Read Lelemi Daniel 11 Bible Online

Daniel 11 - Lelemi bible

Daniel 11

¹Na ɔlɛka ati lɛnɔ ka ami nágyumana Mediani Ɔga Dario, na líbunku-nwu na nwuna lɛga bɔdi lɛkwa lideedi kemmo.

²“Lɛla lɛni na ndubo-ɔ bɔsu mɛni lɛdi lɛla lɛni nsia ulu lɛdubo, na lɛdubo bɔlɛ na lɛla lɛdi liletile-ni kuƒi. Baga ine badi badubo lɛga bɔdi na Persia kalɔ lɛlɔ atɔ asia, nsu unedi ɔdubo lɛkɛ bɔkɛ butulo bani ntɔ-nwu ƒui. Na geen ni, na nwuna lɛkɛ ɔsu ɔdubo ɔyikun bɔkɛ geen, na ɔya na bekyuli ƒui bata benye Grikiƒuɔ lɛga kadikɔ lɛlɔ.

³Na ɔga ɔyikune ɔdi ɔdubo ubelie liboku lɛlɔ, na mmɔ na anwu utaabla lɛla lɛni mɔɔyɔ́ ɔga ɔlakɛne ɔmɛni kaƒɔ.

⁴Nsu ni, nwuna lɛga kadikɔ kammɔ kadubo bɔbwɛ kɔnakunwi bule akpa ene bɔkya kalɔ lɛƒɛnyi ine bɔmmɔ ƒui lɛlɔ. Na lɛga kadikɔ kammɔ kadubunwini lɛga kɔdikɔ ine bɔni ndubo bɔlɛ keyi, nsu ama baaadubo ɔyikun bɔkɛ aani nwuna lɛga kadikɔ kani nákya. Na nwuna badine bammɔ lɛnɔ ɔdi ɔɔɔdubo bɔsi nwuna ɔtɔ kemmo.

⁵“Ɔga ɔni ndubo kalɔ kammɔ kada kakɛ lɛlɔ bɔdi ɔdubo ɔyikun bɔkɛ geen. Nsu nwuna bekpone batɔnkune akɔ unwi ɔdubɔta unye-nwu lɛlɔ na uƒie lɛga kadikɔ kammɔ kakɛ kadi ɔƒɔ-nwu kudɔ.

⁶Na akwa adi kama ni, ɔga ɔni mɔɔdi kada kakɛ lɛlɔ ku ɔga ɔni mɔɔdi katɔ kakɛ badubo bɔsa bunyimi kenye kadi. Na ɔga ɔni nkya kada kakɛ ubi ulekubi ɔdubusie utélieku ɔga ɔni nkya katɔ kakɛ. Nsu uleku ɔmmɔ lɛgadi ɔyikun ɔdubo bɔsa bɔyii udu. Na ɔmmɔ kama ni, uleku ɔmmɔ ku ɔgyani ku bebi ku kabla bablane bani na ɔdanku ƒui badubo-ma bɔdu.

⁷“Na ɔmɛni kama ni, nwuna lɛlɔ ukyuli ɔdi ɔdubo ubataadi lɛga na lɛga kadikɔ kani nkya kada kakɛ mmɔ lɛlɔ. Na ɔdubo bɔta na utékpoku lɛga kadikɔ kani nkya katɔ mmɔ na uƒie bana kɔgyumanakɔ kpakplaa kɔmmɔ ɔƒɔ.

⁸Na ɔdubuti bana baƒiɔ bammɔ ƒui ɔtɔlɔku usienku Egyipte kalɔ lɛlɔ ku bana lɛkɛ lɛni náƒɔ-ma kuye geen aani sika ɔƒualadi ku ugyiedi. Nsu ɔdubo uwi bɔƒɔ geen asa na wasɔ wekpoku lɛga kadikɔ kamɛni. Na akwa adi kama ni,

⁹Ɔga ɔni nkya katɔ kakɛ mɛni lɛnɔ ɔdubɔta ɔnii utéyu lɛga kadikɔ kani nkya kada kakɛ mmɔ ɔtu na ukpoku-ma, nsu badubo-nwu bɔbɔku na unwini kama usie nwuna kalɔ lɛlɔ.

¹⁰Ɔga ɔni mɔɔdi lɛlɔ na katɔ kakɛ bebi badubo bɔta ku bekpone lisu bonwu bani ndubo bɔta ku ogya aani kalɛ na ketu keeyi taagbala ala ku kɔku bonwu beti betédu kesii kani na lɛlɔ ɔdine ɔmmɔ kɔgyumanakɔ kpakplaa kunye.

