Read Lelemi Daniel 1 Bible Online

Daniel 1 - Lelemi bible

Daniel 1

¹Na lɛkwa lɛtɛdi lɛni kemmo na Yehoiakim ɔɔdi lɛga na Yuda kalɔ lɛlɔ ni, Babilonƒuɔ Ɔga Nebukadnesar úsie útékpo Yerusalem.

²Unwoti ɔ́ya na ɔ́di lɛlɔ na úƒie Yehoiakim ɔ́tɔlɔku, na úti ala adi bene ani beeti taabla kabla na Katɔti kakpakɔ lɛnɔ ɔ́tɔlɔku. Na uwi ɔni na Babilon ɔga ɔmmɔ ɔ́sɔ únwini úsie Babilon ni, úti ala ammɔ útése ɔtɔ na nwuna baƒiɔ kakpakɔ.

³Limeyi lɛdi ni, ɔga ɔmɛni údie lɛdi úte nwuna kesii benengu ƒui ɔtɔnkune ɔni baalɔ banii Aspenas ɔnii ɔƒuna bakloƒu badi ɔsiku Israel bagadine ɔtɔ ku Yudaƒuɔ benengu bammɔ lɛnɔ akɔ.

⁴Na ɔga ɔmmɔ ɔ́sɔ ɔ́su-nwu ɔnini, “Nu ka bekyuli bammɔ bebo ɔlɔkplu kaduɛ na baadia bɔnu, na báda anu na bebo ababla, na badi bakutine lɛnɔ na bámanku ka babla kabla na ɔga kesii. Na atina-ma kalɛ na baatɛmi bula lɛdi ku bunweni lɛnɔ.

⁵Na eteete-ma adila ku ntɛ bɔni kani na beete-mi. Na atumini-ma akwa atɛ kalɛ na bakana na benwini litemi katɛkɔ kabla bablane.”

⁶Amu na báƒuna Yudaƒuɔ bakloƒu badi bani ndi Daniel ku Hanania ku Misael ku Asaria. Na bana ƒui bási Yuda kɔdua kemmo.

⁷Na unengu ɔmmɔ ɔ́sia-ma Babilonƒuɔ anyi. Na Daniel únwini Beltesasar, na Hanania únwini Sadrak, na Misael únwini Mesak, na Asaria únwini Abednego.

⁸Nsu Daniel ɔ́bla kasusu ka lɛla lɛni kani na Katɔti úte kuƒi ka nwuna kadi bekyuli badi ni, ani kani na anwu ɔdubo bɔdi. Anwuɔsu úvele unengu ɔmmɔ kuƒi ka betete-nwu adila ku ntɛ bɔni na beete bekyuli bani nkya ɔga kesii mmɔ na baadi.

⁹Katɔti lɛnɔ ɔ́ya na ukyuli ɔmɛni ɔ́bla buɛɛ ɔkya Daniel aani ɔkpana kalɛ na ɔ́bla-nwu lɛƒɔndia.

¹⁰Nsu unengu ɔmmɔ ɔ́ya na Daniel ɔ́ti ɔnini, “Ɔga ɔmmɔ ɔlati nálɛ ugyii lɛla lɛni na ɔdi ka beteete-mii na bitaadi na bitaani lɛnɔ úse. Anwuɔsu mɔɔyia ka ɔdubɔya na badu-mi si ɔƒɛni kalɛ amii bilakɛ lɛlɔ aani bina bakpana bakladi kalɛ na ala ani na ɔ́su mmɔ tadi tadi ɔsu.”

¹¹Ɔga ɔtalane unengu ɔmɛni ɔ́wia bagyumane úte Daniel ku nwuna bakpana ɛtɛ bakladi bammɔ. Anwuɔsu Daniel ɔ́su ɔgyumanane ɔmmɔ ɔnini,

¹²“Na emeyi leevu ani ndubo kemmo mɛni ni, kɔku-bu nu. Si údu ɔdiwi ni, ya na beteete-bu lɛkpuna ku nwuna lɛlɔ akyala na butaadi, na butaani ntu.

¹³Na si uwi ɔni na emeyi leevu ammɔ édu ni, na eti-bu akɔku bakloƒu bakladi, na awɔ ɔlati anu kalɛ na adubɔbla-bu.”

¹⁴Ɔgyumanane ɔmɛni únu lɛla lɛni na Daniel ɔ́su, na ɔbla bana lɛƒɔyɔ úte-ma na emeyi leevu ammɔ kemmo.

¹⁵Emeyi leevu kama ni, Daniel ku nwuna bakpana bákɛ lɛlɔ na baadia bɔnu teetulo bakloƒu bakladi bani na beete adila ani na beete ɔga kesii bekyuli bammɔ.

¹⁶Na ɔ́si ɔmmɔ kama ni, lɛkpuna ala ammɔ kani na ɔ́ya na Daniel ku nwuna bakpana baadi, na adila abuni ku ntɛ bɔni na beete bakladi kenye.

¹⁷Katɔti ɔ́ya na bakloƒu ine bamɛni báda anu na bebo ababla sɔsɔ. Báka lɛku pii na bénwini bakutine geen. Na Daniel anwu ɔɔkana na uudie ana kalɔ muedi ku kɔyu kemmo ala bɔnu taati ku ana kalɔ budie.

¹⁸Amu ka uwi údu ka ɔga kabla ɔblane unengu ɔmɛni ɔ́kpanku bakloƒu bammɔ ƒui úboku ɔga anumi ni, úti-ma útényene Ɔga Nebukadnesar anumi.

¹⁹Na ɔga ɔmmɔ úye-ma kenye kemmo etemila únu, na ɔ́nu ɔ́ti ka ɔdi uuubo kenye ogya aani Daniel ku Hanania ku Misael ku Asaria. Anwuɔsu béte-ma kabla na ɔga litemi katɛkɔ.

²⁰Na ɔ́si uwi ɔmmɔ úsela ni, si ɔga ɔmmɔ ɔɔwia kasusu na lɛla lɛdi lɛlɔ ni, nwuna bevone ku kasusu betine ƒui ɔdi ɔsɔ uledu bakloƒu ine bamɛni ɔdi munu munu!

²¹Na Daniel ɔ́bla kabla na mmɔ úti útédu Ɔga Kores lɛga bɔdi uwi lɛkwa lideedi kemmo.