Read Lelemi Daniel 4 Bible Online

Daniel 4 - Lelemi bible

Daniel 4

¹Ɔmɛni ɔ́si Ɔga Nebukadnesar kudɔ. Úte kadi ƒui bekyuli ku adi ƒui batɛmine bani nli kayawi kammɔ kemmo. Muugyele amii bekyuli ƒui ku kusɛ kusɛ ka ala ƒui atɛ ete-mii!

²Na ɔdi-mi lɛlɔyɔ pii ka lɛsu-mii ala ebendi ani na Katɔti Ɔyikune Ƒui ɔ́bla úte-mi.

³Nwuna akɔla budie taatina ébomo geen, Na nwuna ablala etulo bɔsu! Nwuna lɛgakadikɔ kese késela uwi ƒui Na ɔdubo lɛlɔ butaadi ɔ́si kaba úsie kaba.

⁴Nka nlie-nwu ƒaa ku atu bɔyɔ na lɛla lɛdi lɛnɔ lilekpoku-mi.

⁵Lígye kɔna kɔdi na kɔɔda liƒu geen ku kɔyu kemmo ala adi bene bɔnu.

⁶Anwuɔsu lɛ́lɔ banundane bani nkya Babilon kalɔ lɛlɔ ƒui nnii bebo mina kesii na bebedie kɔna kɔmɛni kalɔ bete-mi.

⁷Uwi ɔni na bevone ku bekebone ku ayabi kemmo ala banune ku bani mɔɔkanti mmɔ bébeduo ni, lɛ́sɔku mina kɔna lɛ́su-ma, nsu ɔdi útakana na udie-ku kalɔ ute-mi.

⁸Kawɔlɔkɔ ni, okloƒu ɔdi na baalɔ banii Daniel ɔni na lɛ́sia mina baƒiɔ lɛnyi nnii Beltesasar úbo úbeduo na lɛ́sɔku kɔna kɔmɛni lɛ́su-nwu. Na baƒiɔ bayikune bani nse kedee ɔyikun ɔsiaku-nwu.

⁹Amu na lɛ́su-nwu nnini, “Beltesasar, ɔɔɔdi anu kani na áda etulo mina kasusu bakyane ku kelisa benengu bammɔ, mmomu baƒiɔ bayikune kedee bammɔ béte-ɔ ɔyikun sɛsɛɛ ɔni na aakana na eeti taakɛ ala ani na ebo ɔkplu geen muedi kakwɛ, na aakana-nya, na eedie akɔla ala budie taatina abɛdi muedi kalɔ. Anwuɔsu se kɔtu na enu mina kɔna kɔni na lígye na edie-ku kalɔ ete-mi.

¹⁰Na mina kɔna bugye kemmo ni, lɛ́nu kugyii kangyaa kɔdi ka kunye kayawi kammɔ ntɛntɛ.

¹¹Kɔ́kuku na kubo ɔkplu geen kutulo egyii ƒui, na kútétuku kayaa katɔ katɔ ƒui, na ukyuli biala ɔɔkana-ku bɔnu na kayawi ƒui.

¹²Evete áƒɔ-ku lili na kɔ́nwu ebi bonwu bonwu lɛnɔ pii na adubudu kayawi bekyuli ƒui bɔdi. Na alakpi akɔ bebweyi bákɛ ɔyuli na kuna kalɔ na baasɛ lɛnɔ bábla ayu bákya-ku kɔgba akɔ. Na kuna ebi ammɔ na kayawi ala ediedi ƒui aadi.

¹³“Na uwi ɔni na ntɛ muugyé kɔna kɔmɛni ni, Katɔti ɔtu kedee ɔdi na lɛ́nu ka ɔ́yu ɔ́si katɔ ɔdubo.

¹⁴Na ɔ́va ku lɛdi momoomo ɔ́su ɔnini, ‘Da kugyii kɔmmɔ va kalɔ na ekulo-ku kɔgba ƒui na ekpeli-ku evete na egyingya kuna ebi ammɔ akya. Na aya na bebuo bammɔ batɔlɔ-ku kalɔ. Na baasɛ bammɔ beveyi batɔlɔ kuna kɔgba akɔ.

¹⁵Nsu ya na ligyukui lɛmmɔ lɛsɔ linye na kuna ligyiitu lɛda kalɔ na lɛku kemmo alakpi akɔ mmɔ. Ti abuala kpakplaa ku abuala egyiedi na ebo-nwu lɛkpu. “ ‘Sia anu na ɔnantu ku amii aƒɔ-nwu lɛlɔ ƒui na ulie ngba aani bebuo bamba kalɛ na alakpi akɔ mmɔ.