¹¹“Nsu ɔmɛni ɔdubɔya na ɔga ɔni nkya kada kakɛ mmɔ ɔkɛ kɔnyi geen na ɔta ukpoku bana bekpone pii bammɔ na ɔdi-ma lɛlɔ ƒui.

¹²Na ɔga ɔmɛni ɔdubo lɛmɛnɛ butaakun geen na bekyuli lisu bonwu lɛni na ɔ́du ɔsu. Nsu bekyuli bukpo taadi lɛlɔ bɔmɛni bɔɔɔdubo uwi ɔdi bɔƒɔ.

¹³Ɔsika ɔga ɔni nkya katɔ kakɛ ɔdubo bekyuli bani na bebo ɔkplu geen na bemomo bɔsala bani udu nátakya-nwu tɔ. Na akwa adi kama ni, ɔdubuse kalɔ uteekpoku kɔlɔ bamba lɛnɔ.

¹⁴“Ɔƒɛni si uwi ɔmɛni údu ni, kadi bekyuli pii badi badubo ulu bɔwia ka bata benye ɔga ɔni nkya kada mmɔ lɛlɔ kalɛ na budie taatina bɔmɛni bubo-nwu kemmo ka badubɔta benye ɔga ɔmɛni lɛlɔ. Nsu badubo bɔbla bɔnɔ.

¹⁵Na ɔmmɔ kama ni, bekpone bani nási katɔ kakɛ mmɔ badubɔka bekyuli bani nkya kada bammɔ kɔgyumanakɔ kpakplaa kɔmmɔ bakya na beƒie kadi baƒɔ. Na bekpone bakukudi bani náƒɔ lɛnyi na bagyi kekpo ala kaduɛ muedi badi balási kada kakɛ mmɔ na bakana bekpone bani nási katɔ mɛni bɔbɔku na benwini kama.

¹⁶“Na ɔga ɔni nékpo ɔ́si katɔ kakɛ mmɔ ɔdubɔbla kalɛ biala mɔɔyɔ́-nwu kaƒɔ na ɔdubo kalɔ kedee kammɔ muedi buƒie bɔƒɔ na ubile-ka.

¹⁷Na geen ni, ɔdubo ugyii bɔlɛ ka ɔdubuti nwuna bekpone bammɔ ƒui usienku na utékpo ɔdi kada kakɛ bekyuli bammɔ lɛlɔ. Na ɔdubɔwia kuƒi ka ɔya na babla unwi kalɛ na keyi buɛɛ kebo-ma ntɛ na uleku ɔni na ɔdubɔkali ka úti úte ɔga ɔmmɔ na uti ɔsu, nsu ɔmmɔ ulatɛ.

¹⁸“Kama ƒui ni, ɔga ɔni nási katɔ kakɛ na ɔdubo lɛlɔ katɔ butaatalaku mɛni ni, ɔdubo kadi bekyuli pii bani nli bede ɛpu kɔtu mmɔ bukpoku na ɔdi-ma lɛlɔ. Nsu bekpone ɔtɔnkune unengu ɔdi ndubo-nwu lɛlɔ bɔdi na nwuna lɛlɔ katɔ bɔtalaku bɔyii udu.

¹⁹Na ɔdubo bunwini ku kasusu ka utéduo nwuna kɔgyumanakɔ kpakplaa kɔmmɔ kemmo na nwuna kalɔ lɛlɔ, nsu badubo-nwu lɛlɔ bɔdi na ulu lɛlɔ uwi ɔni na ɔkɛ úsela, na basɔ baaadubo-nwu bɔnu lɛnɔ kudii.

²⁰“Na ɔmmɔ kama ni, ɔga bamba ɔni ndubɔkya katɔ kakɛ mmɔ ɔdubɔwia ka utaaƒɔ kuyi taasiku bekyuli bammɔ kudɔ kalɛ na ɔya na nwuna lɛga kadikɔ kekeye. Nsu akwa adi kama ni, anwu lɛnɔ ɔdubo bɔwɔlɔ na ɔyii ɔkya kɔnakunwi ɔni na ɔɔɔdanku ukyuli kɔnyi ablala iye kekpo kemmo.

²¹“Ɔga ɔni na badubo buse na katɔ kakɛ mmɔ na udeedi kenye ni, ɔdubɔbla ukyuli ukpidi ɔni nátamanku útete lɛla lɛdi bɔbla. Na útasi baga liku lɛnɔ. Nsu ɔdubo bɔda bɔlɛ kɔnakunwi ku kenyemini ku katɔlɔ na ɔdi lɛlɔ na lɛga kadikɔ kammɔ kemmo.

