Read Lelemi Hosea 1 Bible Online

Hosea 1 - Lelemi bible

Hosea 1

¹Unwoti ɔ́su Hosea, Beeri ubidi, kenye kadi uwi ɔni na Yuda baga Usia ku Yotam ku Ahas ku Hesekia bélie bádi lɛga ɔdi biala ku nwuna uwi, na Yeroboam, Yoas ubidi, lɛnɔ ɔ́di lɛga na Israel.

²Katɔti ɔ́kpali-mi na ɔ́su-mi ɔnini, “Hosea, téti uleku ɔni mɔɔsiaku banana bamba na bɛwɔ, ɔsika Israel ɔ́lɛ-mi kama aani uleku utidi.”

³Anwuɔsu lísie na ńtéti Diblaƒuɔ ubidi ɔni baalɔ Goma. Na ami ku-nwu bɔ́wɔ ɔnanabi.

⁴Na Unwoti ɔ́su-mi ɔnini, “Sia ubi ɔmmɔ lɛnyi anii Yesreel, ɔsika uwi ɔsɔ uletu asa na Israel Ɔga Yehu kaba kemmo bebi ku bawɔ ni, ndubɔni-ma kɔtu na bekyuli bani na ɔ́du na Yesreel Kɔwɛ kemmo ɔsu. Na ndubɔbwɛ nwuna lɛga kadikɔ.

⁵Na Yesreel mmɔ na ndubɔyila Israelƒuɔ bammɔ ɔyikun ɔni na bebo na libile-ma.”

⁶Ɔmmɔ kama ni, Goma úbawɔ ulekubi na Unwoti ɔ́su-mi ɔnini, “Sia-nwu lɛnyi anii Lo-Ruhama, na nwuna kalɔ ndi kɔnyana tanu, ɔsika nsɔ lɛɛɛdubo Israelƒuɔ kɔnyana bɔnu na liti bana ekpidi lɛkyiɛ-ma.

⁷Nsu ami ndi Yudaƒuɔ Unwoti Katɔti na ndubɔnu-ma kɔnyana na ndubudie-ma na libunku-ma ɔkɛnku ami ɔlati ɔyikun kemmo. Na ɔɔɔdi kekpo na badubo bukpo iye kɔtaminta iye kuwii kɔni na bekyuli bani muulie bapɔnkɔ lɛlɔ badubɔtu bekyuli ɔsu.”

⁸Amu na uwi ɔni na Goma ɔ́da ubidi Lo-Ruhama lɛnyi bute ɔ́ya ni, ɔ́sɔ ubada kaƒɔ na ɔ́wɔ ɔnanabi ɔbambadi.

⁹Na Unwoti ɔ́su-mi ɔnini, “Sia-nwu lɛnyi anii Lo-Ammi, na nwuna kalɔ ndi bɛɛɛdi mina badi, ɔsika bekyuli bamɛni baaadi mina badi na ami lɛnɔ lɛɛɛdi bana Katɔti.

¹⁰“Limeyi lɛdi lɛdubo lɛni na ukyuli ɔdi ulakana Israelƒuɔ bɔka, ɔsika badubo bumomo aani ɛpu kɔnwinimi. Na ɔƒaani ni, ama baalɔ banii, ‘Bɛɛɛdi mina bekyuli.’ Nsu uwi ɔni mebo kemmo ni, bekyuli badubɔlɔ-ma banii, ‘Katɔti Ɔni Nli Ngba uwi ƒui Bebi.’

¹¹Yudaƒuɔ ku Israelƒuɔ ƒui badubɔsala babla unwi na baƒuna ɔtɔnkune unwi. Mmɔ na badubɔsɔ baƒɔ bana kalɔ benwini bana ɔdi, na limeyi lɛmmɔ lɛdubɔbla lɛlɔyɔ limeyi bonwu na Yesreel.”