¹⁶Na ete-nwu alakpi akɔ bebuo kasusu na ɔkya udu ɔmmɔ kemmo akwa maatɛ.

¹⁷“ ‘Na Katɔti batu kedee bammɔ nédie lɛdi asa na lɛtuni lɛmmɔ líbo ukyuli ɔmmɔ lɛlɔ. Na ɔmmɔ ɔdubunwini ala bɔtɛya ute bekyuli bani ƒui nli ngba ka Unwoti Katɔti Ɔni Ntulo Ƒui mɔɔdi lɛga kadikɔ biala lɛlɔ, na anwu kani mɔɔƒuna ɔtɔnkune ɔni na uuubo kenyekɔ bonwu kadi na bekyuli anumi na uunwíni ɔga.’

¹⁸“Kɔna kɔmɛni ndi kɔni na ami Ɔga Nebukadnesar lígye, na banundane bammɔ ɔdi útakana-ku kalɔ budie. Nsu lɛ́ƒɔ lɛ́di ka baƒiɔ kedee béte awɔ, Beltesasar, ɔyikun sɛsɛɛ, na adubɔkana na edie kɔna kɔmɛni kalɔ.”

¹⁹Amu na uwi klukui ɔdi kemmo ni, Daniel kasusu kéƒu-nwu na kayi lɛnɔ kákpulu-nwu na kasusu kani na ɔɔbla taasiku kɔna kɔmɛni lɛlɔ ɔsu. Nsu Ɔga ɔ́su-nwu ɔnini, “Beltesasar kasusu ketekpoku-ɔ, na kayi lɛnɔ katakpulu-ɔ na kɔna kɔmɛni ɔsu, iye lɛla lɛni na kuna kalɔ budie bɔdanku lɛlɔ.” Mmɔ na Daniel údie kenye ɔnini, “Ɔga Ɔbune, si nka ƒula bekisine lɛlɔ na égye kɔna kɔmɛni udu ni, nka kaƒɔ kadubɔyɔ-mi!

²⁰Ánu kugyii kɔni na kúbomo na kɔ́kuku kútédu kayaa katɔ ƒui na ukyuli biala ɔɔkana-ku bɔnu na kayawi ƒui.

²¹Na kuna evete lɛnɔ aadia bɔnu na kɔ́nwu ebi pii na adubudu kayawi ala ediedi ƒui bɔdi. Na bebuo baatɛ-ku ɔyuli kalɔ na baasɛ lɛnɔ bábla ayu bákya-ku kɔgba akɔ.

²²Ɔga Ɔbune, awɔ ndi kugyii kɔmmɔ. Na kalɛ na áƒɔ lɛnyi ni, ákɔ ésie katɔ katɔ ƒui, na ƒula lɛga kadikɔ káƒɔ kalɔ ƒui lɛlɔ.

²³“Na ɔmmɔ kama ánu Katɔti ɔtu kedee ɔdi ka ɔ́yu ɔ́si katɔ úbo na ɔ́su ɔnini, ‘Bɛda kugyii kɔmmɔ bɛva kalɔ na bɛyila-ku udu! Nsu kuna ligyukui ani liteenye na nwuna ligyiitu lɛda kalɔ. Na beti abuala kpakplaa ku abuala egyiedi bebo-nwu lɛkpu na lɛku kemmo alakpi akɔ mmɔ. Na ɔ́sɔ unye mmɔ akwa maatɛ ku alakpi akɔ bebuo bamba na kayaa amii aƒɔ-nwu lɛlɔ ƒui.’

²⁴“Ɔga Ɔbune, Katɔti Ɔni Ntulo Ƒui néti linyesia lɛmɛni úmene-ɔ ɔkɛnku kɔna kɔni na égye lɛlɔ, na kuna kalɔ budie ndi ɔmɛni.

²⁵Badubo-ɔ bɔbɔku budie bekyuli bayawine akɔ, na awɔ ku alakpi akɔ bebuo bɛsala bilie liku linwi. Na adubo livo bɔkun aani bebuo bammɔ kalɛ. Na ɔnantu ku amii eteewi-ɔ akwa maatɛ úti útédu uwi ɔni na adubɔnu ati ka Katɔti Ɔni Ntulo Ƒui mɔɔdi kayawi lɛga kadikɔ biala lɛlɔ, na uuti-ka teete ukyuli ɔni na ɔɔyɔ́.

²⁶Nsu úbo ɔda ɔnii batabla ligyukui lɛmmɔ iye ligyiitu lɛmmɔ lɛla lɛdi biala. Ɔmɛni ɔɔtina ka adubɔsɔ enwini abadi lɛlɔ aani ɔga kalɛ si uwi ɔni na ánu áti ka Katɔti mɔɔdi lɛla biala lɛlɔ taasiku katɔ kesii kani na ulie mmɔ.