²²Na ɔdubo bekpone lɛlɔ bɔdi na ɔda Katɔti ɔkpane unengudi ɔƒunadi muedi udie nwuna kenyekɔ.

²³Na ɔdubo lɛla lɛdi bunyimiku-ma, nsu ɔkɔ ala bɔbla na adi, na ɔdubo bunyimi bɔmmɔ bubile ina ka nkyuli ɛlɛɛ badi kani na ndubo-nwu kama bɔsiaku.

²⁴Na tati tese kemmo ni, ɔdubo kɔlɛkɛ kɔni kemmo na lɛlakɛ lɛkya kaduɛ lɛlɔ bɔdi, na ɔmɛni ɔdi lɛla lɛni na nwuna bati kuuku bátabla kudii. Na ɔdubuti lɛkɛ ku bana ala ƒui ule ute nwuna kama basiakune. Nsu ala amɛni adi biala aaadubo uwi butu.

²⁵“Ɔdubo bekpone bayikune lisu bonwu lɛdi bɔsala. Na ɔdubɔkya lɛlɔ kayi geen na ɔta utékpo ɔga ɔni nkya kada kakɛ mmɔ. Na ɔga ɔni nkya kada kakɛ mmɔ lɛnɔ ɔdubɔta ku bekpone bani mbo ɔkplu betulo ɔga ɔtɔdi ɔmɛni badi ɔnii uténye ɔsiaku-nwu, nsu ulakana, ɔsika nwuna badi badubo-nwu kakya bɔkya na balɛ-nwu kama.

²⁶Na bekyuli bamɛni badubɔsi bagadine kasala kenengudi kammɔ kemmo. Na kekpo kammɔ ɔsu badubo nwuna bekpone lisu udu bɔyila, na badu nwuna bekyuli pii lɛnɔ.

²⁷“Baga inyɔ bamɛni badubulie likpo linwi basala eli, nsu likyulikpi ku ɔkɔ sɔɔn na badubo bɔnyi bute lɛlɔ. Na bana kɔkwɛ ku kasusu ƒui kadi kalálɛ kɔsia kɔdi, ɔsika lɛla biala na ndubo libalɛ ni, Katɔti ɔ́ɔlɛ-ni ugyii úse.

²⁸Na ɔmmɔ kama ni, ɔga ɔni nkya katɔ kakɛ ɔdubunwini usie nwuna kalɔ lɛlɔ ku akɛla enengudi. Nsu si ɔkɛ ulu úsela ni, ɔdubɔta unye Katɔti bunyimi kedee bɔmmɔ lɛlɔ, na ukpoku nwuna bekyuli na ɔbla-ma lɛla biala na ɔɔyɔ́, asa na unwini uteesie nwuna kalɔ lɛlɔ.

²⁹“Amu na uwi ɔni na Katɔti ɔlati ɔ́lɛ ugyii úse lɛlɔ ni, ɔga ɔni nkya kɔtɔ mmɔ ɔdubɔsɔ ɔta na utékpoku ɔga ɔni nkya kada kakɛ mmɔ ku nwuna bekyuli. Nsu na uwi ɔmɛni lɛlɔ ni, ala ƒui adububo enwini abla ɔbambadi.

³⁰Lɛkɔlɔ libendi lɛdubɔsi ɔƒɛ kanukɔ libo na libekpoku-nwu na lɛya na enu aƒɛ-nwu. Na ɔmmɔ kama na ɔsɔ unwini uteesie nwuna kalɔ lɛlɔ na utédie nwuna kɔnyi ɔlɛ Katɔti bunyimi kedee bekyuli. Na bekyuli bani mmomu nálɛ Katɔti kama na baaasiaku-nwu kama siin ni, ɔdubɔnu ama kɔnyana.

³¹“Na ɔdubo bekpone bɔtala na besie na betébile kakpakɔ kammɔ ekisila ku kagyumanakɔ na bada limeyi ndi limeyi akpala bɔbla baya. Na ɔdubɔya na beti lɛla lɛni na Katɔti uukisi na liisé lɛlɔ bebese mmɔ.

³²Ɔga ɔmmɔ ɔdubuti kenyemini ku katɔlɔ ɔkpanku bekyuli bani naaasiaku Katɔti kama siin ute lɛlɔ. Nsu bani ngyi Katɔti geen ni, badubɔta benye-nwu lɛlɔ kpakplaa.

³³“Na uwi ɔmmɔ kemmo ni, bani mbo lɛnunda badubɔtina bekyuli pii ala. Nsu badubo badi bɔdu ku kuwii iye bakyula-ma iye beƒie-ma ala ani na bebo ƒui baƒɔ na beti badi bakya aban ɔtɔ.

