Read Lelemi Hosea 11 Bible Online

Hosea 11 - Lelemi bible

Hosea 11

¹“Lɛ́yɔ Israel uwi ɔni na ɔdi ɔnamu na lɛ́lɔ mina ubi lɛ́siku Egyipte.

²Nsu kɔlɛ kɔlɛ kɔni na mɔɔlɔ-nwu teeboku lɛlɔ aani ubi kalɛ ni, kɔlɛ kɔmmɔ na uusié kama na mina kudɔ. Na baabla akpala teete Baal baƒiɔ na baakyula oloƒui teete ala ani na bávɔ mmɔ.

³Ami náda Israelƒuɔ kɔnu na lɛ́tina-ma kalɛ na beesié. Nsu bátanu bátati banii ami nábwi-ma.

⁴Ka bana lɛlɔ lɛɛda-mi kubiti na mɔɔyɔ́-ma ɔsu ni, lɛ́da-ma lɛ́kya lɛlɔ. Lɛ́gyu-ma, na lɛ́da-ma lɛ́mana mina kayi, na líbo kalɔ buɛɛ na lɛ́kya-ma adila na bádi.

⁵“Béni ka bani bede-mi, anwuɔsu ɔlɛka basɔ benwini besie Egyipte kalɔ lɛlɔ, na Asiria ɔdubɔdi-ma lɛlɔ.

⁶Ɔlɛka bekpone bekpoku-ma na bana lɛma linengudi kemmo na begyingya bana lɛma lɛban kɔyakun ƒui. Lɛni na ɔdubɔlɛku mina kadi bekyuli, ɔsika lɛla lɛni na ama bánu ka lɛdia-ma ni, ani na baabla.

⁷Mɔɔnu ka mina bekyuli bálɛ ugyii ka bada lɛlɔ bamami-mi lɛlɔ. Na baawia ka beti lɛlɔ bete baƒiɔ bani na baakali ka bebo ɔyikun bétulo-mi, nsu balakana-ma kebunku kadi bute.

⁸“Israelƒuɔ, naaakana-mii bɔnyonu lɛni iye lidie-mii atu. Na naaakana makyula-mii aani kalɛ na lɛ́bla Adma ku Seboim. Oowo, uladia-mi bɔbla lɛni, ɔsika mina kayi kelete-mi kuƒi na kalɛ na mɔɔyɔ́-mii ɔsu.

⁹Nsɔ lɛɛɛdubo-mii kɔtu bɔni na kalɛ na mina kɔnyi kɔ́kɔ katɔ kútédu kenye, na lɛyila-mii udu, ɔsika ami ndi bina Katɔti ɔni nse kedee, na ɔɔɔdi ukyuli ɔyawine na ndi na nli-mii akɔ. Anwuɔsu nsɔ lɛɛɛdubo ku kɔnyi.

¹⁰“Mina kadi bekyuli badubɔsi ɔƒɛ kanukɔ bebo na babasiaku ami bana Unwoti kama ku bɔyia si lɛ́kwanyi aani gyata.

¹¹Na badubɔsi Egyipte bebo aani baasɛ bani muuveyi ku usi, na bakɛ ligeen aani babloduma bani nási Asiria na lɛsɔku-ma liboku bana kesii. Ami Unwoti násu lɛni!”

¹²Israelƒuɔ baanyi ɔkɔ taatɔlɔ bana Unwoti Kedee ɔni mɔɔdi nwuna litemi lɛlɔ uwi biala teete bekyuli ku bana ɔkɔ etemila pii ammɔ. Na Yuda lɛnɔ unye nwuna lɛƒiɔkpa lɛlɔ.