Read Lelemi Daniel 9 Bible Online

Daniel 9 - Lelemi bible

Daniel 9

¹Amu na akwa adi kama ni, Mediani Dario ɔni ndi Ahasweros ubidi ɔnanabi úbenwini Babilonƒuɔ ɔga.

²Na nwuna lɛga bɔdi lɛkwa lideedi kemmo ni, líbo ḿbanu lɛ́ti na kenye bediene ala ani na bénweni bése bɔka kemmo ka Unwoti ɔ́su Kenye Udiene Yeremia úse ɔnini, “Bekisine badubo Yerusalem bɔbwɛ na ɔsɔ uwi ukpludi akwa liti ku aavlanyɔ.”

³Na kalɛ na lɛla lɛmɛni líkpoku-mi ɔsu ni, línyimi kenye na nda ala ani mɔɔtina ka muuwulo kɔnyana. Na lɛ́yu lɛ́tɛ ntɔ akɔ, na lídie mina alaekpidi kalɔ.

⁴Na lɛ́kpali Unwoti mina Katɔti kpakplaa geen lɛ́su nnini, “Bula Unwoti, adi Katɔti ɔni na ébomo na ƒula lɛlɔ libo liƒu geen. Na bekyuli bani na baayɔ́-ɔ na beenú ƒula litemi ni, alalɛ ƒula linyese lɛni na ényimiku-ma kama kudii.

⁵Nsu bɔ́bla alaekpidi bonwu na bɔ́ƒiɔ-ɔ geen na bɔ́ta búnye-ɔ lɛlɔ, na búni ƒula ɔda bubo ku ala ani na átina-bu.

⁶Na bútenu ala ani na ƒula kenye bediene bani ndi ƒula kabla bablane básu bula baga ku batɔnkune ku bula bati kuuku ku bula kadi bekyuli ƒui, na búdie-ni atu.

⁷“Bula Unwoti, lɛla biala na ábla lɛdia, nsu bula anumi eewi kalɔ na bekyuli ƒui anumi, ɔsika bɔ́lɛ ƒula litemi kama na bɔ́bla alaekpidi. Na abu Yudaƒuɔ ku Yerusalemƒuɔ ku Israelƒuɔ ƒui bani nde mɛni ku bani na bakya kaƒɔ ɔlɔgyu ƒui nábla ala amɛni udu. Na bani lɛnɔ na áya na bákpanku bátɔlɔku bésienku kɔlɔ bamba kemmo lɛnɔ bábla ala amɛni.

⁸Bula baga ku bakutine benengu ku bula bati ƒui bebunku.

⁹Unwoti Katɔti, aanu kɔnyana na eeti likpidi taakyiɛ ina ka bɔ́bla alaekpidi na bɔ́ƒiɔ-ɔ,

¹⁰na búni ƒula ala ani na átina-bu ɔkɛnku ƒula kabla bablane bani ndi ƒula kenye bediene lɛlɔ.

¹¹“Ukyuli biala na Israel úni ƒula ɔda bubo na atuɔkplu bɔbla kemmo na buládi-mu lɛlɔ, anwuɔsu na ewida ani na ƒula kabla ɔblane Mose únweni úse ébo-bu lɛlɔ.

¹²Álɛ abu ku bula batɔnkune ése kpakplaa ka ɔgbankpi ɔni udu nétebo tɔ kudii ɔdubo Yerusalem bɔlɛku. Na lɛla lɛni bɔlɛ na álɛ-bu ese kpakplaa mmɔ geen, na áya na lɛɛlɛ́ku-bu ɔƒaani.

¹³Na bula ɔdi útakana na ɔlɛ ewida ala ani na Mose únweni úse mmɔ ɔdi kemmo. Nsu búni na bulévele-ɔ ka anu-bu kɔnyana na bunwini kama bɔkya bula ekpidi bɔbla, ɔsika awɔ aadi ƒula etemila lɛlɔ siin na alalɛ-nya kama kudii.

¹⁴Na ka éti ɔgbankpi ɔmɛni éboku-bu lɛlɔ ni, ábla ala ulu lɛlɔ, ɔsika bɔ́manku ka áni-bu kɔtu kɔmɛni udu.

¹⁵“Unwoti bula Katɔti, awɔ ɔlati ƒula kɔnu kɔni na eeti taabla ɔyikun ala na éti édie-bu ásiku Egyipteƒuɔ enu kemmo, na áya na ƒula lɛnyi lísie ɔgyu úti úbedu ɔmwi limeyi lɛmɛni lɛlɔ, nsu alaekpidi bonwu bonwu bɔbla lɛlɔ kani na bɔmu bunye.

¹⁶Uwi ɔni návi kemmo ni, ábla-bu lɛƒɔndia geen lɛni náya na bɔɔnu taati na buuvele-ɔ ɔmwi ka ada kɔnyi kpakplaa kɔni na éti ákya Yerusalem mɛni buti taakya-bu aya. Ɔsika ina bi na abu ku bula bati kuuku bɔ́bla na bula anumi éwi kalɔ na kadi ƒui anumi muedi ni, ƒula ɔma ɔni na áƒuna na áya na bátu-nwu bálɛ ƒula kɔbi kedee lili lɛnɔ na ɔdi.

