒu ala sɔɔn ndubɔƒɔ-mii keliela kemmo. Na kɔƒa ala lɛnɔ sɔɔn bekyuli badubo butaanu taati na bina anumi lɛlɔ na bɛdubukpeyi bina kuduo linwini ƒui ka bɛ́yila lɛnunsia biala ɔsu.

¹⁹Bɛdubo bina sika ugyiedi ku ɔƒualadi ƒui bubo buwi kuyeya aani kebu alakpi, ɔsika ɔmmɔ ndi alakpa anyɔ ani nákpanku-mii átákya likpidi kemmo na asɔ alakana-mii bɔƒɔ ɔƒɛni bɔsiku mina kɔnyi kudɔ. Na ala ammɔ asɔ eeebo kuye kɔni na akana na eye bina lɛdila lɛdi muedi.

²⁰Bɛ́talaku lɛlɔ katɔ laa na bíti bina sika asɛɛ ebi ani náƒɔ kuye geen bɛ́bɔ kadi bamba baƒiɔ bani muusé lɛlɔ bíte lɛlɔ. Anwuɔsu ndubo bɔya na sika asɛɛ ebi ammɔ asɔ alálɛ kuye lɛla lɛdi.

²¹Kadi bamba bekyuli bani ndi baƒɔ badubo bebeyu-mii na bakya-mii kɔƒa.

²²Badubo bɔbwɛ búduo mina kakpakɔ kemmo na babla-ka kesii kani muusé lɛlɔ na kasɔ kalamanku ka bakpa-mi na mmɔ. Nsu ndubɔda anumi lidie na ubo ute lɛni.

²³“Ala ƒui adubo buƒu na kalɔ kammɔ ƒui kemmo. Na bekyuli bɔdu ku kalala bɔbla bɔdubɔƒɔ Israel ƒui.

²⁴Anwuɔsu ndubo ɔmii ɔni bekyuli mbo kalala geen bɔsu na bebo bebeti bina kɔduli ƒui benwini bana ɔdi. Na lɛmɛnɛ lɛni na bɛɛkun na bina bekpone kpakplaa bani na bibo lɛlɔ ni, nwuna kenye kekulo. Na badubɔbla bina kɔkpakɔ ƒui na kuteese lɛlɔ na kɔsɔ kulamanku bɔkpa bɔdi.

²⁵Badubo-mii liƒu bɔkya ɔni na bɛdubuti lɛnungyie kemmo bɛwia keyi kayɔdi, nsu bilákɛ bɔdi.

²⁶Ɔgbankpi ɔdubo butaalɛ taasia kama na biteenu kenye kekpidi uwi ndi uwi. Na bekyuli badubusie kenye bediene kudɔ betéye-ma si mbo kenye kadi ntɛ-ma. Bakpane badubo mina ɔda bubo bɔtina bɔda bɔya. Na batɔnkune basɔ baaadubo kasusu kadi bɔkɛ butaakya bekyuli.

²⁷Na bina baga ku bana benengu muedi badubo buteewulo ka basɔ beeebo lɛnunsia lɛdi ɔsu. Na bina enu ataatɔ kpakpaakpa ku liƒu bonwu. Ndubo-mii kɔtu bɔni na lɛbla-mii aani kalɛ na amii lɛnɔ bɛ́bla bekyuli bamba. Na bɛdubɔnu bɔti ka ami ndi Unwoti.”