Read Lelemi Daniel 3 Bible Online

Daniel 3 - Lelemi bible

Daniel 3

¹Ɔga Nebukadnesar údie lɛdi ɔnii batu sika ugyiedi baƒiɔ lɛtabi lɛdi na nina bɔkuku bɔdi lɛgba bɔka liti ku aavlene na nina bɔbɛbɛ bɔdi lɛgba bɔka yaalenwi. Na ɔ́ya na béti-ni bálɛ kesii kani baalɔ banii Dura Kɔwɛ na mmɔ ude Babilon ɔma unengudi ɔmmɔ kudɔ.

²Na ɔ́lɔ nwuna kadi benengu ƒui ɔ́siku nwuna lɛga kadikɔ kesii biala úbasala. Na ama ndi aban bagadine benengu ku nwuna kasusu bakyane ku egulabi lɛlɔ banune ku litemi batɛne ku nwuna bakutine benengu ɔnii bebedie lɛtabi lɛmɛni keyi batina kadi ƒui.

³Anwuɔsu bana ƒui bébo na bébenye lɛtabi lɛmmɔ anumi.

⁴Amu na ɔkutine unengu ɔdi ɔ́ta únye na úte bɔti ɔnii, “Amii bani nási kadi ƒui akɔ ku adi ƒui batɛmine bíbo mɛni, binu ɔda bubo bɔni na bula ɔga úte ka badi-mu lɛlɔ!

⁵Kɔkpɛɛ ku atoloyii ku lɛbentaa lidu lɛdubo kalɔ buse ku bɔku uwi klukwii kemmo. Na si uwi ɔni na ala amɛni ése kalɔ ni, ɔlɛka ɔdi biala ɔkya lili kalɔ na umwi sika ugyiedi baƒiɔ lɛtabi lɛni na bula Ɔga Nebukadnesar ɔ́ya na bátu bényene mmɔ.

⁶Ukyuli biala ɔni meni lili kalɔ bɔkya bute-nwu ni, badubo-nwu buƒwimi bɔkya lɛgyavonku kemmo.”

⁷Anwuɔsu uwi ɔni kani na bekyuli bamɛni bénu lɛnu ku agyala ammɔ kani na bana ƒui bákya lili kalɔ na beemwi lɛtabi lɛmmɔ.

⁸Babilonƒuɔ badi bákɛ kasiakɔ na ɔmɛni lɛlɔ ka badu Yudaƒuɔ bamɛni kɔtɔ bete Ɔga Nebukadnesar.

⁹Na básu-nwu banini, “Bula Ɔga Ɔbune, bɔɔwia ka elie ngba uwi ƒui!

¹⁰Ébo-bu ɔda anii ukyuli biala ɔkya lili kalɔ ute ƒula sika ugyiedi baƒiɔ lɛtabi lɛmɛni si uwi ɔni na agyala amɛni ése kalɔ aaku.

¹¹Na ásu lɛnɔ ka ukyuli biala néni na útabla lɛni ni, badubo-nwu bubo bɔkya lɛgyavonku kemmo.

¹²Ati, áƒuna nkyuli ɛtɛ badi na kesii kani na káƒɔ kuye sɔsɔ na Babilonƒuɔ kalɛkɛ kani lɛlɔ na aadi. Ama ndi Sadrak ku Mesak ku Abednego. Nsu ni, bédie atu na ƒula litemi lɛlɔ, na balákya lili kalɔ teete ƒula baƒiɔ iye ƒula sika ugyiedi lɛtabi lɛni na bátu bényene mmɔ.”

¹³Ɔmɛni ɔsu Ɔga Nebukadnesar ɔ́kɛ kɔnyi geen, na ɔ́ya na bététiku-ma béboku.

¹⁴Na ɔ́su-ma ɔnini, “Línu ka bíni na bítakya lili kalɔ bítete mina baƒiɔ iye sika ugyiedi lɛtabi lɛni na lɛ́ya na bátu bényene mmɔ.

¹⁵Ɔƒaani ni, ndubɔya na bedie lɛnu na bagya agyala bete-mii. Na si bɛ́kya lili kalɔ bímwi mina lɛtabi lɛni na lɛ́tu ni, lɛla biala lɛdubo buse buɛɛ bute-mii na ɔsa. Nsu si bíni na bítabla lɛni ni, badubo-mii bubo bɔkya lɛgyavonku kemmo, na baƒiɔ badi baaadubo-mii bɔkana bɔƒɔ bɔsiku mina enu kemmo.”

¹⁶Amu na Sadrak ku Mesak ku Abednego bédie kenye banini, “Ɔga Ɔbune, abu bulawia ka bukpo budie lɛlɔ na litemi lɛmɛni kemmo.