³⁴Na bana lɛbibo kemmo ni, kebunku blii kani na badubɔkɛ. Na bana kama basiakune pii badubo-ma kama bɔlɛ na bakya-ma kakya.

³⁵Na bana badi bani náda anu ni, badubo abi bubo kalɛ na Katɔti ɔbla-ma kedee na ɔƒɔ-ma utédu uwi ɔmmɔ kawɔlɔkɔ ɔni ndubo na nwuna lɛla lɛni na ɔ́lɛ ugyii úse kenye.

³⁶“Ɔga ɔmmɔ ni, lɛla lɛni mɔɔyɔ́-nwu kaƒɔ na ɔdubo butaabla. Na ɔdubo lɛlɔ katɔ bɔtalaku na ɔtina ka ubo kenyekɔ utulo baƒiɔ ƒui. Na ɔdubo Katɔti ɔlati buteedumi. Na geen ni, lɛla biala lɛdubo bɔsia kalɛ na ɔɔwia wetédu uwi ɔni na kɔnyi kɔni na Katɔti úti ɔ́kya anwu ɔlati ku nwuna bekyuli kɔ́yɔ-nwu.

³⁷Na ɔga ɔmɛni ɔdubo baƒiɔ bani na nwuna bati kuuku bákpa ku baƒiɔ bani na beleku bammɔ baayɔ́ teetulo ƒui buni. Na geen ni, ɔdubuti lɛlɔ unyene kesii kani na kákuku ketulo baƒiɔ bamɛni ƒui kadi ka utulo bana ɔdi biala.

³⁸Na ɔya na bataakpa baƒiɔ bani na nwuna bati kuuku bétenu kɔku dii muedi bani na baalɔ kɔgyumanakɔ baƒiɔ. Na ɔdubute-ma ɔbu ku sika ugyiedi ku ɔƒualadi ku asɛɛbi ani muukeye ku etela bamba lidu lɛnɔ.

³⁹Na baƒiɔ bani nási kaƒɔ mɛni badubo-nwu bubunku na uƒie kɔgyumanakɔ kpakplaa ƒui ɔƒɔ. Na ukyuli biala ɔni mɔɔkpá baƒiɔ bamɛni ni, ɔdubɔya-nwu na unye kenyekɔ kenengudi geen, na ɔkɛ kenyekɔ ɔyikun ku akɛla ku kɔlɔ lɛnɔ.

⁴⁰“Na kawɔlɔkɔ uwi ɔmmɔ lɛlɔ ni, ɔga ɔni nkya kada kakɛ ɔdubɔta na utékpoku ɔga ɔni nkya katɔ kakɛ. Nsu ɔga ɔmmɔ ɔdubɔlɛ ubasiaku-nwu aani ɔƒɛƒɛɛ ku nwuna kekpo kɛɛkɛ pii ku bekpone bapɔnkɔ beliene ku lɛkɔlɔ. Na geen ni, nwuna bekpone badubɔsia kɔlɔ kɔlɔ kemmo bɔlɛ aani kalɛ na ketu keeyi taagba na badi-ma lɛlɔ.

⁴¹Na uwi ɔni na bédu kalɔ kedee kammɔ lɛlɔ ni, badubɔdu kadi pii bekyuli bewi mmɔ. Nsu Edom abi lɛlɔ bekyuli ku Moab ku Amon lɛlɔ badine badubɔlɛ-ma enu kemmo.

⁴²Na mmɔ ni, ɔga ɔmɛni ɔdubɔdi kɔlɔ pii bekyuli lɛlɔ, ina Egyipteƒuɔ muedi balálɛ-nwu enu kemmo.

⁴³Na ɔdubuti bana ala ani náƒɔ-ma kuye ƒui ɔtɔlɔku aani sika ugyiedi ku ɔƒualadi. Na ɔdubɔdi Libia ku Kus kɔlɔ bekyuli lɛnɔ lɛlɔ.

⁴⁴Nsu kenye kadi kadubɔsi ɔƒɛ katukɔ ku kada kakɛ kabagyila-nwu ɔtɔtɔ, na ɔdubɔta utébile bekyuli geen ku kɔnyi.

⁴⁵Na ɔmmɔ kama ni, ɔdubɔbla keliekɔ na Ɛpu Ubendi ku Sion Kɔbi ntɛ. Nsu kawɔlɔkɔ ni, badubo-nwu udu bɔyila na ukyuli biala ulakana-nwu bɔƒɔ.”