Read Lelemi Esekiel 8 Bible Online

Esekiel 8 - Lelemi bible

Esekiel 8

¹Uwi ɔni na béti Ɔga Yehoiakim ku abu bakladi bésienku Babilon kalɔ lɛlɔ kama akwa aku ni, Yudaƒuɔ batɔnkune béteebo-mi kudɔ na mina kesii taabasiaku-mi na mmɔ. Na kɔbuli kɔkundi limeyi lɛlɔndi lɛlɔ ni, Unwoti Katɔti Ɔyikun ɔ́ƒɔ-mi lɛlɔ kemmo ƒui

²na lɛ́nu lɛla lɛdi aani ukyuli ɔyawine. Na ɔ́si nwuna kavobi mmɔ ɔ́yu ubo nwuna lɛgba kakɛ ni, use aani ogya. Na ɔ́si-nwu kavobi úti ɔ́kɔ úsie nwuna lili kakɛ use aani lɛbuala lɛni na békuo-ni kede kede na liikeye geen.

³Na lɛ́nu aani si kɔnu na údie na ɔ́da-mi linwini. Na mina kɔyu kemmo ala bɔnu bɔmmɔ kemmo ni, Unwoti Kɔyu kútiku-mi kúsienku kayaa na úti-mi úsienku Yerusalem. Kɔyu kɔmmɔ kúti-mi kúsienku kakpakɔ kaduli geen kemmo na ɔban kayakun kani nkya kɔtɔ kakɛ mmɔ. Na lɛ́nu ka bávɔ baƒiɔ badi bálɛ bani muusé Unwoti lɛlɔ na ɔ́ya na úti kɔnyi kpakplaa geen.

⁴Ɔmmɔ kama ni, lɛ́nu ka Israel Katɔti bukeye bɔ́ƒɔ mmɔ aani kalɛ na lɛ́nu na Keba Ketu kɔtu.

⁵Unwoti ɔ́su-mi ɔnini, “Esekiel, ɔyawine ubi, nwini nu katɔ kakɛ.” Amu ka línwini lɛ́nu ni, lɛ́nu baƒiɔ bani muusé lɛlɔ mmɔ ka balɛ bede lɛkpabi lɛni nlɛ katɔ kakɛ mmɔ kudɔ.

⁶Amu na Unwoti ɔ́su-mi ɔnini, “Ánu kɔbɔ ala ani muusé lɛlɔ ani na Israelƒuɔ baabla? Bana alaekpidi amɛni aayá na mina kakpakɔ keesé lɛlɔ na mmɔ kasɔ kaaadia keeete ka bakpa-mi. Na adubo ala ani nébie étulo amɛni muedi bɔnu.”

⁷Ɔmmɔ kama ni, béti-mi bésienku kaduli kammɔ ɔban kenye na lɛ́nu ka báƒuaala liƒi lɛdi na kowodu kɔmmɔ kemmo.

⁸Amu na Katɔti ɔ́su-mi ɔnini, “Bla liƒi lɛmmɔ na libomo libu.” Na ka lɛ́bla lɛni ni, lɛ́nu ka kayakun na kadi.

⁹Mmɔ na Unwoti ɔ́su-mi ɔnini, “Sia duo mmɔ na anu kɔbɔ ala ku alaekpidi ani udu na bekyuli baabla mmɔ.”

¹⁰Na ka líduo ni, lɛ́nu ka bátaa ala lidu lɛni mɔɔkpɛ́ kaƒɔ kalɔ ku bebuo babambadi bani neeese sɛɛn na beesé lɛlɔ lɛnɔ básia awodu ammɔ lɛlɔ mmɔ. Na bátaa baƒiɔ bamba bani na Israelƒuɔ baakpá lɛnɔ básia mmɔ.

¹¹Ɔnana ɔni baalɔ Yaasania na ɔdi Saƒan ubidi ɔnanabi ku Israelƒuɔ batɔnkune bamba bani ndubɔbla nkyuli liti ku aavlanyɔ benye mmɔ na ɔdi biala ɔda oloƒui bɔkyula kɔlɛkɛ unye na ɔnyi ɔmmɔ ɔ́ƒɔ ɔtɔ ɔmmɔ kemmo ƒui.

¹²Amu na Katɔti ɔ́su-mi ɔnini, “Esekiel, aanu kɔbɔ alaekpidi ani udu na Israel kadi batɔnkune bɔmmɔ benye baabla taabɛ? Bávɔ baƒiɔ béyile bana lɛtɔ kemmo bálɛ na baasu banii lɛɛɛdubo-ma bɔnu, ɔsika baakali banii líidie Israel atu kukuuku.

¹³Nsu nsɔ ndubo-ɔ lɛla lɛni návi ntu litulo amɛni bɔtina.”

¹⁴Ɔ́kpanku-mi úsienku ɔban kayakun kani na katɔ kakɛ na ńtanu ka beleku badi belie beewulo Tamus baƒiɔ.

¹⁵Katɔti úye-mi ɔnini, “Áƒɔ adi anii Israel beleku ndubɔbla lɛmɛni udu? Nsu awɔ bo na abanu ani násɔ ébie étulo ɔmmɔ.”

¹⁶Ɔmmɔ kama bákpanku-mi bésienku kakpakɔ kaduli geen kebliidi kemmo kesii kani na lɛ́nu ka banana aavlanyɔ-ɛlɔ benye bede kayakun kammɔ na lɛkpabi lɛmmɔ ku ɔtɔ ɔmmɔ keyi ɔƒɛƒɛɛ kaƒɔkɔ ntɛ na bénwini kama bákya Unwoti kakpakɔ kammɔ na benye beebó kalɔ teete ɔƒɛ ɔni nátu ɔdubo mmɔ.

¹⁷Mmɔ na Katɔti ɔ́su-mi ɔnini, “Ɔdi likpidi geen ka Yuda kadi bekyuli benye baabla ala ani muuƒí livo mɛni udu. Na ɔɔɔdi amɛni lɛti mmomu etemila tatɛ ulu lɛlɔ ku kalala káaƒɔ Israel kalɔ kemodi kammɔ lɛlɔ ƒui kesi kesii na bákya-mi kɔnyi geen. Na ulu ukpidi ƒui ɔni lɛlɔ na badubɔsia na bakya-mi kɔƒa na bedumi-mi na ɔdi mɛni.

¹⁸Anwuɔsu ami lɛnɔ kɔnyi kpakplaa kemmo na ndubo-ma kɔtu bɔni na lɛɛɛdubo-ma kɔnyana bɔnu munu munu. Na si ina baava taakpali-mi teevele muedi lɛɛɛdubo bunu bute-ma.”