¹⁷“Unwoti Katɔti, ƒula kabla ɔblane na ndi. Nu-mi buvele ku kɔtɔ kɔni na muukpi-ɔ, na enwini anu ƒula kakpakɔ kani na bábwɛ béwi kalɔ, na aya na bɔsɔ bɔtalaku-ka, na ƒula lɛnyi likeye.

¹⁸Buvele, nu ƒula ɔma ɔƒunadi ɔmɛni kɔnyana ɔɔɔdi ɔni na abu bɔ́manku ɔsu mmomu na ƒula lɛƒɔndia bonwu lɛni ebo ete bekyuli ɔsu.

¹⁹Ti bula bɔƒiɔ kyiɛ-bu! Yile bubo na ababla lɛla lɛdi na ɔɔɔdi ƒula ɔma ɔmmɔ kani iye abu ƒula bekyuli baƒunadi lɛti ɔsu, mmomu kalɛ na aya na ƒula lɛnyi likeye ɔsu.”

²⁰Mmu nnye muudie mina alaekpidi kalɔ ku Israel adi ƒui teete Unwoti Katɔti, na muuvele kalɛ na lɛla biala lɛtɛ lite Yerusalem,

²¹asa na Katɔti ɔtu Gabriel ɔ́yu úbeduo uwi ɔni na baabla useyi uwi akpala mmɔ. Na anwu kani na lɛ́nu ḿbavi na mina kɔyu kemmo ala bɔnu kemmo mmɔ.

²²Na údie ala kalɔ ɔ́su ɔnini, “Daniel, bubo na líbo mɛni mbebunku-ɔ na enu kɔyu kemmo ala ani na ánu mɛni kalɔ.

²³Katɔti uuti-ɔ lɛlɔ kasusu geen, anwuɔsu uwi ɔni kani na ése kalɔ aakpali-nwu kani na ɔ́tala-mi ka libo mbedie ala ammɔ kalɔ lite-ɔ.

²⁴Katɔti ɔ́ɔlɛ ugyii na uwi ɔdi úse ka uwi ɔmmɔ liti ku aavlanyɔ akpa maatɛ budu kemmo ni, bina ɔma kedee ɔmmɔ ku nina bekyuli ƒui badubo abi bubo bɔƒɔ bana ekpidi bɔbla lili kayu. Na ɔmmɔ kama ni, likpidi udu biala bɔbla bɔdubo bɔyii na litemi bɔtɛ siin bɔƒɔ lɛla biala kenye uteesie uwi ƒui. Na ala ani na ánu ku kenye bediene etemila ani na básu ebo-nwu kemmo lɛni na bedie kesii kani ndubuse kedee ƒui keyi bete kadi ƒui.

²⁵“Na ɔlɛka anu ati ka uwi ɔni na bébo ɔda ka basɔku Yerusalem batu úti útédu uwi ɔni na Ukyuli Ɔƒunadi ɔmmɔ webo ni, ɔdubɔbla akwa maatɛ ku liti ku leevu-inyɔ akpa maatɛ. Badubo lɛblɔnu budie bɔvinku Yerusalem ɔma ɔmmɔ kemmo, na babla kenyekɔ kani na benye bagyumana ɔma ɔmmɔ bamana-nwu, nsu uwi ɔmmɔ ɔdubɔbla uwi kpakplaa geen.

²⁶Na uwi ɔmɛni kawɔlɔkɔ ni, badubo Ukyuli Ɔƒunadi ɔmɛni bɔdu na nwuna lɛla biala lilébu. Kadi bamba lɛlɔ ɔdine ɔni ndi ɔƒɔ ɔdi ku nwuna bekpone badubo babasia mmɔ bavi aani kalɛ na ketu keeyi taagba taavi kesii kadi na babwɛ ɔma ɔmmɔ ku kakpakɔ kammɔ na kekpo ku ala bubile bɔmmɔ bɔdubusie anumi utédu kawɔlɔkɔ aani kalɛ na Unwoti ɔ́lɛ ugyii úse.

²⁷Na Kwasida unwi kemmo ni, kadi bamba ukyuli ɔmɛni ɔdubo lɛla kpakplaa lɛdi bunyimi ku bekyuli pii badi. Na Kwasida unwi ɔmɛni ntɛ bule kemmo ni, ɔdubɔya na lɛkpa biala ku etela kenye kekulo. Na ɔmmɔ kama ni, liƒula bonwu lɛni ndanku ala bubile bɔmɛni bɔdubo bɔda bɔlɛ mmɔ. Na ɔdubunye mmɔ butédu uwi ɔni na Katɔti ɔ́lɛ ugyii úse ka ɔyila liƒula lɛni muubile ala mɛni udu.”