¹⁷Katɔti ɔni na abu bɔɔkya lili kalɔ teete ni, ɔkana na ɔƒɔ-bu ɔsiku ƒula lɛgyavonku lɛmmɔ kemmo.

¹⁸Nsu si ina útabla lɛni muedi ni, abu bɔmu bunye kpakplaa ka bulakya lili kalɔ bulete ƒula baƒiɔ sika ugyiedi lɛtabi lɛni na átu ényene mmɔ.”

¹⁹Amu ka básu lɛni ni, Nebukadnesar ɔ́nyina anumi geen ku kɔnyi ɔ́kya nkyuli ɛtɛ bamɛni. Na ɔ́su nwuna kabla bablane ɔnii basɔ babla lɛgyavonku lɛmmɔ na lɛƒɔ ogya libu akpa maatɛ.

²⁰Na ɔmmɔ kama údie lɛdi úte nwuna bekpone bayikune geen ɔnii benyimi-ma kpakplaa na bebo-ma bakya ogya ɔmmɔ kemmo.

²¹Na ka ɔ́yɔ ka babla lɛni kɔnakunwi ɔsu ni, mmɔ kani na bekpone bammɔ bényimi Sadrak ku Mesak ku Abednego na bébo-ma bákya lɛgyavonku lɛmmɔ kemmo ku bana adala ani na bada ku aduni ani na beebi eli ƒui. Na ogya ɔmmɔ bɔbi ɔsu ni, liwulu likpidi líkeyi bekpone bammɔ na békpi.

²⁴Mmɔ na ɔga ɔmmɔ ɔ́ƒulu na ɔ́va ku lɛdi momoomo ɔnini, “Ɔɔɔdi nkyuli ɛtɛ kani na bébo bákya lɛgyavonku lɛmmɔ kemmo, iye?” Na bekyuli bammɔ lɛnɔ bédie kenye banini, “Ɛɛn, Ɔga Ɔbune.”

²⁵Na ɔga ɔmmɔ ɔ́sɔ ɔ́su ɔnini, “Nsu nkyuli ine na mɔɔnu ka bakɛ beesié taavi na ogya ɔmmɔ kemmo, na bétenyimi bana ɔdi. Ɔdi lɛnɔ ulátina ka ogya ɔmmɔ ɔ́kyula-nwu na ɔ́ƒɔ ɔlɛ. Na si aanu ukyuli unedi ɔmmɔ ni, ɔ́lɛ aani kayaa ɔtu na ɔdi.”

²⁶Amu na Nebukadnesar ɔ́ni úde ogya ɔmmɔ na ɔ́va ɔ́kpali bakloƒu ɛtɛ bammɔ ɔnini, “Sadrak ku Mesak ku Abednego, amii Unwoti Katɔti Ɔyikune Ƒui kabla bablane, bɛvi bɛlɛ mmɔ bibo ɔƒaani!” Amu na bana ɛtɛ bammɔ bávi bálɛ ogya ɔmmɔ kemmo,

²⁷na ɔga bakutine bammɔ ku aban bagadine benengu ku ɔga kasusu bakyane bammɔ ƒui bábasa lisu na bana kudɔ mmɔ. Na bánu ka nkyuli ɛtɛ bammɔ kesii kadi kátakywi iye ogya útekeyi bana lili linwini na belénwenyi uyɔ lɛnɔ.

²⁸Amu na Ɔga Nebukadnesar ɔ́su ɔnini, “Bemwi bakloƒu bamɛni Katɔti ka úmene nwuna katɔ batu na bébedie nwuna kabla bablane! Báƒɔ bana Katɔti bádi, na béni ka badi mina ɔda bubo lɛlɔ. Sɔsɔ ni, báƒuna ka bekpi betulo ka bemwi iye bakya lili kalɔ bete baƒiɔ badi amu ntu bana Katɔti lɛti.

²⁹Na mɔɔsu geen ka lɛɛɛdubo kuƒi bute na bekyuli bani nási kadi ƒui akɔ ku adi ƒui batɛmine akɔ ɔdi ɔsu lɛla lɛdi iye ɔtɛmi uwi-ma. Si ɔdi ɔ́bla lɛni ni, ndubɔya na bekulo-nwu eku eku na babwɛ-nwu kaduli kɔkɛ kɔkɛ. Ɔsika baƒiɔ bayikune badi beeebo ɔyikun ɔni na baƒɔ ukyuli ɔdi ngba lɛni.”

³⁰Na ala amɛni bɔlɛ bɔwɔlɔ kama ni, ɔga ɔ́sɔ ɔ́ƒuna Sadrak ku Mesak ku Abednego útényene kesii kani na kásɔ kákuku ketulo ƒui na Babilon lɛga kadikɔ kalɛkɛ kammɔ lɛlɔ.