²⁷Anwuɔsu, Ɔga Ɔbune, buvele, nu kalɔ na abla lɛla lɛni na ndubo-ɔ bɔsu mɛni. Da ƒula ekpidi ani na aabla ya na enwini kama akya-nya na ataabla lɛbuni. Na ataanu bekyuli bani na ala eekpóku kɔnyana, na ɔƒaalɛ lɛla biala lɛdubɔtɛ lite-ɔ.”

²⁸Ɔbla aani abuli leevu-anyɔ kama ni, Ɔga Nebukadnesar ɔkɛ uusié taavi na nwuna lɛsa katɔ na ɔɔnu Babilon ɔma unengudi ɔmmɔ bɔdia asa na ala amɛni ése kalɔ aalɛ́ku-nwu. Na ɔ́su lɛlɔ ɔnini, “Bɛnu, ɔma unengudi ɔmɛni ɔɔdia bɔnu ku ala enengudi ani na ami ɔlati líti mina ɔyikun lɛ́tu kalɛ na mina lɛnyi liteekeye!”

³¹Nsu asa na útaawɔlɔ ala amɛni bɔsu ni, lɛdi lɛdi lɛ́si katɔ na líkulo-nwu kenye lɛnini, “Ɔga Nebukadnesar, lɛga kadikɔ kammɔ kasɔ kaaadi awɔ kadi.

³²Badubo-ɔ bɔbɔku na eteesie atákya alakpi akɔ ku bebuo bammɔ na alɛ bekyuli akɔ. Na livo na adubo bɔkun akwa maatɛ aani ɔmantɛ akɔ úti útédu uwi ɔni na adubɔnu ati ka Katɔti Ɔni Ntulo Ƒui mɔɔdi kayawi lɛga kadikɔ biala lɛlɔ, na anwu mɔɔƒuna bana lɛlɔ ɔdine lɛnɔ.”

³³Na lɛdi lɛmmɔ kenye kamɛni kátawɔlɔ tɔ asa na bábɔku-nwu bálɛku na úse kalɔ ɔɔkun livo na ɔkɛ amii lɛlɔ ɔɔví aani alakpi akɔ bebuo kalɛ. Na kalɛ na emeyi ammɔ eebo ni, lɛni kani na nwuna linwini liine aani kɔdigbo aasɛ agya, na nwuna aƒiɔ lɛnɔ eene gyɔlɔɔ aani aasɛ lɛgba aƒiɔ.

³⁴Na uwi ɔni bése kawɔlɔkɔ ni, lɛ́kpali Katɔti lívele-nwu na mina kasusu kásɔ kénwini kébo-mi na ɔ́bla-mi nwaa. Mmɔ na lɛ́su nnini, “Muumwi Katɔti Ɔni Ntulo Ƒui, na mɔɔbu-nwu. Anwu nli ngba uwi ƒui.” Nwuna lɛga kadikɔ kese késela uwi ƒui. Na kadubuse ɔ́si kaba úsie kaba.

³⁵Kalɔ lɛlɔ kadi bekyuli ƒui baaadi lɛla lɛdi na nwuna anumi. Lɛla lɛni mɔɔyɔ́-nwu kaƒɔ na ɔɔbla Ɔɔdi ayabi ku kayaa kammɔ ƒui lɛlɔ. Na ɔɔdi ukyuli biala lɛlɔ na kalɔ lɛlɔ. Na si Katɔti ɔ́bla lɛla lɛdi ni, bulakana-nwu bɔbala iye buye bɔnii, “Bi ndi lɛla lɛni na ábla mɛni?”

³⁶Uwi ɔni kemmo kani na mina kasusu kásɔ kénwini kébo-mi nwaa ni, bekyuli bése kalɔ baabu-mi na muukeye kalɛ na mina lɛgakadikɔ lɛnɔ kekeye. Na ɔmɛni kama ni, mina kasusu bakyane ku kelisa benengu ƒui básɔ bénwini bábasia-mi kama, na básɔku-mi bése liboku lɛlɔ mina ɔyikun ku kenyekɔ kásɔ kákɔ katɔ kétulo kudeedi ƒui.

³⁷Ɔmmɔ ɔsu na lɛ́su nnii bemwi Katɔti ɔni nli mɔɔdi lɛlɔ ɔ́si katɔ ƒui ku ɔbu! Ɔsika lɛla biala na ɔ́bla lɛdia na lɛkɛ ulu lɛlɔ siin, na bani ƒui mɔɔkɔliku lɛlɔ katɔ ni, uuboku-ma kalɔ.